ALAWNG 21
JERUSALEM TIA KOWI
1
Sakprüa rau hai amatni hown taprai kung kowi akengpra cham kowi dowi bowt kowi atengma ku pamih süngdum kowi anging kowting khai, auai ni dow nahownia mangla hanow Patara kua kowi anging kowting khai.
2
Now nakowi dow Phawiniki kowi nakowi lah kown mih lawng anging kowka khai, hanow nami lawng hown dow anging planmang khai iawk.
3
Now, Kupra süngdum dow anging hai khi khai, tauai pra ria iawng anging klenla hanow, Suria pren Sur pape mih marow kowi anging kata thüp khai; na kowi dow chawnlawng kowi kow uan naklala kown mih laiklow uowi khai rakowi.
4
Hanow nakowi atape uüa kowi anging kawi cham now ranit ni mowr anging tawi uowila khai; lümla tekpe iawng dow Jerusalem kowi Pawl kowi kape kowiah dowi mih chekhai.
5
Ranit ni kung kowi dow anging plan mang khai iawk bowt, nahanow amatni dow amatni masi chuchauüa hown marow uat kowi ting pat uang tawisa anging khai, nakowi dow tuakungse anging kichup Thurai kung kowi anging taprai khai bowt.
6
Hanow lawng kowi anging pün khai now, amatni paw plan büah khai bowt.
7
Now, Turi tui tia iawng anging kimang kung kowi Patholemai pren kowi anging kowting khai; hanow tainauuüa kowi peah achup hanow amatni hown akatsang pani mih angiang tawitaiua uowi khai.
8
Auai ni nahownia anging lawt now Sizari marow kowi anging kowting khai, nakowi kowh Satangiung phuang mih Philip kowi paw anging kowkrum khai, aia dow ranitia kowi kowh lowkia nami chekhai, aia kim kowi aning tawi hing pün khai.
9
Aia kow dow chama uowi taliia, amatni dow Risi büah tekta khowk mih lai tek büah reng chekhai.
10
Now, nakowi dow akrama anging uowi kung kowi Judai hownia kowh aming Agaba pape mih risi uang tawi uowi khai.
11
Nahanow aia dow anging tut uangah hanow Pawl kow kekawm dow pawah hownow aia khawk kowi kuakah hanow tek mih, mamih kekawm ia kowi dow Judaiuüa Jerusalem kowi maiawng hai nakuak hanow Jentail maru uüa tut-e na apah kown padow Lümlasai tek khai.
12
Nami laiklow tata hanow atainau uüa dow Pawl kowi Jerusalem kowi naka kowi dowi kownkowh hangah khai.
13
Nakhowk khe Pawl dow klangah khai, matawngplawng kachow enni hing kar huluse enni pe ang sakprüa raura khai mih chow? CHAKRAMANG Isu rakowi Jerusalem kowi tatawm takia paw ang uam klen kowi nakowng kown mih khowm padow ang uam.
14
Aia dow nau sünta anging laiklow dowi, now anging paw arim aramma uowi kung kowi tek mih CHAKRAMANG low iawng pacham nalah.
15
Namih kung kowi dow kamrüt kam khawng hanow Jerusalem pra tarü khai bowt.
16
Now, Sizar hownia kow pre sumia tape paw anging tut-e uang tawi khai, amatni dow Kupra pape mih süngdum hown ia aming Masawm pape mih kowi paw uang hawlah khai; aia paw auown khe kowh tape pungma dawng kowi kowh lowkia, aia kim kowi pinsüa powmiawng nauowi kown mih laiklow uowi.
JERUSALEM KOWI PAWL KOWTING MIH
17
Jerusalem kowi kowting now tainau uüa dow a awmrawm ma hai hutpe anging achup khai.
18
Auai ni dow Jakawb kim kowi Pawl kapawla anging khai; nakowi dow lawngtang uüa paw akawmma tawi uowi khai.
19
Now, aia dow amatni kowi peah achup khai now Jentaiuüa tut-e kowh amatni changah mih lup krang dow tüngpe büah khai.
20
Mamih laiklow tahanow amatni dow kiow Thurai büah khai, now aia kowi tekpe mih, Tainau ow, en tuk tak bowk, Judai maru uüa paw matawngiawng khowt khowk owm mih uowi? Natarap chedow amatni mih ari-arow kowi kaneuma towsak büah khai.
21
En lawnguan kowi amatni dow maiawng hai ta büah khai, Jentailuüa tut-e dow amatni uowi krang chowmkrang iawng now Judai uüa tut-e tarap chedow Mosi ri-row natow ta kown mih en tüngsangah reng khai, ngeuuüa kowi khampha uanpik nahia ta dowi kownkow hai nami iawng nauowi dowi kown mih en tekpe mih ta büah khai.
