¹ Santiago, moso ri Rioso i ri Ño Jesukristo, saluro a to má jende kreyente endi mundo. ² Numano mi tené chuchumeko si kuandi a ta endi tiembo kaiko nú, ³ sabiendo ke e prueba ri fe si a ta tree resistensia. ⁴ Rejá ke resistensia a kompletá obra si, pa ke sendá kompletamende mauro, i nú fattá endi niggú kusa. ⁵ poro si aggún ri enú a nesesitá sabiduría, pirí a Rioso pokke Éle sendá ke polé ndá é kusa nú má, sin chitiá ná a tó aké ke a ta pirí i Rioso a tan ndaló. ⁶ Poro pirí kú fe, sin dudá, pokke aké ke a tá dudá sendá kumo ola endi mar ke a tá jalá po biento ri un lao a uto. ⁷ Poro e jende nú polé pensá ke a tá resibí kusa ri ño, ⁸ e ombe ri bilingó animo, nú tá seguro ri to kaddume si. ⁹ Numano ke sendá kusobé i umilde ten ke ngloriase endi kopito ri posisió sí, ¹⁰ miendla numano galipotano endi umildá pokke e tan lungá kumo flor salbaje lungá endi monde. ¹¹ Ntangu se lebandá kú kaló i kutú, se seká la ierba i kae fló endi tiela i ta pelé resanji si. Ri memo manera ke má jende galipotano pelé miendla asé kusa ri ané. ¹² Bendesido sendá e ombe kiene aguandá kuandi prueba miní, pokke repué ri pasá pasá, ombe a kujé korana ri mbila, ke a sé konsagraro a kiene sentí gongorokó pó Rioso. ¹³ Narie chitiá nú kuandi e tentao: "Ke sendá tentao po Rioso", pokke Rios nú sé tentá a narie pa sé mal. ¹⁴ To gende sendá tentao po reseo nú kaiko ke a tree i a yebaló fuela. ¹⁵ Antose repué, pensá e deseo impuros, pekaro nasé i repué ke pekaro kresé a lungá. ¹⁶ Nu nbilé, numano mí. ¹⁷ To regalo kaiko a sé miní ri ariba, pó Tatá Rioso. Rioso a kambiá nú. ¹⁸ Rioso nda suto mbila po palabra ri belá belá, pa ke suto se kumo primó moná. ¹⁹ Enú kunosé eto, numano amado. to ombe ten ke se kuko pa kuchá, koto pa chitiá i koto pá choká, ²⁰ pué enchicha ri ombe nú makania endi juttusia ri Rioso. ²¹ Po tando, ansusú to kutío pekaminoso i mal ke a ta endi patte i resibí palabra ke a tá chitialo ku umildá, ke asé siribí pa sabbá alma si. ²² Oberesé palabra si, nú kuchá nú má, i nú nbilé enú memo. ²³ Si agguno kuchá palabra i nú asé ná a sé kumo ombe miná kala ri éle endi espejo. ²⁴ Éle miná kala si, i a bae i tan obbirá kumo a sendá. ²⁵ Poro má jende miná endi lei perfetta, má libettad i siguí pa oberesé, nú obbidá, ombe a se bendesiro a lo ke kusa asé. ²⁶ Si aggún pensá endi si memo ke sendá religioso, poro nú sefrená lengua si, éle a sé nbilé kolasó sí i religión si sendá tapujo. ²⁷ Religión pura polé kabá nú ri lande ri Rioso i Tatá sendá: ayulá juefano i biura endi akongojamiento si i kundilo ri korrupsió ri mundo