¹ Patuari waya, nikau waya makailek, ka nikau minai wia nikau pailaan ndaai si kaara'an taan kaaraan karengan. ² Maan taintu nikai minendamong, kapeendisan, tanu kailekan niu, pa weewelen wo paseseroan nea witu Pilipi, wo nikai wewehan kaberanian tung gorem ni Empung masikita Ninjil ni Empung wia nikau, witu nuner ne tou masaru. ³ Ka tuturu nai ndaai witu lewo o mai, ndaai kahai pailaan ndaai ulit kaapa si melok. ⁴ Taan, tanu nikai tinuru umong ni Empung, mapercaya ninjil, taintukan kahai kai maila; ndaai masesenang se tou, taan nikai masesenang si Empung si mauji nate nai. ⁵ Nikai kai raai minai minali temei mengila-ngila, maalur nikau, tanu kailekan niu, kaapa mahalimei mawewehe sapa-sapa wia nikai, kaapa nikai makiwehe sapa wia nikau. Si Empung si minamuali sairi nai. ⁶ Nikai kahai, kai raai masero lolooren, wase tou, lolooren wia nikau kaapa tou walina, maane kai minamuali'mong rasul-rasul ni Kristus, nikai toro tumuntut niitu. Wia nikau. ⁷ Pasui mei, nikai minai kaampit kaleosan, wia nikau, tanu si mama maurus wo masesela se oki-oki na sandiri. ⁸ Niitumong witu gorem nupus wo leos sela wia nikau, nikai paar mawewehe nikau, ndaate ninjil ni Empung, taai kinaampit penou-nouan nai te, ka nikau, kau kiwehean nupus nai. ⁹ Ka nyaai toro genangen niu, patuari waya, pakasaan paayangen wuter nai, kumura nikai mapaayang nendo wo weng rior nikai raai mamuali kawuteran wia nikau, witu nikai mawehe nahabar ninjil ni Empung nikau. ¹⁰ Nikau waya minamuali sairi-sairi, kaampit si Empung si suci karengan, ulit wo si raai wana si kasumelokan, nikau toro tumou wia nantara niu tou mapercaya. ¹¹ Tanu kailekan niu, nikai mangeenge, mahibur, mareho nikau esa wo si esa, tanu si papa witu si oki-oki ina sandiri. ¹² Rior nikau, penou-nouan niu, makiit kapaaran ni Empung, si timowa nikau muntep witu karajaan wo kamulyaan Na sandiri. ¹³ Nikai kahai maila temako syukur witu si Empung, witu pakasaan nyaai, ka witu nikai makaindo firman ni Empung, lininga niumong wia nikai, kinalingan niumong waya ndaai paila ni tou, taan nulitena niitu waya nyai lila ni Empung, si mailaame wia nantara niu, tou-tou mapercaya. ¹⁴ Patuari waya, nikau minamuali mong tou-tou pakiitan ne jemaat-jemaat ni Empung tunggorem ni Kristus siwitume Yudea. Ka nikau kahai kau minendamo mei kasusaan masuat, witu setou-tou kawanua kan, tanu pinendam nea mei witu se tou-tou Yahudi. ¹⁵ Se mi nunu' si Empung Yesus kaampit se nabi-nabi, kaampit nisea mahure nikai. Nisea se raai masesenang si Empung, sea paarete mamuali musu wia pakasaan setou. ¹⁶ Nisea se mahape nikai, mako malilila witu setou-tou raai Yahudi, rior nisea toro kalempot. Taintumong nisea paar mawuwuta ndosa nea, taan rangu timumpa momei, tu natas nea wuta karengan. ¹⁷ Patuari waya, ndaai te ure, nikai sumeengketei wia nikau, nawak nai te ndaai si mukur nai, nikai malelo karengan wo paar mahilekan o nikau waya. ¹⁸ Ka nikai paar mai wia nikau, nyaku temei Paulus, woomong minakapira, taan se iblis-iblis se mahape nikai. ¹⁹ Ka sei si minamuali, paarapen, kapaa-paaren, kaapa makota paasa-asaren, nai tu sinaru ni Empung, witu nisia si mangemong mai? Ndaai reen nikau waya? ²⁰ Nikau mong waya si minamuali paasa-asaren wo kapaa-paaren nai.