Kappitulo 1

1 Santiago, moso ri Rioso i ri Ño Jesukristo, saluro a to má jende kreyente endi mundo. 2 Numano mi tené chuchumeko si kuandi a ta endi tiembo kaiko nú, 3 sabiendo ke e prueba ri fe si a ta tree resistensia. 4 Rejá ke resistensia a kompletá obra si, pa ke sendá kompletamende mauro, i nú fattá endi niggú kusa. 5 poro si aggún ri enú a nesesitá sabiduría, pirí a Rioso pokke Éle sendá ke polé ndá é kusa nú má, sin chitiá ná a tó aké ke a ta pirí i Rioso a tan ndaló. 6 Poro pirí kú fe, sin dudá, pokke aké ke a tá dudá sendá kumo ola endi mar ke a tá jalá po biento ri un lao a uto. 7 Poro e jende nú polé pensá ke a tá resibí kusa ri ño, 8 e ombe ri bilingó animo, nú tá seguro ri to kaddume si. 9 Numano ke sendá kusobé i umilde ten ke ngloriase endi kopito ri posisió sí, 10 miendla numano galipotano endi umildá pokke e tan lungá kumo flor salbaje lungá endi monde. 11 Ntangu se lebandá kú kaló i kutú, se seká la ierba i kae fló endi tiela i ta pelé resanji si. Ri memo manera ke má jende galipotano pelé miendla asé kusa ri ané. 12 Bendesido sendá e ombe kiene aguandá kuandi prueba miní, pokke repué ri pasá pasá, ombe a kujé korana ri mbila, ke a sé konsagraro a kiene sentí gongorokó pó Rioso. 13 Narie chitiá nú kuandi e tentao: "Ke sendá tentao po Rioso", pokke Rios nú sé tentá a narie pa sé mal. 14 To gende sendá tentao po reseo nú kaiko ke a tree i a yebaló fuela. 15 Antose repué, pensá e deseo impuros, pekaro nasé i repué ke pekaro kresé a lungá. 16 Nu nbilé, numano mí. 17 To regalo kaiko a sé miní ri ariba, pó Tatá Rioso. Rioso a kambiá nú. 18 Rioso nda suto mbila po palabra ri belá belá, pa ke suto se kumo primó moná. 19 Enú kunosé eto, numano amado. to ombe ten ke se kuko pa kuchá, koto pa chitiá i koto pá choká, 20 pué enchicha ri ombe nú makania endi juttusia ri Rioso. 21 Po tando, ansusú to kutío pekaminoso i mal ke a ta endi patte i resibí palabra ke a tá chitialo ku umildá, ke asé siribí pa sabbá alma si. 22 Oberesé palabra si, nú kuchá nú má, i nú nbilé enú memo. 23 Si agguno kuchá palabra i nú asé ná a sé kumo ombe miná kala ri éle endi espejo. 24 Éle miná kala si, i a bae i tan obbirá kumo a sendá. 25 Poro má jende miná endi lei perfetta, má libettad i siguí pa oberesé, nú obbidá, ombe a se bendesiro a lo ke kusa asé. 26 Si aggún pensá endi si memo ke sendá religioso, poro nú sefrená lengua si, éle a sé nbilé kolasó sí i religión si sendá tapujo. 27 Religión pura polé kabá nú ri lande ri Rioso i Tatá sendá: ayulá juefano i biura endi akongojamiento si i kundilo ri korrupsió ri mundo