¹ Now Pawl dow tara chetmiuüa kowi dow hai müah hanow, tainauuüa low, ani kowi pat Thurai mik khi kowi aiung pra ang tukah mi sarui lup chang hai ang uowi reng chekhai pakhai. ² Nami khin khe Uama langkrimi Anani dow, aia ria kowi kow iowngmiuüa tut-e anawr kowi na phek pe kown mi peah alow khai. ³ Pawl dow nami khin khe aia tut-e, “en hua sur tap maru, Thurai na phek en kown; ari arow iawng na paw ang tara kown en chowm khai, ari arow na dowi iawng na phek ang kown alow en peah chow kow?” Pakhai. ⁴ Nami hai akrowksang aia ria kowi kow uowimi maruuüa dow, “Thurai Uama langkrimi kowi en kut plan piak pe siri tak chow kow?” Pa büah khai. ⁵ Pawl dow amatni tut-e, “tainau uüa low, aia mih Uama langkrimi na chekhai mi ang tuk dowi chekhai; en chen en chapuüa aluchah lukkowi laiklow iung dowi mi hangah diah pa paw ruiah mi chekhai rakowi pakhai.” ⁶ Now Pawl dow, matawngmi chabak Saduki matawngmi chabak Pharisaiuüa na büah khai pami uang tuk hanow, tara chetmiuüa pungma dawng kowi dow awr haw khai, “tainauuüa low, Pharisai ang na khai, Pharisai chap paw ang na chekhai; kowngmiuüa awr plan kut rü la iawk mi sakowmra laiklow kowi na lünta ang kown ang uowi khai chaw.” Pakhai. ⁷ Nami aia ki tek kung kowi dow Pharisaiuüa hai Sadukiuüa pungma dawng kowi ran uang phaw khai bowt; tara pungma dawng kowi pre powchak chowng büah khai bowt. ⁸ Sadukiuüa dow, kowngmiuüa awr plan kut rü la kown mi mapaw uowi dowi, krammamu hai lümla ngak paw mapaw hing uowi dowi; pa büah reng chekhai. Pharisaiuüa tarapche dow nami pre tia mi dow uowi pa mi owm büah chekhai. ⁹ Akraingma pat pusa büah khai bowt, Pharisaiuüa pra kowi ari arow tüngsangmi uüa matawngmi chabak tangi büah hanow, awr iowng now taran laiklow lawt büah khai, mami maru mih matawng paw angak uowi mi anging khi dowi chekhai; lümla ngak kowi chepaw, krammamu hown chepaw aia taklowp khai chenganchepaw matawngchow na nga kown chow? Pa büah khai. ¹⁰ Naiawng hai akraingma pusa büah hanow, Pawl kowi na paw ta pe asak kown pami siphai langkrimi dow kram rakowi siphaiuüa tut-e, amatni pungma dawng hownia Pawl kowi uang paw la hanow tap lakkowi kupla büah diah padow peah ana khai. ¹¹ Nami iak kowi CHAKRAMANG dow Pawl ria kowi uang iowng hanow, sak khawtma uowi diah, Jerusalem kowi ang laiklow en pa tuk pa taah iawng dow Rawm kowi paw en pa tuk pa taah kown chekhai, uang pa khai. PAWL KOWI PAW PE ASAK KOWNKOW KRIMAHMI ¹² Sat uang lawt khowk hanow Judauüa dow tatowng tapang büah hai pamatia kowi chang aprek büah khai, Pawl kowi paw tape asak dowi mowr dow matawng paw na cha dowi na kham dowi kownkow kham sawi büah khai. ¹³ Likawmia lake kawm kham sawi büah now nami lawnguan dow tatowng tapang büah khai. ¹⁴ Amatni dow Uama langkrimi hai lawngtangchah uüa tut-e kow kowi hanow, Pawl kowi anging paw ta pe asak dowi mi mowr dow matawng paw na cha na kham dowi kownkow anging kham ta sawi bowk khowk chekhai. ¹⁵ Naiawng rakowi enni mi tarachet miuüa hai lawm athawng ia powng mi siphai aluchah tut-e kow kowi büah hanow, aia lawnguan kowi lang tachih ta nawm la ngamlam lah kownkow enni tut-e iu paw la kownkow tekah büah diah; enni ria aia uangting dowi rawn khe paw anging mi aia mat kowi na paw ta pe asak kown kamrütia ma anging uowi chow, pa büah khai. ¹⁶ Nachenganchepaw Pawl tuama chapa dow amatni na pawmah kown mi lawnguan dow hawt tuk khai, tap lakkowi dow kow kup hanow, Pawl kowi kow tek pe khai. ¹⁷ Pawl dow siphai