max_halder-mro-BD-mruchowlai_act_text

ALAWNG 28

MELITI SÜNGDUM RET KOWI ¹ Now, anging kipown kung kowi tukmi dow, nami süngdum ming dow Meliti na khai. ² Hanow, nami süngdum ra-e chenlang chaplang mami mih maru uüa dow kaneuchow anging luk kowi uang chang aiung khai; uangchak uangiu uang mih rakowi hai rualai rakowi changmaih büah hanow, bowk bowk kowi hawt howrah khai. ³ Nachenganchepaw, Pawl dow sawp pacheng kuaah hanow mai kowi kuakah khai, mai den khai bowt rakowi akru mami rua dow uanglawt hanow aia rut kowi chawtah khai. ⁴ Nakhe, chenlang chaplang mami maru uüa dow, aia rut kowikow rua tatar kawlawmi khi büah hanow, lowkia lowkia tatek büah mih, “mami maru mih cham tula maru naown kown chekhai, sata tui hownia uang nowng plawplai chepaw kawngmu mih aia kowi nasing kown mih sakih dowi mih naown kown chaw” pa büahh khai. ⁵ Nachenganchepaw, aia mat dow, rua kowi dow mai kowi iu thet ta hanow, aia matawng paw own dowi chekhai. ⁶ Nakhe, amatni tarapche dow chawngah khai, aia bau uang pün hanow pamaimasang kowng hanow krawng kowi nahing tim kown mih mingah büah khai, nachenganchepaw akrama mowr pat chawngah kung kowi aia matawng paw angak own dowi pami tuk büah khai mih khi hanow, amatni akeng iawng sak katuak hai tek khai, “aia dow süngnam pabüah khai”. ⁷ Nami ara kowi dow, nami süngdum kowikow langkri mih krawng bawnia aia ming Pubilia pren uowi khai; aia dow anging kowi hawt howr hanow sumni mowr pat apiawma pe pün hai aiung paw chang anging khai. ⁸ Nami khin khe dow, Pubilia apa krau khai murau hai phang bek kowi mawk reng rakowi hanow Pawl dow, aia tut-e kakowi hanow, aia luk kowi tangpe rut now chup pe Thurai now iungah khai. ⁹ Nami auan akrang kung kowi nami süngdum kowikow akeng mih arau uowi mih sarui dow amatni uang hanow, hawt iungah bowk khai. ¹⁰ Hanow amatni maru uüa dow lainowm ma rowsi hai sakrau anging khai; now anging naplan mang mih khin chekhai hanow anging nau ahmi uan sarui chawnlawng kowi krawi tang anging khai. MELITI HOWNIA ROM KOWI KOWTING MIH ¹¹ Now, sumla kung kowi anging Aleksendra chawnlawng lowk kowi pün now mang hai; nami chawnlawng hown nami süngdum kowi chungrau khin mow ranging uowila khai, aia lukowi anauma chaphir matlawi uowi khai. ¹² Nami kung kowi Surakus kowi awr pünla hanow nakowi dow sumni anging uowila khai. ¹³ Hanow, nahownia anging kapown hanow, Ragi lawngsip kowi kowting khai hanow, pani mih kung kowi tawngphak li uang khai, now pre ni kowi dow Puteoli marow kowi anging kowting khai iawk bowt. ¹⁴ Nami ara kowi dow, presumia tainau kowi anging khi hanow, amatni town khai rakowi ranitni amatni hown akatsang anging taiua uowi khai; naiawng hai Rawm marow pra dow anging mang iawlaw reng khai. ¹⁵ Hanow, nami arah hownia tainau uüa dow anging satang ta büah hai akrowk sang nami hownia dow, Appil chi hai pinsüa pünra mowr nauang chum anging kownkow uang khai; Pawl dow, kabüah kowi khi hanow Thurai tut-e awmrawm laiklow tek kung kowi ka sak khawtra khai bowt. ¹⁶ Now, Rawm marow kowi anging kikup kung kowi Pawl matia dow, aming-khet mi siphai uüa