KRISTA POWCHAK KOWI JUDA HAI LOWRA CHENUÜA TAÜA MI KOWI RIMTAH MI1
Akung kowi Juda hownia maru uangah ne büah now tainau iüa kowi Mosi rirow iawng che khampha pik hia enni chang dowi now enni ka lawngra dowi padow uangtüng uang sangah khai.
2
Now amatni hown Pawl hai Barnaba dow taüa chamang taüa büah now arim mow uowi khai; nami taüa narimtah kownkow Pawl hai Barnaba iüa klen kowi Jerusalem kowi kow chintakmi hai lawngtangchauüa tut-e plan kut chin maru ne khai.
3
Now Antikia Thurai maruüa dow amatni kowi kow chinah khai now, Fauniki hai Samari pren iawng mang büah now Jentailuüa diasar mi lawnguan tatek büah khai; now tainau uüa maten dow lainowmma awmrawm büah khai.
4
Jerusalem kowi kowting büah khe Thurai maru hai chintakmiuüa hai lawngtang chauüa dow hawt hawah büah khai; now Thurai amatni hown kow changah mi lup maten dow hawt tekpe khai.
5
Nachenganchepaw Farisai powchak hownia kow tawi owm miuüa dow awr iownghah now tek mi; “Amatni dow khampha pik hia nachang kown mi lainowmma lake, Mosi rirow maten nachün kown mi tekpe diah pakhai.
6
Naiawng kow chintakmi hai lawngtangchauüa dow naiawng ün lawnguan natalawp kownkow arasang takua büah khai.
7
Ahuma taüa taran kung kowi Peter dow awr iowngah now tek mi; tainauüa low enni tuk khowk, akrama khowk Thurai enni pungma dawng kowi haw ang mi, ang nawr hownia Jentailuüa satangiung lai ngengche nasünta hai naowm la kownkow.
8
Bowk bowk saktuak tukmi Thurai a-i kowi pe a-i lümlasai mi iawng dow Jentailuüa kowi paw nami iawng peah lümlasai now amatni paw angak lawngra ka pami uang patuk patah i khowk chekhai.
9
Now amatni kowi anem achowng ma towah kown na dowi, owmra hai amatni satuak pachimsai ah reng lah.
10
Nahanow tawngra kowi chow kawmat enni tuk chaing Thurai khai chow? Tapeuüa lukkowi tawngra kowi chow tuk tangpe adik khai, nami kurdik prek i che i miuüa ngam padow nowng paw dowi mi;
11
Amatni owmmi iawng dow a-i paw CHAKRAMANG Isu Krista sanara hown naka lawngra kown pakhai.
12
Nami khin khe bowk bowk rarimma uowi khai. Now Barnaba hai Pawl iüa rakowi Jentailuüa tut-e amatmüa hai awdara lup tiawng ngaichow Thurai pachangah mi dow amatchi hown sünta büah khai.
13
Amatchi kow lai chur kung kowi Jakawb kutplan pe laiplan iawk mi, tainauüa low sünta;
14
Thurai aia matia ming rakowi Jentailuüa pungma dawng hownia pabak maru kowi pawah mi hai tiawngchow rik peah prasi mi dow Simion mi tek khai.
15
Now risiuüa laiklow dow aia kow laiklow hown tatuh khai arui uowi mi;
16
“Na ün mi kung kowi dow ang nauang kutplan iawk kown, piak khai bowt mi sarui paw ang na kutplan changah iawk kown;
17
Naiawng tahlat mi maru maten CHAKRAMANG kowi pacham cham lah, now amiaiawng mi chen lukkowi ang ming arük uowi mi dow amatni bowk bowk pacham cham lah.
18
Nami lailkow CHAKRAMANG tek khai achük alai hownia na ün mi lawnguan uang patuk pa ta i khowk.
19
Naiawng kow, ang kow tara dow maiawng; akeng mi chen pungma dawng hownia Thurai pra uang plan mi kowi a-i mi amatni kowi napeah akawm akrat kown nadowi.
20
Nachenganchepaw ruiah now na krawi peah kown, amatni mi arup chupra hownia asür alawkma mi ün, iang changra ün, betah now kowng ahmi asadua vi hownia dow alakma nauowi la kownkow.
