SIL DIASAR MI LAWNGUAN1
Sil tarap chedow nami khin khe paw CHAKRAMANG maruüa kowi krawi changah anowng apowng reng hai krawi paw pe asak reng chekhai, aia dow uama langkrimiuüa tut-e kalü lai mi;
2
Damaska kua bowk bowk maru uüa mi tiama kowi nachumla aia kownkow peah chasak khai, now masiuüa kachakuüa krum mi maten kowi tawmah hanow Jerusalem kowi uang pawla khai.
3
Now aia dow kakowi thüm khai, Damaska kua kating kown chabowt khe amaisang mukuang hownia uang nowi plup khai.
4
Now aia dow krawng kowi tim khai, now ta aklow mi, Sil Sil, tawngra kowi chow en chang ang anowng apowng khai chow? pakhai.
5
Now aiamat dow, CHAKRAMANG amiachow en? pakhai. Now CHAKRAMANG dow; Isu, en changah anowng apowng mi ang na chekhai pakhai.
6
Nachenganchepaw awr rü diah, hanow kua kowi kakowi diah, tawngchow chang takla mi natek en kown taih pakhai.
7
Now aia auiuauüa dow takrow kow iowng büah hüa khai. Aklow dow tawita büah chadia nachenganchepaw tawngpaw tawi khi büah dowi chekhai.
8
Now Sil dow krawng hownia awr rü khai, nachenganchepaw kü mik pache tawngpaw hing khi dowi chekhai, hanow aia auiuaüa dow bawng kowi dowklah now Damaska kua kowi pawla büah khai.
9
Now sumni mowr tawngpaw khi dowi chekhai, now matawng achak akham ün paw cha dowi chekhai.
10
Now Damaska kua kowi tüngsangmi aming Anani pami uowi lowkia, CHAKRAMANG dow ching ching mang mang mow iawng uang tekpe mi “Anani”. Aia dow, “CHAKRAMANG, mara-e chaw ang uowi” pakhai.
11
CHAKRAMANG dow tekpe mi, awr rü hanow ateng pape mi tiama iawng kakowiah diah, now Juda kim kowi tarsa marowchak maru aming Sil pami kowi kakrawi cham diah, aia dow chup Thurai thüm chekhai pakhai.
12
Sil dow ching ching mang mangma khi mi, aming Anani pami maru lowkia mi uangah now aia lukkowi uang tang pe rut khai, now aia kow mik dow kutplan khi iawk kownkowh.
13
Now Anani dow tekmi, CHAKRAMANG nami maru lawnguan akawmma maruüa hownia ang tah; nami dow Jerusalem kowi en maru achim asaima miuüa lukkowi ahuma changah anowng apowng,
14
Nami klen kowi en ming rüklau mi sarui kowi tawmla now pawla kownmi ana uama langkri miuüa tut-e kowka khai padow klangah khai.
15
Nachenganchepaw CHAKRAMANG dow tekpe mi, en kakowi diah, Jentailuüa manguüa hai Israel chauüa tut-e ang mi nacham pawla kownkow aia dow ang khowmah bowkah mi maru;
16
Aia kowi dow ang namüah kown, ang ming rakowi aia nakawm kown takla pakhai.
17
Hanow Anani dow kakowi khai, kim kowi kakowiah now aia lukkowi tangpe rutse tekpe mi, nauma Sil, CHAKRAMANG Isu en uangla mi tiama kowi en tut-e uang tatüng mi aia dow ang kowi en tut uang chin ang mi chekhai; en mik nauang kutplan thowila iawk kownkow hai lümlasai klawra iuara en nauowila kownkow pape khai.
18
Now, nami khin khe aia mik hownia dam hut dow mi iawng aia dow tatuk khai, hanow aia mik dow kutplan khi khai bowt, awr rü hanow chang Baptisma khai bowt chekhai.
DAMASKA KUA HAI JERUSALEM KOWI SIL KOW KOWI MI19
Nahanow aia dow cha chakkham ün now kakür khai. Now Damaska kua tüngsang miuüa hown uowila ani ana khai.
20
Aia dow takuara kim kowi kow kowi now Isu dow Thurai chapa nakhai pami kow tek khai.
21
Now aia laiklow tami maiowuüa da awda büah bowk khai, now tekbüah mi, nami maru Jerusalem kowi Isu lüklau miuüa kowi changah anowng apowng mi nadowi pabow? Now mami re aia uang uang mi paw Thurai maruüa kowi tawmla now uama krimiuüa tut-e pawla kown mi uan kowi chekhai pabüah khai.
