¹ Kermanotak, te me ay tul winik la yich´ tsakel ta tenuk mulil, jich bit´il te ja-exe te ja wich´ojik te espiritue ya me sk´an ja cha jachik ta yutsil awot´anik. Ya me sk´an te ya atsajteya baikuk jich me ma awich´ik ilbel awot´anik. ² Jech kuch´ beyabaik te awik´atsike jich me ya ak´otesik pasel te smantal te Cristoe ³ Melel te me ay mach´a ya skuy sba te tulan sk´oplale jauk´meto mayuk stulal, stukelnax ya sloleysba. ⁴ Tulu tul ya sk´an stsajtay bi yilel te yat´ele, jich me ay swentail te ya yak´sba ta ich´el ta muk´ ta stukelnax ma ta swentauk´yan. ⁵ Melel tulu tul ya yich´ ba-el te yik´atse. ⁶ Te mach´a ya yich´ nojptesel ta sk´op Kajwatik ya sk´an yak'beyuk te b´ijupteswanej yu´un te bila lek ya sta-e. ⁷ Ma me awich´ik lolayel. Dios ma xju ta labanel, melel te bila ya sts´un te ants-winike, ja me ya sk´ajbey sit. ⁸ Jich te bit´il mach´a ya sts´un te sbak´ te mulawil bak´ete, ya me sk´aj lajel. Te mach´a ya sts´un te sbak´ ta swenta espiritu, ya me sk´aj kuxinel sbajt´el k´inal. ⁹ Ma me xlubotik ta spasel te bila leke, melel ya me sta sk´alelal te ya k´ajtike, te me ma la jkak´batik tsalele. ¹⁰ Jich yu´un te ba ya x'u awu-unike, jpastik te bila lek ta stojolik te ants-winike, ja xan ya sk'an ya jpastik ta stojolik te mach´atik jun ch´unjelotik soke. ¹¹ Ilawilik te bit´il la ts´ibubeyex tulan sk´oplal la jkalbey. ¹² Ay mach´atik ta swenta nax sbak´etalik ya sk´anik te chajb´nax awilik, te yakik ta sle-el te yakuk awich´ik te sircinsione. Jich yakalik ta spasel swenta yu´un ma xyich´ik nutsel ta skaj te skruz te Cristoe. ¹³ Ja nix jichuk te mach´atik la yich´ik te sirkunsisione ma yakik ta xch´u-unel te mantalile, ja´ukmeto ya sk´anik te yakuk awich´ik te sirkunsisione, jich me ya yak´ sbaik ich´el ta muk ta swenta te aba´etalike ¹⁴ Ja´ukmeto mayuk bi ora ya jtoyba janax ta swenta te skruz te kajwaltik Jesucristoe, jich te balumilale lajemix k´o-em ku´un ta kruz sokuk te balumilale lajemonix ta stojol. ¹⁵ Melel ma xtu´un te sirkunsisione, ja nix jich te mach´a ma yich´oj te sirkunsisione, te bila tulan sk´oplale ja te yach´il kuxlejaltike. ¹⁶ Spisilik te mach´atik jich kuxulik ta swenta in mantalilto, ayuk lamal k´inal sok te yutsil ot´anil ta stojolike, janix jich ta stojol te Israel yu´un te Diose. ¹⁷ Ta ora to sok ta patil mayuk me mach´a ya jk´an bila yalbon, melel te jo´one kich´ojbey ta jbak´etal te señail te Jesuse. ¹⁸ Kermanotak te yutsil yot´an te kajwaltik Jesucristoe, ayuk ta ja espiritu´ik. Jichuk.