21
Mosi dow achük alai hownia marow towng aia laiklow natawi tekpe kown miia uowi reng chekhai, now takuara kim towng tanaini kowi aia kow chabowih dow phatah reng khai.
JENTAILUÜA OWMMIUÜA TUT-E PHAT MÜA CHASAK22
Nami khin khe chintakmiuüa hai lawngtangchauüa Thurai maru maten ün hai lawm dow amatni powchak kowi kow ruiah mi Pawl hai Barnaba iüa kowi dow Antikiaw kowi na kow kowi kownmi nauta büah khai. Amatni ruiah miuüa ming dow Juda Barsaba pa pe mi hai Sil iüa kowi Antikiaw kowi Pawl hai Barnaba iüa hown tawi chiah kown mi tataing khai.
23
Now amatni rut kowi Antikiaw, Suria, Kilikia kowi uowi mi Jentail tainau maten tut-e chintakmi hai lawngtangchauüa iungra pa uowi la padow ruiah now krawi pe pe khai.
24
Anging tah mi, khampha pik hia rirow anging hing peah dowi mi anging pungma dawng hownia uangah ne hanow enni kowi uang pe tuakrat enni khai.
25
Naiawng rakowi anging takrüpah kow klo maru ne khai now, anging sakrauah mi Pawl hai Barnaba;
26
A-i CHAKRAMANG Isu Krista rakowi sak towsak mami kow iüa hown enni tut-e uang tawi chin kown mi dow, amatchi kowi na tataing kown pami anging katuak khai.
27
Naiawng kow Juda hai Sil iüa kowi paw uang tawi chin enni khai, na ün mi lawnguan maten natek enni kownkow.
28
Lümlasai hai naiung kown pami anging katuak, nami lawnguan klen kowi akeng mi uan kowi nape enni kurdik dowi kownkow;
29
Naiawng kow arup chup ün, betah now kowng ahmi asadua vi hai iang changra hownia dow alakma nauowi la kown mi dow enni vüi na iung kown. Enni vüi pacham iung lah.
30
Now amatni dow tapraila büah now Antikiaw kowi uang khai, now maruüa kowi arasang towah now peah chasak khai.
31
Phat büah kung kowi sakowmra laiklow nami chekhai rakowi awmrawm büah khai.
32
Now Juda hai Sil amatchi paw risi chekhai rakowi ahumma tekpe laiklow now tainauüa kowi peah sakowmra hai sak klamra khai.
33
Uowi la presum ni kung kowi amatni kowi uang chinah miuüa tut-e naplan kownkow tainauüa hown aiungma hown taprai khai.
35
Nachenganchepaw Pawl hai Barnaba iüa dow Antikiaw kowi akengmi tainauüa hown ta uowi khai, nakowi amatchi dow Thurai lai hai satangiung tek iüa khai.
PAWL PREKAT SAIUNG PHUANG36
Presum ni kung kowi Pawl tekpe Barnaba mi, Su madia achi cham tek Thurai lai mi marow maten kowi kakrawi kowi now tainauüa kowi kow krawi thowr auh hai kow krawi mü amatni madia sik, iung reng tak chünchü pakhai.
37
Now Barnaba nau mi dow Jawhan marka pah hawah mi kowi amatchi hown nahawlah kown mi chekhai.
38
Nachenganchepaw Pamfulia kowi plawtla now amatchi kow powt mi maru hown cham kut plan chang lup iawk kown mi marka kow hawla e phaw dowi tham pah Pawl dow katuak khai.
39
Now khe amatchi sak dow towlek dowi bowt chekhai, naiawng kow amatchi dow taprai iüa khai. Now Barnaba mi hawla marka now lawng hown Kupra kowi kow kowi khai.
40
Nachenganchepaw Pawl tarapchedow Sil kowi ruiah khai, hanow tainauüa dow CHAKRAMANG sanara ap pe büah kung kowi tapraila khai.
41
Now Suria hai Kilikia iawng mang iawlaw se Thurai maruüa kowi dow khila khawtla khai.