22
Nachenganchepaw Sil dow pani pani kakür ngamlam khai, now krista dow naching pami phuang reng chekhai. Now Damaska kowi kow uowimi Judauüa kowi dow naklangah kown mi tia hing thawppe dowi chekhai.
23
Now ahuma khowk ni ün dow rawn, Judauüa dow aia kowi nakowngtah kown mi tatowng tapang khai.
24
Nachenganchepaw Sil dow maru krimah pami tuk khai now, nakowngta kownka ni ni uar uar tapplawt kowi hawt pawmah büah khai.
25
Nachenganchepaw aia tapeuüa dow aia kowi tap tawngpawk iawng be hown iu klaah büah khai.
26
Now Sil mi Jerusalem kowi kowting now tapeuüa hown tawi tabawng kown mi nau chadiah, nachenganchepaw aia kowi dow kramah bowk khai, tüngsang mi tawina khai bowt pami owmah büah dowi rakowi.
27
Barnaba mi dow aia bawng dowkah now tapeuüa tut-e pawla khai, now tiamarawng kowi CHAKRAMANG kowi aia khi mi hai taklowp taklang mi krang ün, Dameska kowi Isu ming hown sak kraing ma hown tek laiklow mi ün.Naiawng ün bowk bowk mi amatni tut-e tek pe chia pe khai.
28
Now, Sil mi dow jerusalem kowi amatni hown akatsang tawi uowi Now tawi kup tawi lawt reng khai, Now chakramang ming hown sak kraingma hown tek lai khai.
29
Now aia mi Grik lai tek mi Judauüa hown akatsang tawi talawp reng khai, Now amatni tarapche dow aia kowi na paw ta pe asak kownkowh sangkrang büah khai.
30
Now, tainauüa dow nami tabüah now Sizari kowi iu paw la büah khai bowt. hanow nami hownia Tarsa marow kowi iu chinah khai.
PETER CHANG AWDARA LUP PRECHAP MI31
Now nami khin khe Juda, Galili hai Samari riaret kowi Thurai maruüa dow khikhawt ngamlam khai, hanow CHAKRAMANG ringkaw hai lümlasai sakkhawtra hai uowi büah khai, now Thurai maru iun dow ahuma awr pawng khai bowt.
32
Now Peter dow bowk bowk ara kowi krawi len now Ludda marow kowi kow uowi mi achimasaima mi maruüa tut-e kow kowi khai.
33
Nakowi aia dow aming Aini pami maru kowi kow khi lowkia, achenglengma rakowi riatning khowk mawk.
34
Now Peter kow tekpe mi, Aini Isu krista dow paiung en khowk, awr rü diah hanow en kow phangbek tuatah diah pakhai. Now Aini dow awr rü khai.
35
Now khe Ludda hai Sarawn kowi kow uowimi maruüa bowk bowk mi dow aia kowi khi khai, now amatni dow CHAKRANG pra uang plan büah khai.
36
Now Jawppa marow kowi aming Tabitha pami maru uowi lowkia, nami ming auan dow Dawrka(Arik chah) pami chekhai.
37
Nami khin khe aia dow arau uowi khai, now kowng khai; nakowi kow maruüa amatni luah lamah büah now aluk krowng kowi iüaah büah khai.
38
Ludda dow Jawppa hown atawn chah chekhai; now Ludda kowi Peter uowimi ta büah now Peter tut-e maru preia kowi kowchinah khai, kra dowi kowi nauang kown mi krawi maah khai.
39
Now Peter dow awr rü now amatni tut-e kow tawi khai bowt, kowting hown akrowksang aluk krowng kowi dow awr pünla büah khai. Now mamaimowuüa dow aia riaret kowi iowng se kar büah khai, now Dawrka amatni tut-e uowi reng takmi khin khe kow sownla pe mi kowrma hai akeng mi uan thawpla pe mi dow Peter kowi tüngpe büah khai.
40
Now khe Peter dow amatni kowi kim uat pra kowi palawtah büah khai. Aia dow tuakung now chup Thurai khai; aia dow nami uak pra hai dang hanow tek mi tabitha awrrü diah pakhai. Hanow aia mi dow awr kü mik khai, now Peter kowi hai mü hanow awr chowm khai.
41
Now Peter dow rut hown aia kowi awr krügah khai, now owmmiuüa kowi hai mamaiuüa kowi dow hawah now sing khai bowt mi tüngpe khai.
42
Na ün mi lawnguan dow Jawppa maiow kowi tauet khai. Now maru ahuma CHAKRAMANG kowi tawi owm khai.
43
Now Peter dow akrama uan chakpik thawpmi aming Simawn pamih kim kowi uowila khai.