22
Now, kawmat matawng chow nachang kown? En uang mih satang naphuangla pe kown bow?
23
Kawmat anging tek en iawng dow chang tai bowt diah, laikham uowi mih kachak uüa cha anging tut uowi tali ia khai.
24
Naün mih kowi laiah hanow, amatni tut-e tawita sau diah, now nakhai ta sam kownkow khowk pe tangka diah, amatni ta mih laiklow tarapche dow lainowm na dowi, en matia paw ari-arow achima en chün khai pami phuang pe diah.
25
Nachenganchepaw Jantail uüa chetah kowh owm mih tarap che dow, süngnam prasira, awkah mi vi mih chaknga hai iangchang ün mih hownia pamatia kowh langta hen kown mih tekah khai.
26
Now, Pawl dow namih presum ia hown kita sau kung kowi takuara kim kowi kow kup khai bowt, now amatni uan ap mün khowt ni dowi rawn chow tachim tasai kown mih lawnguang kowi cham krawi tüng cham krawi sang khai.
PAWL KOWI KHUMAH MIH
27
Hanow namih rinitni chur kung kowi Asia pren kowi kow tkuara kim kowi aia kowi dow maru kawm khiah hanow lainowm mow kunmarau büah khai, aia kowi dowkah hanow atünma hai tek büah mih,
28
Israel maruuüa low, uang khowng anging büah diah; mami maru mih pren towng kowi maru maiow tut-e Judai maru ün, ari-arow ün, mami kim kowi ün tek naklak mih chekhai chaw; nami klen kowi paw Thurai chup kim kowi Grik maru kowi paw kupla hanow, mami kim achim asai mami surah lawkah khai bowt, pabüah khai.
29
Tawngplang kachow panow nami dowi rawn khowk khe Ephisi marow kowi Efim kowi Pawl hown khiah khai, Pawl mih Takuara kim kowi uang pawla mih chekhai pa dow katuak büah khai.
30
Nami khin khowk khe marow kowi kowh maru hawm dow lainowm ma kunmarua khai bowt, now maru kawm dow uang iowmah hanow Pawl kowi dowkah hanow künglase prang kowi lawttaah khai bowt, now kim büng paw büngta pe büahh khai.
31
Naiawng dow nabawmta kown mih kamrüt chang büah khai, nami khin khowk khe Jerusalem kowi kowh maru maiow pusa büah khai pamih laiklow dow akawmia siphai powng mih tut-e kow ting khai bowt.
32
Now, aia dow siphai akawmia kowi kow powng mih kowi pawla hanow alenma kaiowm büah khai, now maru kawm dow Siphai hawm kowi khita hanow Pawl kowi tepah mih dow tainta büah khai.
33
Namih khin khowk khe akawmia kowi kow powng mih dow uangah hanow khumah khai, now aia tape kowi leng prebuk hown nakhuakah kown mih tekpe khai, hanow lüntaah mih, mami maru kowi matawng chow enni changah?
34
Now maru kawmma pungma dawng kowi dow matawng mih chabak dow pasang palai sang atünma haw hai teklai khai; tawksamu dow matawng iawng mih paw tukah tak dowi chekhai, naiawng ra kowi aia kowi dow arim aram mamih pra kowi napawla kown mih tek büah khai.
35
Now, Pawl dow dawng kowi ting khowk khe maru kawm uüa dow towk kür chamang towk kür khai rakowi siphai dow aia mat kowi awr krowng lah iawlaw khai;
36
Maru kawm dow kung kawi krawi iawlawse atünma hekse tek mih, aia kowi prüt takhai.
MARU KAWM UÜA KOWI PAWL TEK PE MIH
37
Amatni dow tap lak kowi Pawl kowi nakupla kown khe akawmia kowi kow langkri mih tek mih, en tut-e ang nowngia tek lai panawr kown bow? Aia tek mih, Grik lai en nowngia tek khai bow?
38
Maning naning khe kow maru kowi chükah chiaah hanow maru ngakuüa hawm tali thawng haw lai miia Aigupta pren kowi kow uowi mih en na dowi pa bow? Pakhai.
39
Nami khin khowk khe Pawl dow, ang dow Judai pren kowi kowh Tarsa marow kowi kowh Kilikia kua chak chatai, ang kowi peang alow dia maru kawm hown ang nanowngia taklangla kownkow.
40
Now, aia dow peah alow khai, Pawl dow dawng kowi iowngse lekpe rut hanow maru kawm dow rarimma uowi büah khai, aia dow amatni tut-e Hebrai lai hown klangah khai.