¹ Ya jpasat ta mantal ta stojol te Diose sok ta swenta te Cristo Jesús, te nopol ya slikbeyix smul te mach´atik kuxatik sok te mach´atik lajemik, ta swenta te ya xcha tal ta ajwalinele. ² Chola me te sk´ope. teme ja yorailae sok te me ma jauke. Albeyame, koma, tak´uya sok lamaluk me awot´an ta bijteswanej. ³ Ya me sta yorail te anst-winike ma tsik´ yu´un te tulan bijtesele. Jich yu´un ya xjoytayot yu´un bijteswanejetik te ya x-ak´botik yilik te beluk ya smulan yot´anike. Janax te beluk ya sk´an yaiy stojol sok te xchijkine. ⁴ Ma sk´an xch´am yayik stojol te beluk smelelile, sok le ya sujt´ikba-el te banti yantik k´opetike. ⁵ Jaukmeto te Ja´ate ayuk me abijil yu´un ta spisil to. Ts´ikame te awokole, at´eliname xcholel te yach´il k´ope, k´otesame ta pasel te awat´el ak´botate. ⁶ Te jo´one chapalonix yu´un te ya xlajone. La staix yorail te ya xboone. ⁷ La kajyix lekil tsalaw, lajix kot´an ta alimal; sok stalel ay te xchujel kot´ane. ⁸ Te korona yu´un te beluk toje ja´ k´ejbilonix, te Kajwaltik te toj ya xchajp´anwan stukele ya yakbon korona te me sta skalele. Sok ma jaukon nax, sok te mach´a sk´ano yot´an te ya xchikna tele. ⁹ Antayame te ya xtalate la me ta ora. ¹⁰ Melel te Demas la yijteyonix. Ja´ bik´tajix yot´an yu´un te balumilale jich bajt´ ta Tesalónica. Crescente bajt´ta Galacia, sok te Tito bajt´ ta Dalmacia. ¹¹ Janax te Lucas sjoinejon jilel. Le-a te Marco sok ik´a tel yu´un ya x-at´e ku´un leto. ¹² Te Tíquico la jtikunba-el ta Éfeso. ¹³ Te najt´il jk´upak´e la kijtey ta Troas sok te Carpo, ich´bonte teme talate, sok te junetike janix jich te balbilke yu´un bayal sk´oplal ku´un. ¹⁴ Alejandro te ten tak´ine la yak´ ilel te ma la xch´un spasel te sk´anjel kot´ane. Te kajwaltike ya me yak´bey stoj stukel jich te bit´il la spas te yat´ele. ¹⁵ Janix jichatu-uk ya me sk´an ya atsatayaba melel k´axel skontroine te k´op ya jkaltike. ¹⁶ Te sbabial buelta la jtek´an ba ta k´ope , mayuk mach´a la skoltayon. la yijteyonik ta spisilik. Manchuk me ya yich´ kuenta te kajwaltik ta stojolik bi. ¹⁷ Jaukmeto te kajwaltike ay ta jtseel sok la yak´bon jkip jich ts´akal la cholbey sok ta spisil te yan lumetike la yayik stojol. La slok´esontel te bay ye tiawal choj. ¹⁸ Te kajwaltike yame skoltayon lok´el ta bay spisil te beluk ma lekuk ya xtal ta jwentae sok ya me skoltayon te ya x-ochon te bay ajwalinel ta ch´ulchan. Ak yich´ ich´el ta muk´ta ora to sok ta sbat´el k´inal. Jichuk. ¹⁹ Pajt beya yot´an te Prisca, Aquila, sok te mach´a ay ta snaj te Onesíforo. ²⁰ Erasto ayin ta Corintio, juakmeto te Trófimo tsak bil ta chamel te k´alal la kijtey ta Mileto. ²¹ Pas atulan te ya xtalat te manchuk to ya xjul a te sike. Eubulo ya spatbat awot´an, sok te Pudente, Lino, Claudia sok te spisil te kermanotaktike. Te Kajwaltike ak me yak´bat yip te a espiritu. ²² Te yutsil yot´ane ayuk ta atojolik.