¹ Chikna jun señal ta ch'ulchan : tul ants sk'uinoj te k'aal sok ay ta yanil U yakan; jun corona te ja' yicho lajchayeb ek'etik ta sba sjol. ² Yak ta awunel yu'un nopolix te ya xbejk'ajix te alal yu'une. ³ Chijkna yan seña ta ch'ulchan: !ilawilik! ay jun tsajal muk'ul chambalam kax muk' te ay yich'oj jukeb sjol sok lajuneb xu'lub janix jich jukeb korona ta ju jun sjol. ⁴ ta snej la smeskoel oxejt' ek'etik te ay ta banti ch'ulchan, jich ch'ay koel ta lum k'inal. Te muk' chambalam la stejk'ansba ta sit te ants te nopol ya xbejk'ajix te alal yu'une, yu'un ya sk'an sbijk'bel te alal te k'alal bejk'ajemixa. ⁵ Kerem te yal ants te bejk'aje, ja' ya spas ta mantal ta spisil balumilal sok jun bara tak'in. te skereme ikbotmoel yu'un te Dios sok ta stojol te muk' naktibalil. ⁶ te ants bajt' anel ta takin k'inal, banti chajbanbil snail yu'un te Dios, jich ya yich' ta kananteyel oxbajk' sok oxwinik (1,260) k'aal. ⁷ jajch' tsaktomba ta ch'ulchan. te Miguel sok te ch'ul abatetik la stsakbaik sok te muk'ul chambalam; te muk'ul chambalam sok te abatetik yu'une la sutikuk. ⁸ mabal bayalukix yip te muk'ul chambalam jich mabal ju' yu'un. Mabal ayukix snail yu'un le te ch'ulchane sok te abatetik yu'une. ⁹ te muk'ul chambalam -- ja' te pokolix chan te sbilino pukuj sok satanas te ja' ya sloliy te balumilal -- la yich' ch'ojel koel sok te abatetik yu'une. ¹⁰ la kay te ay mach'a k'opoj tulan ta ch'ulchan: " nopol xtalix te koltayel, yuel, sok te smantal te Dios, janix jich te ya yich' yat'el te Cristo. ch'ojbilix koel te mach'atik ya slejbey smul te kermanotaktik, te mach'atik ya slejbey smul ta stojol te Dios. ¹¹ jaik la stsalik ta swenta sch'ich'el te jun ch'ij sok swenta testigo k'op, sch'ojosbaik ta yot'an manchukme jich ya staik milel sok. ¹² tseejukme awot'anik, jaex ch'ulchan sok te mach'atik te nainematik lea. jaukmeto ayatik me ta smelel awot'anik te mach'a ayik ta balumilal sok ta atsam ja' te pukuje ilinemix te koel ta atojolik, ya sna' te mayuk bayal yorail. ¹³ K'alal la sna' stojol te muk'ul chambalam la yich' ch'ojel koel ta balumilal, la snuts te ants te la yak' te tul skereme. ¹⁴ te ants la yich' ak'beyel cheb muk'ul xik' jich te bit'il yu'un te xik, jichme ju' yu'un xwilbel le te banti chajbanbil snail ta takin k'inal. ja' te banti ya yich' kanantayel oxeb jawil sok olil jich ma xtaot te muk'ul chan. ¹⁵ te chan la smal lok'el ja' ta banti ye jich te bit'il muk'ul ja', yu'un ya sk'an xnoj ta ja' jich ya xkuchotbel te antse. ¹⁶ te k'inale la skoltay te antse. la sjam ye te k'inale. jich la yuch'bel te ja' la slok'es ta ye te muk'ul chambalam. ¹⁷ te muk'ul chambalame ilin bayal ta stojol te antse, jich bajt' ta stsakelsba sok te yantik stsunbal te antse, jaik te mach'atik sch'unbeyojik smantal te Dios, sok te yich'ojik testigo yu'un te Jesus. ¹⁸ jich yu'un te muk'ul chambalam la stejk'ansba ta sti' atsam ja'.