hai akatsang athaulangma languowi büah kown mi peah alow khai. RAWM MAROW KOWIKOW KANGCHAWNG MIUÜA HAI PAWL LAWNGUANG ¹⁷ Hanow sumni kung kowi dow, Pawl dow Juda aluchauüa mih sarui kowi kuaah lawmah khai, now amatni akatsang takua khai bowt kung kowi amatni tut-e, “sakrauah mih tainau uüalow, ang chen ang chapuüa hai Pa ri-row maiow ang piak ta dowi chengan chepaw Jerusalem hownia pawla ang now Rawm thawngrum kowi phang ang büah khai. ¹⁸ Hanow, amatni dow chet ang tara mih kung kowi dow, nakowngla pat mih ang luk kowi matawng paw angak kadowi mih rakowi nalawtta ang kown mih tuak büah khai. ¹⁹ Nachenganchepaw, Judauüa dow nami kowi kingküa khai rakowi Sizar tut-e uang ting ladowi-e ang klen dowi chekhai; nachepaw ang chenchap chawktowk müa ang chang mih nadowi chekhai. ²⁰ Naünmi rakowi dow, enni hown akatsang natatuk kown hai nataklowp taklang kownkow ang haw enni mih chekhai, tawngplawng Israeluüa sakowmah mih ang na mi rakowi mami lawngha leng krua ang mih chekhai pakhai. ²¹ Now amatni dow, aia mat kowi tekpe mi, “en lawnguan kowi Judai pren hownia chasak ünpaw anging hing kadowi; nami klen kowi tainau uüa pungma dawng kowi amia iawng mipaw mami ra-e uang hanow, en lawnguan satang uang phuang büah dowi, angak laiklow paw hing tek büah dowi. ²² Natarapche dow, en lawnguan laiklow mi en nawr hownia anging sünta kown nau; tawng palawng chow panow, arah maiow kowi nami powchak maruuüa kingküa laiklow anging ta reng chekhai. ²³ Nami kung kowi, amatni towpe kheti ni hanow, nami nikowi dow, aia pünra kim kowi aia tut-e maru kawmma uang khai; rau hownia iakpra mowr pat amatni tut-e laiklow dow phung pe khai, Thurai pren laiklow lawnguan petuk petaah hanow, Mosi ri-row laiklow hai Risiuüa chabowih laiklow hai Isu lawnguan amatni kowi depah ruah kownmi tuak khai. ²⁴ Now, matawng mih chabak aia tekah mih laiklow owm büah ne khai, matawngmi chabak dow owm büah dowi chekhai. ²⁵ Naiawng amatni pungma dawng kowi laitek taka dowi bowt rakowi powt büah iawlaw khai, powt dowi rawn khe Pawl dow tekpe laiklow lowk khai, lümlasai hai Risi Isai nawr kowi, prekche enni miuüa tut-e aia teklaiklow mih dow kaneuma na khai, ²⁶ Laiuan kowi, “mami maruuüa tut-e mih kow tek pe diah enni param hown nata hanow auan tarapche dow mapaw tuk dowi tham; now mik hown nakhi kown natarap chedow, mapaw tukdowi tham. ²⁷ Tawngplawng, nami maru uüa mi sak khawtma chekhai, na sünta lakown paran ün pangta khai, mik paw bengta büah khai, naiawng nadowi hanow amatni mik hai nakhi kown now param hai paw natah büah kown, amatni saktuak kowi na tukta büah now nauang plan büah hanow ang naiungah kown” pakhai. ²⁸ Nahanow Thurai nami lawngra laiklow mih Jentail uüa tut-e uang chinta khai bowt pami tukah büah diah; amatni dow süntapaw nasünta kown pakhai. ²⁹ - ³⁰ Hanow Pawl dow, prening tachi mowr pat aia mat lai-ah mih kim kowi kupmi sarui kowi hawt howrah khai. ³¹ Thurai pren laiklow dow tachi ma hown phuangreng khai, CHAKRAMANG Isu Krista lawnguan paw sak kraingma hown aia tüngsangah reng khai; amia paw aia kowi dow hangah dowi chekhai.