¹ O'catoinä ruhuotö Jordan tö'cö ka̧cu̧tö̧'i̧nä̧, möä'quiyönä ka̧cu̧tö̧'i̧nä̧, meje'quiyönä'inä ka̧cu̧tö̧'inä, dubora Mediterraneo tö'cöcu ka̧cu̧tö̧'inä, Libanocu̧ ka̧cu̧tö̧'inä, Hititatö'inä, Amorreotöinä, Cananeotö'inä, Ferezeotö'inä, Heveotö'inä ja̧hua̧ta̧nö̧ jebeotö'inä, ² esecuinätödo ya̧tȩ hue'anätä̧ Josuerö'inä, Israel ttö̧ja̧rö̧nä̧ curä töröhuacua'a pä'ö. ³ Gabaon ttö̧ja̧ Josue Jericonä'inä, Hainä'inä jȩ'ä̧ji̧ ä̧ji̧cuä̧'cotömä, ⁴ yapare jitähua pä'ö amöcuädinätö̧. Huȩnȩ ȩcuä̧ ttö̧ja̧ a̧cua̧rönä̧ jȩpi̧nä̧tö̧do. Pö̧ja̧ti̧yö̧ tabo jäcuä sacuyö jȩti̧nä̧yö̧nä̧ burrutönä cuä̧ni̧nä̧tö̧. Vino ocha hua'atö ku̧nä̧huä̧ täbo oba'inä ȩpi̧nä̧tö̧. ⁵ Tti̧jȩpö̧ isäya'inä täbo isäyä ttö̧jä̧pö̧nä̧ nö'cätötä nö'cätäcuahua'a kö̧näcui̧nä̧tö̧, tä̧rȩti̧yö̧'i̧nä̧ täbo jö̧, 'quȩrä̧yö̧'i̧nä̧ 'quȩrä̧yö̧ ca̧tä̧hui̧nä̧tö̧. Tu̧cuä̧ pa̧ o̧pä̧'i̧nä̧ temöchina'ado. ⁶ Jahuätömä Josue i̧jo̧mȩ Gilga'acu 'chi̧nä̧tö̧, ja̧u̧rö̧'i̧nä̧ Israel ttö̧ja̧ u̧mä̧tö̧rö̧'i̧nä̧ pä'inätö̧: "ujutumä ko̧ro̧jä̧ rȩjȩra̧tö̧ ichäjätöjä̧ otoa abottö, ja̧hua̧nö̧ ja̧'a̧ttö̧ jitämä ujutucu esecuatucu." ⁷ Israel ttö̧ja̧ u̧mä̧tö̧ Hitita ttö̧ja̧rö̧ pä'inätö̧: " penetä̧ tö'cö kä̧tö̧jä̧cua̧ra̧'a̧. ¿tocu jȩpö̧ tesecua'a ucutucumä?" ⁸ jahuätömä Josuerö pä̧ti̧nä̧ö̧: "cumuyäcuotöjä̧ ujutumä". Josuemä jä'epö ä̧ju̧cui̧nä̧ö̧: ¿Ti tö cuotö cuätöcua'a ttö̧?¿To ttö cuiyäjä töcua'a ttö̧? ⁹ jahuätömä pättinäö̧: pitu cumuhuäyotömä ko̧ro̧jä̧ rȩjȩ oto'abottö i'chäjätö po jobö, ucu Cu̧ru̧hua̧ Dios i̧mi̧ jäcuänä. Ja̧u̧ ötö'cö huȩnȩ ä̧ji̧cuä̧jä̧tö̧jä̧ ja̧hua̧ta̧nö̧ Egipto rȩjȩra̧ttö̧ jȩ'ä̧ji̧'inä; amorreo röhuotö ta̧ju̧rö̧ jȩä̧ji̧ ¹⁰ o'ca juiyönä a̧ju̧cui̧nä̧tö̧jä̧ Jordan ya̧nä̧ya̧'a̧ ttö̧, Sehón Hesbon rö̧hua̧rö̧'inä, Og Basán