CHAKRAMANG ISU KRISTA BAPTISMA HAI CHAINGRA ¹ . Thurai Chapa Isu Krista Satang iung arik uown mih dow. ² . Risi Isai chabowih kowi, “Mü diah, ang chintak mih en pur kowi ang uang chin khai; Aiah mat dow en tiama na kamrüt kown . ³ . Süngrüp süngkang ma kowi lowkia mih hawk klow dow , Enni mih CHAKRAMANG tiama thawp diah ;aia na mang lah kown mih tiama ateng ma thawp büah diah ‘’. ⁴ Baptisma chang mih Johan dow angak nalawtla kown tarip hanow Baptisma nachang kownkow mih laiklow süngrüp süngka makowi uang tek khei. ⁵ Judai prentowng namtowng kowi kowh maru hai Jerusalem kua kowi kowh maru maiow dow aia mat tute uang büah bowk khai. ⁶ Nami Johan dow ,ut pawi uan khup khai ; chakpik kekam hai kam ke khai, plawng hai kuaitui mih dow chah khai. ⁷ Aiah krawi phuang mih dow, “Ang lake kow lang kri rowt mih ang kung kowi na uang kown chekhai ; ang mih dow mumah se aia phanaih khawk leng lat pe kown mih ngam dow ang iung lahawm dowi tham”. ⁸ “Ang dow tui hai chang enni baptisma khai , natarap chedow Aia mat dow Lümla Sai hai na chang ⁹ Nami khe dow Isu Galili kowi kow Nazaret marow hownia dow uang khai, Jordan awh enni baptis kown” pa dow tek khai. kowi Johan dow hawt chang baptisah khai. ¹⁰ Tui hownia aiah awr lawt hai akrowksang mukuang mih pre bak uang phaw khai now Lümla , uatur powmiawng aia luk kowi uang iu dowm mih hawt khi khai. ¹¹ ‘’En ,ang Chapa ang lang sakrauah mih chekhai; en luk kowi lainowmma ang amrawm khai’’, Mukuang hownia uang iu pakhai. ¹² Nami khin Lümla aiah kowi dow Süngrüp Süngkang makowi chinah khai. ¹³ Nakowi dow likawm nih Setan puanrah kowi uowi khai; kaurawng ramchak dawng kowi aia tawi uowi khai, kramamuuüa aia kowi dow mingah khetah khai . ¹⁴ Now Johan kowi khümah now thawngrum lakkowi towah kung kowi Thurai Satang iung cham tek khai hanow Isu Galili pren kowi dow uang khai. ¹⁵ “Akhin dow uang na khai bowt , Thurai pren paw uang tawn khai bowt; ngakra hownia tarip büah diah hanow, Satang iung dow owm büah diah.” ¹⁶ Galili sata aw ret iawng awr mang khe Simon hai aia tainau Andrew iüa kowi dow sata a kowi pat lawkmi kowi kowh khi khai , amatni dow dam pawk mih chekhai. ¹⁷ Isu dow amatni kowi tekpe khai, “Ang kung uang tawi diah hanow, maru khümmi ang na thawp enchi kown,” pakhai. ¹⁸ Amatchih dow tatow lah hüa hanow, amatchih dow tawi hing tawi iüa khai. ¹⁹ Now hai rik mang ditchah hanow , Zebedai chah ,Jakop hai Johan iüah tainau kowi dow aiah kowh khi khai; lawng lakkowi sown lawk iüah chekhai. ²⁰ Amatchih kowi haw lah khai, amatchih pa Zebedai kowi dow tanga miuüa hai lawm lang kowi ta tow büah khai hanow Isu kun dow tawi büah bowk chekhai . ²¹ Now Kapernaum kua kowi kowh kup büah khai, tanai ni kowi dow takuarah kim kowi dow hing tüngsang büah khai. ²² Arih arow tüngsang miuüa powmiawng na dowi alow uowi maiawng amatni kowi tüngsangah khai, nami rakowi maru kawm dow nowm awda büah khai. ²³ Amatni Thurai chupkim kowi dow maru lowkiah mih kowi do, Lümla sürlawk plawpah khai; nami