¹ Daud si rimunding ampit se ma’aka-aka ne pasukan esa nga riwu wo se pasukan esa nga atus wo ampit em baya ne pamuka-muka. ² Lumila’ mouw si Daud wia se minapekasa jema’ah Israel: “Sa kouw mapokeiyla e le’os wo sa i kepa’arla ni TUHAN, Empung ta, le’osouw kita rumeo tou wia se patuari-patuari ta se maena’pe’ waki daerah-daerah ne tou Israel, wo tampasla e ni’itu wia em baya ne imam wo se tou-tou Lewi se witu eng kota-kota linedong en tana’ perawiran nea, rio sea merur wia nikita. ³ Wo e le’osouw kita sumoro’la en tabut ni Empung ta lumaa waki tampa ta, karengan witu en zaman ni Saul kita reiy’ minadungla nyi’a.” ⁴ Takar se minapekasa jama’ah i ti’i se limila’, kaa nisea se laa sumiwo en tuana, karengan e nusul i ti’i ni’i papokeiyla le’os ne pakasa’an bangsa i ti’i. ⁵ O laa si Daud si minerurla em baya se tou Israel waki so’oso’an Sikhor waki Mesir i ka’ayome waki lalan matorome eng Hamat, kaa laa mesesungkulela en tabut ni Empung waki Kiryat-Yearim. ⁶ O laa si Daud wo se pakasa’an tou Israel se minae waki Baala, waki Kiryat-Yearim, e neiy i kaghorem wilayah Yehuda, kaa laa ma’ateri maname en tabut ni Empung, en tinotor ampit e ngaran ni TUHAN si rimuber witu natas eng kerubim. ⁷ Nisea se simereti en tabut ni Empung i ti’i witu eng gorem eng kareta weru waki wale ni Abinadab, kasuatan si Uza wo si Ahyo nu minalime eng kareta i ti’i . ⁸ Daud wo se minapekasa tou Israel se mengengke-ngengket witu en sinaru ni Empung ampit eng kaente’an eng keter, pateperen eng kekantaren, kecapi, gambus, rebana, ceracap wo e nafiri. ⁹ Katoroan sea nu i ka’ayola waki tampa pasirian ni Kidon, takar si Usa si rimenetla e lawasna o tumiboy en tabut i ti’i, karengan se sapi-sapi iti’i se neiy i kare’esok. ¹⁰ Takar tumo’orouw e nupi’ ni TUHAN witu si Uza, laa o Sia munu’la nisia eng karengan si Uza si rimenetola e lawasna witu en tabut i ti’i; nisia si minate maname witu en sinaru ni Empung. ¹¹ Daud si mineupi’, karengan si TUHAN si simearola si Uza tuana eng kahebatna; takar en tampa i ti’i em patotoren ne tou Peres-Uza i ka’ayomi en teakan. ¹² Witu e nedo ni’itu si Daud si mineide’ wia si Empung, laa o pokeiyna: “Kumura ku’a re’en aku toro mali en tabut ni Empung i ti’i mea waki tampaku?” ¹³ Kaa ni’itu si Daud si so’o mesesoro’la en tabut i ti’i mea waki tampana, mea waki kota Daud, ta’an si Daud si sime’epang wo minali nyi’a mea waki wale ni Obed-Edom, tou eng Gat i ti’i. ¹⁴ Telu nga sumedot eng keurena en tabut ni Empung i ti’i minena’ witu se me’urang ni Obed-Edom waki wale nea wo si TUHAN si minerkatla se me’urang ni Obed-Edom wo e reiy’ sa mina’asa kapunya’anna.