¹ Jich yu´un jnich´an, ayuk me yip yutsil awot´an ta stojol te Cristo Jesús. ² Te beluk la awayik stojol ku´un sok te mach´atik testigo albeyame te ants-winiketik te junuk yot´anik ta xch´uunel te kajwaltike, jich te bit´il ya xu yu´unik snoptesel te yantike. ³ Ya me xk´ax awokol jku´un, jich te bit´il tul soldado yu´un te Cristo Jesús. ⁴ mayuk me tuluk soldado ya snop te bit´il te ya xkuxine, jich lek sk´oplal yu´un te wolwanej yu´une. ⁵ Janix jich teme ay mach´a ya tsal sba ta alimal, ma me yich´ skorona te me ma la yich´bey swentail te alimale. ⁶ Ya sk´an te mach´a ya x-at´e ta slum sk´inal ja´ ne-el ya stuuntes te sbabial site. ⁷ Nop away te beluk yakon ta yalele, jich me yu´un te Diose ya yak´bat anabey swentail spisil. ⁸ Na-ame te Cristo Jesús, te tsumbal te David ja´ te mach´a chakuxixtel ta bay aelmeletik. Jich te bit´il ya yal te yach´il jk´op te yakon ta xcholel, ⁹ yak k´axel jwokol ya kaiy jich te bit´il chukul ta cadena te tul milwal. Jaukmeto te sk´op te Diose ma chukuluk. ¹⁰ Jich yu´un te ya jts´ik spisil to ta swenta te mach´atik tsabilik, yu´un jich ya staiku-uk te skolelik ta stojol te Cristo Jesús, te ay yutsil sbat´el k´inal. ¹¹ Ta smelelil in to:¨Te me lajotik soke, pajal ya xkuxinot sok. ¹² Te me ya sts´ijk kuuntik te jwokoltike pajalme ya x-ajwalinotik sok. Te me la jmuktik ta kojt´antike, janix me jich ya smukotik ta yot´anu-uk. ¹³ Te me ma junuk kot´antik ta stojole, jun yot´an stukel, yu´un ma xu ya smuk te bi yilel stalel stukele ¹⁴ Ak´ame te ya snaulayik spisil te beluk kajlojixe. Albeyaik yaiyik ta stojol Dios te ma jontoltikuk nax ya stsak sbaik ta tojol k´opetik. Melel te me jich la yich´ spasele ma lekuk ya xlok´ika-a. Ta swenta in to yame xjinbot yot´anik yu´un te mach´atik ya yayik stojole. ¹⁵ Antayame te bit´il lek ya xk´oat lok´el ta stojol te Diose jich te bit´il mach´a ya x-at´e ma k´exaw. sok te bit´il ya stu´untes te smelelil k´ope. ¹⁶ Ijtayame jilel spisil te jontol ayejetike, te beluk ya yak´at xan ta ch´ayele. ¹⁷ Te sk´ope jich me xpujk´ bael te bit´il sk´ael ejch´en . Jich te bit´il ay te Himeneo sok Fileto. ¹⁸ Ja´ito ja´ winketik te la yijteyik te beluk smelelile. Ja´ya yalik te cha kuxele k´axix. ya yak´ te ya xjin xch´unjel yot´anik te yantike. ¹⁹ Jaukmeto junax te yiptijib yak´o te Diose. Te ma stij sba stukele: ¨Te kajwaltike ya snabey sba te mach´atik yu´une¨, sok ¨spisil te mach´a ya yalbey sbiil te kajwaltike ya sk´an ya sk´ej sba te banti beluk ma lekuk ta pasele¨. ²⁰ Jich bit´il te wol sna te k´uleje ma jauk nax ay swe´ sets´ te pasbil ta oro tak´in sok ta plata tak´in. Jaukmeto ay swe´ sets´ te pasbil ta te´ sok ta ajch´al. Ay t´ujbil le-a te ya xtu-une sok ay nix te ma t´ujbiluke. ²¹ Te me ay mach´a ya yijtey te beluk ma lekuke jich me ya xk´ot te bit´il lekil we´sets´e. k´ejel me ya yich´ak´el, ya me xtuun yu´un te Kajwaltike, sok jich ya xchajpan ta spasel spisil te beluk leke. ²² Lok´anmetel le-a te banti beluk ya smulan yot´an te ch´ieletike. Nutsaik te beluk toje, jich te bit´il xch´unjel ot´anil, xk´uxul ot´anil sok lamal k´inal, sok te mach´atik jun yot´an ya sk´oponik te kajwaltik. ²³ Jaukmeto ma sk´an yaiy stojol te beluk ya yich´ jojk´ibel yu´un te yantike. ya me sk´an anaik te me jich ya yich´paseltoe yame xjach kera. ²⁴ Te abat yu´un te Kajwaltike ma me sk´an yaiy kera. Ja´me ya sk´an yak´ ilel te yutsil yot'ane sok te ya yak´ ilel te beluk leke, janix jich te ayuk smalib yu´une. ²⁵ Pejk´eluk me ya yak´ sba te k´alal ya sbijtes te mach´a yan snop´jibal yu´une. Te Diose ya me stak yak´te ya sujt yot´anik yu´un te smelelil ya yich cholbeyele. ²⁶ Yu´un me jich ya yich´ sbijilik yu´un ta yan buelta sok ya xlok´tel ta bay pejts te pucuje, te le chukulika-a sok sk´anjel yot´an.