6 ¹ Latamanin xalak Israel lhawakgolh tuku nilhan nak xlakatin Puchina chu xla kamakamastalh nak xmakankan madianitas akgtujun kata. ² Xlilhiwakga Madian lulakgslakglhi Israel. Wa xpalakata Madian israelitas lhawakgolh xtatsekgnikan nak kgestin sipi, xakalhukun chiwix chu alakatanu niku lhan xtatsejkgan. ³ Ankgalhin xtitaxtuy pi akxni israelitas xchankgoy xtamakgalanankan, wa madianitas chu amalecitas chu latamanin tiku xminkgoyacha niku taxtuyacha chichini xkalakatokakgoy israelitas. ⁴ Xlakan xwalikgoy xmakgtakgalhnanin nak tiyat chu xlakan xmasputukgoy tamakgalat, putum nak tiji nikuma chan nak Gaza. Ni xmakgxtajkgoy taway nak Israel, ni kgalhnilo, nani xmakgxtajkgoy wakax chu axnu. ⁵ Xankgalh lata xlakan chu xwakaxkan chu ka-aktsu chiki nuku xlakgtankuwikgoy xtokakgoyacha, xlakan xminkgoy la akgtum lu lhuwa xtuki, chu nila xkapulhakgakan latamanin chu xtakgalhinkan nikuma xkamakukiy. Xlakan akglakgawa laktanukgolh tiyat xpalakata namalakgsputukgoy. ⁶ Madian snun kamalakgxnakgalh israelitas, wa chu uma chuna xpalakata Israel lakatasanikgolh Puchina. ⁷ Lata xpulataman Israel lakatasanikgolh Puchina wa xpalakata Madian, ⁸ Puchina malakgachalh chatum xakgchiwina nak xpulataman Israel. Wa akgchiwina kawanilh: ''Wa uma tuku Puchina, wa xDios Israel wan: Ktamakxtuchan nak Egipto, katamakxtuchan nak xatachin chiki. ⁹ Klakgmaxtun nak xmakankan egipcios, chu nak xmakankan putum tiku lu snun xlakgslakgan. Jkamapanunin kmilakantikan chu wixin jkamakamaxkin xtiyatkan. ¹⁰ Akit kwanin: akit min Puchina min Dios; akit klimapakgsin ni nalakgachixkuiya xpuchinakan amorreos, nak jkatiyatni niku wix lapat.'' Chu wix ni makgantaxtunita kin tachiwin. ¹¹ Lauku wa xmakatsinina xalak akgapun Puchina milh chu tolalh nak xtampin lanka kiwi nak Ofra, nikuma xla xwanit Joas (xla Abiezer) chu xla Gedeon, xkgawasa Joas, xkamapapitsima xtrigo chu xkalakchikima nak jkatiyatni, anta niku xlakan xlakchantakgoy uva nikuma xlitlawakan vino, nikuma xkamatsekgnanikgoy madianitas. ¹² Wa xmakatsinina xalak akgapun Puchina tasiyanilh chu xla wanilh: ''¡Puchina wix tawilan, lulhiwekge ti katsi talalhawanan!'' ¹³ Gedeon kgalhtinalh, ''Kin Puchina; pi wa Puchina kinkatawilan, ¿Wanchu chuna la uma kinkakgspulananitan? ¿Niku wi putum tuku luxlilakgatit xtamasiy tuku xla lhawanit, wa amakgolh nukuma kintikukan kinkalitachiwinankgon, lata xlakan kinkawanikgon, '¿ni kin katamakxtun Puchina nak Egipto?' Chu la uku Puchina kinkakgxtakgwalin chu kinkamakamastan nak xmakankan Madián.'' ¹⁴ Puchina lakaukxilhli chu wanilh: ''Kapit nak mililhiwegue nikuma kgalhiyata. Kalakgmaxtu Israle nak xmakan Madian. ¿Ni akit klimapakgsinitan?'' ¹⁵ Gedeón kgalhtilh, ''kalhawa lilhan Puchina, ¿Nikunlha akit lhan nak lakgmaxtuy Israel? Akxilha, kilitalakgapasni ni xalakglhiwakga nak Manasés, chu akin nitu kiliakxilhkan nak xchik kin tiku.'' ¹⁶ v Puchina wanilh, ''Akit naktatolayan, chu wix nakamakgalhajaya xmakgtakgalhnanin madianita la chatum chixku.'' ¹⁷ Gedeon wanilh, ''chu pi wix kilaksakpat, kakimaxki akgtum tamasiy nima nakliukxa piwa wix kixakgalhipat. ¹⁸ Kalhawa lilhan, nina kapit, naktaspitparay chu nak liminiyan tatain chu nakmaxkiyan.'' Puchina wa, ''Akit najkgalhkgalhi lata wix natamparaya.'' ¹⁹ Gedeon alh chu kaxlhawalh tantum kgalhnilo chu likaxlhawalh akgtum nuku xtujuy papuxamatiy harina, chu kaxlhawalh kaxtilanchu nukuma ni xkgalhi xlimastakan. Xla walilh liway nak jkgaxi, chu walilh xchuchut liway nak xputujun chu kaliminilh anta nak xtampin lanka kiwi, chu lakatiyawalh. ²⁰ Wa makatsina xalak akgapun xla Puchina wanilh: ''Kachapa liway chu kaxtilanchu nikuma ni kalhiy xlimastakan chu kakawili xakgspun uma chixix, chu kakakmawakani xchuchut liway.'' Chu Gedeon chuna lhawalh.