rö̧hua̧, Astarotnä kä̧jä̧ji̧rö̧'i̧nä̧. ¹¹ Böäsotö'inä, o'ca toinä ti̧rȩjä̧ ötahuiyä ttö̧ja̧'inä pa̧'a̧nö̧ pä̧ttä̧jö̧ jä̧: "Mä̧nä̧ttö̧ cu̧cuä̧tö̧cuä̧cuä̧ ȩpä̧tö̧cui̧ cu̧mu̧tö̧cu̧nä̧. Jacuätörö topö pa̧'a̧nö̧ päcuätöcuajá:"ujutumä cumuhuäyotöjä̧ ji̧yȩtȩ ppä'ätö kä̧cuä̧hua̧ jepä̧tö̧cui̧ ujutucu". ¹² Pi̧ppä̧ ja̧'a̧ ujutu tu̧cuä̧ pa̧ppa̧mä̧, tu'äppä̧ chottötä tojusodera̧ttö̧ pocu rätopäji mo̧ro̧ tȩmȩnö̧mä̧. Ja̧hua̧nö̧ ja̧'a̧nä̧ jitämä temöchayaja'a topi. ¹³ Pi̧yȩ vino ocha hua'atö ku̧nä̧huä̧nä̧ tö'carenömä obamä adihuäji, jitämä diäcuäji obatä topi. Tä̧rȩti̧chö̧'i̧nä̧, tö̧jä̧pö̧ isaya'inä täcu täbo jocha'a otottö tiya ja̧'a̧ttö̧. ¹⁴ Israel ttö̧ja̧mä̧ Diosrö'inä jä'epö ä̧ju̧cuä̧cuä̧huä̧ juiyönä, ttö̧cuä̧ ttö̧jö̧nä̧rö̧ttö̧ ji̧yȩcu̧nä̧ ȩmi̧nä̧tö̧. ¹⁵ Josuemä rohuäcuähuä juiyönä ttö̧ja̧ pä'ö'inä, ppä'ädäcuäcu ttö̧ja̧ pä'ö'inä esecuinödo, cuä'ötticuiya'atö pä'ö. Ötahuiyä ttö̧ja̧ uruhuotö'inä ppä'ädäcuäcu ttö̧ja̧ pä'ö esecuinätödo. ¹⁶ Isarael ttö̧ja̧ jahuätöcu ppä'ädäcuäcu ttö̧ja̧ pä'ö ttesecue'cattö huäbodäcuä mo̧ro̧ 'cuäope'ca, huo̧juä̧yi̧'i̧nä̧tö̧ ttö̧ja̧cuo̧mȩ tö'cö ka̧cuä̧tö pä'ö. ¹⁷ Ja̧hua̧nö̧ ja̧'a̧ttö̧mä̧ Israel ttöja̧mä̧ huäbodäcuä mo̧ro̧ jä̧ji̧'cä̧ yi̧nä̧tö̧ jahuätö ttidepiyöra̧'a̧. Ttidepiyömä Gabon'inä, Cafira'inä, Beerot'inä ja̧hua̧ta̧nö̧ Quiriat Jearim'inä ji̧na̧'a̧. ¹⁸ Ttö̧ja̧ ttöröhuotö Ttö̧rö̧hua̧, Israel Tö̧ä̧nä̧hua̧ Dios i̧mi̧nä̧ pä'ö ttesecua ja̧'a̧ttö̧ Israel ttö̧ja̧mä̧ jahuätöcumä rohuähuocotö pinätödo. O'cato'inä Israel ttö̧ja̧mä̧ ttöröhuotörö suronä huirähuinätödo. ¹⁹ Ja̧hua̧nö̧ ja̧'a̧nä̧ o'catoinä̧ ttö̧ja̧ ttöröhuotömä o'cato'inä ttö̧ja̧rö̧ pä'inätö̧: ujutumä esecuäjätöjä̧ tö̧rö̧hua̧, Israel Tö̧ä̧nä̧hua̧ Dios i̧mi̧nä̧, ja̧hua̧nö̧ ja̧'a̧ttö̧ törohuäcua pä'ömä jo̧ca̧'a̧. ²⁰ pi̧yȩ jä̧cua̧'a̧ jacuätörö jȩtä̧cua̧mä̧: Tta̧tä̧rä̧cuä̧huä̧cua̧'a̧nö̧ Dios i̧mi̧nä̧ pätäji jäcuänä ro̧ȩcuä̧ 'cuäopacu ujuturö, ttö̧ja̧'a̧nä̧tä̧ ja̧'a̧tä̧ totätöcuatö. ²¹ Ttö̧ja̧ ttöröhuotömä ttahuäröhuärö pä'inätö̧: "ttö̧ja̧'a̧nä̧tä̧ ja̧'a̧tä̧ totatö." Ja̧hua̧nö̧ ja̧'a̧mä̧ Gabonitatö̧mä̧ o'catoinä Israel ttö̧ja̧ ttö̧to̧mi̧ ȩmä̧huä̧ tö̧ja̧ pä'iönä̧'i̧nä̧, ajiya huähuä tö̧ja̧ pä'iönä̧'i̧nä̧ ka̧cui̧pi̧nä̧tö̧, töröhuotö jahuätörö pädäji ta'nö. ²² Josuemä huopäji'ca̧ pä̧i̧nä̧ö̧: "¿tocu ja̧'a̧ yapare jicuähuätöcua'attö̧ pa̧'a̧nö̧mä: ujutumä porötömä oto'abottö i'chäjätö pä'ömä, ttö̧ja̧cuo̧mȩttö̧mä̧ tö'cö ka̧cuä̧tö̧ kä̧nö̧mä̧? ²³ Pa̧'a̧nö̧ ja̧'a̧ttö̧ jitamä, suronä pä'äcutöjä, ucutöttö recuätömä huettö jȩä̧cuä̧ ttö̧ja̧ cui̧jä̧cuo̧tö̧jä̧, ttö̧to̧mi̧ ȩmä̧huä̧ tö̧ja̧tä̧, chi̧ä̧nä̧huä̧ Dios ojusode ajiya huähuä tö̧ja̧tä̧ cui̧jä̧cuo̧tö̧jä̧. ²⁴ Jahuätömä adätinätödo Josuerö: "cuö̧mö̧huä̧ya̧tö̧cu̧rö̧mä̧ jiähuinätö̧ Cu̧rö̧hua̧ Diosmä, u̧mö̧huä̧ya̧ Moiserömä pi̧jä̧ rȩjȩ jä̧tä̧yä̧jä̧ iya'a pä'ö hueinö, ja̧hua̧ta̧nö̧ pi̧jä̧ rȩjȩnä̧ ka̧cuä̧tö̧rö̧'i̧nä̧ o'catoinärö̧ siepö icua'a pä'ö, ja̧hua̧nö̧ ja̧'a̧ttö̧ ye'ecuinätö̧jä̧ toteacu pä'ö ucu jäcuänä. ²⁵ Jitä topi, curöhuo jacuätä kä̧tö̧jä̧. Korojueö ucurötä adiu jö̧ tocumä hueitö, jȩpi̧. ²⁶ Ja̧hua̧nö̧ ja̧'a̧mä̧ Josuemä jahuätörömä pa̧'a̧nö̧ jȩpi̧nö̧do: Israel ttö̧ja̧ huettanätä̧ ttö̧ja̧ pä'ötä hueinäö̧, ja̧hua̧nö̧ ja̧'a̧ttö̧ cuäötti̧cuo̧co̧'ö̧ pinätödo. ²⁷ Ja̧nö̧ mo̧ro̧mä̧ Josuemä gabaonita ttö̧ja̧rö̧ma̧ ttö̧to̧mi̧ ȩmä̧huä̧ tö̧ja̧ pä'iönä'inä, utahuiyä ttö̧jä̧'i̧nä, Tu̧ru̧hua̧rö̧ iyähuome'inä ajiya huähuä tö̧ja̧ pä'iönä hueinäö̧do, jitä mo̧ro̧ jöbö, Tu̧ru̧hua̧ pä̧tȩtö̧ u̧ju̧ni̧no̧mȩtä̧.