akawmia powngmi lowkia kowi hawah hanow, mami klanguüa kowi athawngia powngmi siphai aluchah tut-e kow paw la diah; aia tut-e matawng laiklow chün chü na tek kown mi uowi chekhai, pakhai. ¹⁸ Nahanow athawngia powngmi siphai aluchah mi tut-e dow kow paw la hanow, Pawl kla thawngmi haw ang khai now mami klanguüa mih en tut-e na uang paw la kownkow uang chin ang khai, en tut-e matawng mi laiklow chün chü na tek kown mi aia kow uowi khai, pakhai. ¹⁹ Now siphai athawngia powngmi aluchah dow aia rut hai dowk hanow kuk pah cham lang paw laah khai, matawng chow en na tek ang kown mi dow uowi? Padow lün taah khai. ²⁰ Aiamat dow aia tut-e, Pawl lawnguan kowi na tachi la ngamlam kownkow tharau khe tara chetra pur kowi en na uang iu paw laah kownkow Judauüa na lü en kown nauta büah bowk chekhai. ²¹ Nachenganchepaw amatni laiklow mi hang kow hawt chün pe diah, amatni pungma dawng kowi likawmia lake kawm maru hawt pawmah khai; nami uüa dow aiamat kowi paw ta pe asak dowi mowr dow matawngpaw na cha na kham dowi kownkow kham sawi büah khai, akawmatmi en laiklow chataih chawng hai kamrütia ma uowi büah reng chekhai büah, pakhai. ²² Now siphai athawngia powngmi aluchah dow klanguüa kowi dow pa powtah hanow, ma ün laiklow mih amia kowi paw na hawt patuk pataah dowi kownkow hang ta krap khai. SIZAR TUT-E PAWL KOWI PAW LAAH MI ²³ Nami kung kowi siphai akawmia powngmi preia kowi hawah hanow, iak-e taku nari mi khin khe Sizar kowi pat na kow kowi kownkow siphai prekawmia hai lawm kawrnga chowmmi ranit kawmia hai re chün mi pre kawmia hai lawm kow kamrüt büah diah pakhai. ²⁴ Now pren powngmi Felik tut-e dow matawngpaw thawngtha ramai dowi kowi enni na nowngia ting la kownkow Pawl kowi pa chowmah kown kawrnga paw hawt kamrüt pe büah diah pa paw tek pe khai. ²⁵ Now naiawng dow rui pe cha khai. ²⁶ Klaudia lusian Felik, pren powng mi kowi kow langiukmi krawi chup en chekhai. ²⁷ Mami maru mih Judauüa mi khümah hanow, na paw tape asak kown chekhai, amatni tut-e ang kow paw la pe siphaiuüa now ang kow kowi khai, Rawm maru chekhai pa mi ang tuk hanow ang lawngah tangah khai bowt. ²⁸ Amatni chawktowkah mi lawnguan na tuk la kown ang nau rakowi amatni tara chetmiuüa tut-e ang iu paw laah khai. ²⁹ Nahanow amatni kow ari arow laiklow matawng kowi chün chü chawktowkah khai pami ang tuk khai, nachenganchepaw amatni chawktowkah mi kowi dow nakowng la pat mi hai na towah thawng kown pat mi angak matawng paw ang hing tuk dowi. ³⁰ Now aiamat kowi pawmah büah pami maru uang patuk pata ang hai akrowksang en tut-e aiamat kowi ang hing chinta mi chekhai. Chawktowkah mi uüa paw aia lukkowi laiklow uowi khai mi sarui en pur kowi na uang tek la kownkow alow ang peah khai pakhai. ³¹ Nahanow siphaiuüa dow aia low iawng dow Pawl kowi nami iak kowi Antipatri kowi kow paw laah büah khai bowt. ³² Auai rau kowi dow aiamat kowi towla büah hanow kawrnga chowm mi dow plan kut lan büah now tap lak kowi kup büah khai iawk bowt. ³³ Amatni dow Sizar kowi kow ting büah hanow, pren powngmiia rut kowi chasak dow peah now Pawl kowi dow ap pe büah khai. ³⁴ Aiamat dow chasak hawt phat hanow, amia pren chak chow en? Pa dow lüntaah khai. Nami khin khe aia dow Kilikia pren chak pami hawt tukah khai. ³⁵ Nami tuk hanow pren powngmiia dow aia tut-e, chawktowk en miuüa nauang ting mi khin khe en kow laiklow mi ang na tuak kown pa khai. Nami kung kowi Herawt kim kowi na ming na khetah kown mi alow peah khai.