dow awr pla khai. ²⁴ “Nazaret Isu, en hai anging tatukra tawng chow uowi? En na uang mata anging kown kowh en uan mih chekhai bow? Miaiawng mih chow en na khai pami anging tuk chow; Thurai maru achim asaimami dow en na chekhai”, pakhai. ²⁵ Now Isu dow Lümla ngak kowi nangah khai, “rarimma uowi büah diah, aia kawlak hownia awr lawt diah, pakhai. ²⁶ lümla sürlawt dow aia kowi betah khai hanow, atünma pla hanow aia kawlak hownia awr lawt khai. ²⁷ Amatni bowk bowk dow lainowmma awda khai, “Mami mima tawngiawng mih ngaih chekhai chow? Tüngsangra sar na khai chaw; lümla sürlawkuüa kowi khowm pa dow alow uowima powmiawng peah ana hanow, alow pek dow chün büah khai . ²⁸ Galili prentowng kowi dow aia Satang alenma chamta uet khai. ²⁹ Takuara kim hownia dow uang lawt khai hanow, Jakop, Johan iüah hai Simon hai Andrew iüah kim pra kowi dow kowi büah khai . ³⁰ Simon masi u krau hai hawt mawk khai, Isu uang ting hai krowk sang kow tekpe khai. ³¹ Aia mat dow kowh kowi hanow, aia rut kow dowk pe hanow krüngah khai. Aia krau mih dow awr prowng khai hanow aia dow Isu hai amatni kowi khetah khai. ³² Nami iak pra, sat kup mih kung kowi dow arau uowi mih maiow hai süngnam plawpah miuüa aia tute uang pawlah büah khai. ³³ Now marow kowi kowh maru maiow dow kimplawt kowi uang büah khai. ³⁴ Aia mih dow rawka chap humami paw maru kawm kowi hawt iungah khai, now süngnam kawmma prüt tape bowk khai; süngnam hawm kowi dow pe tekah laiklow dowi, Amiaiawng mih chow pami amatni dow tuk chekhai. ³⁵ Now rau mur pah, uar thowi dowi rawn khe awr rü hanow, prang kowi lawt khai; rarimma rakowi kowkowi hanow cham chup Thurai khai. ³⁶ Simon hai aiah auiua uüa dow Isu kowi krawi chamah khai. ³⁷ Kowh khi büah hanow, “bowk bowk krawi cham en” pa büah khai. ³⁸ Aiah mih amatni kowi tekpe khai,’’ Mang akeng kowi ün, atawn chowmi kua kowiün; na ün mih kua kowi i cham tek iawlaw lah now nami rakowi ang dow uang mih chekhai.” ³⁹ Hanow Galili pren maiow amatni takuarah kim kowi kup hanow tek laiklow khai, süngnam kowi ün paw prüt khai. ⁴⁰ Aiah tute par mih uang lowkiah khai, aiah pur kowi tuakung hanow na iungah kownkowh uang lü khai. “En nauah hanow en nowngia chim sai ang kown” pakhai. ⁴¹ Aia mat dow sanaah rakowi hai dowkah khai hanow, tekpe khai, “Ang nau chow uang chim uangsai bowt diah” pakhai. ⁴² Now par rawka mih dow aia kowi plawtah hanow, uang iung khai bowt. ⁴³ Aia kowi akhawtma peah ana hanow alenma hai pa mangah khai. ⁴⁴ Now Isu tek pe mih dow, “mü diah, Mia iawng mih kowi paw hang cham tek büah diah; natarapchedow uamauüa tuke dow kowh tatüngah diah, en iung ngengche khowk pa mih na nowngia tuk la kown kowh tasia tasaumüa Mosi ana pek iawng kowh ap uan diah” pakhai . ⁴⁵ Nachenganchepaw aiamat dow prang kowi lawt hanow nami laiklow dow ahuma cham hing tek ta hüah, aiah laiklow dow cham hing tauet khai, hanow Isu dow thaulangma hai marow kowi kowh ia kup dowi, rarim raram mira kowi cham uowi khai, prentowng hownia maru uang ngamlam büah khai.