AIA LUPCHANG SATANG PETER PHUANG MI1
Kawmat dow chintakmiuüa hai juda tainau-uüa paw ta büah khai bowt, Jentailuüa paw Thurai laiklow chün khai bowt pamih.
2
Hanow Jerusalem kowi Peter uang ting hown akrowksang khampha pikhia miuüa dow benpe angak khai, tekpe mi;
3
Khampha pikhia dowi miuüa kim kowi en kow kowiah hanow, en cham cha cham kham khai pabüah khai,
4
Nachenganchepaw Peter dow auown sowksow hownia kow lawnguan amatni kowi aklangiungma tekpe khai.
5
Tekpe mi, Jawppa kowi ang chup Thurai khai, now ching ching mang mang mow ang khi lowk mi, aiukma mi uan powngchah iawng tali tingnui kowi khuowkah mi mukuang hownia uang dowm mi ang khi, now nami dow ang tut-e chekhai uang.
6
Nami pra amiksang ang mü hanow, lusa kowi kow klowng tali chüng ün, kaurawng kowi kow asa dua ün, rua ün hai mukuang kowi kow uakling maiow nami kowi uowi mi ang khi khai.
7
Now, Peter awr rü, ngenah now cha diah pah tek angmi aklow dow ang ta lowk khai.
8
Nachenganchepaw ang tekpe mi, CHAKRAMANG naiawng hang kow pacham na low, asür alawkma mi hai chim sai dowi mi uan katpaw ang cha dowi ang pa khai.
9
Nachenganchepaw prekat kowi mukuang hownia Thurai chimta saita khowk mi kowi chim sai dowi pahai en hang kow tek diah pami klow dow ang ta khai.
10
Naiawng sum kat uang tek kung kowi naiawng ün bowk bowk dow mukuang kowi kutplan tatowng iawk khai.
11
Now ang mü pache kachakuüa sumia ang uowiah mi kim kowi uang iowng khai. Amatni kowi dow Sizar hownia ang tut-e uang chinah mi chekhai.
12
Now amia kowi paw nanemah nachowngah dowi kownkow lümla dow amatni tut natawi kownkow tawi chin ang khai. Now maün mi tainau uüa tarukia mi paw ang kung uang tawi büah khai. Now nami maru kim kowi dow anging kow kup khai.
13
Aia dow hawt tek anging mi kramamu lowkia kowi dow aia khi khai. Nami kramamu mi aia kim kowi uang iowngah now tekpe mi, Jawppa kowi kow chin maru diah hanow, Simawn kowi uang hawla diah, Peter pah hawah mi kowi;
14
Aiamat dow natek en laiklow kown, nami laiklow dow en hai en kimchakuüa bowk bowk naka lawngra kown pami chekhai.
15
Now ang uown tek laikhe amatni lukkowi lümlasai dow uang khai, auown khe a-i tut-e phaw mi powmiawng dow.
16
Now CHAKRAMANG laiklow anging katuak khai, aia tekmi Jawhan dow tui kowi chang Baptisma now enni dow lümlasai hown nachang baptisma kown pamih dow.
17
Nahanow CHAKRAMANG Isu krista kowi owm büah kung kowi Thurai mi akatsang peah prasi khai. Now ang matawng iawng chow Thurai kowi nowngia hang kown chow? pakhai).
18
Na ün mi laiklow ta büah now rarimma uowi büah khai, now kiow Thurai büah se name iawng mi dow Thurai mi Jentailuüa kowi paw nasingla kownkow taripra khin pe pe khai bowt padow tek büah khai.
ANTIKIAW KOWI KOW THURAI MARUUÜA19
Now Stiphen kowng kung kowi owm Thurai miuüa lukkowi changah anowng apowng khai, naiawng kow bowk bowk Jerusalem hownia cham tauet plawt khai. Amatni dow Howiniki pren kowi ün, Kupra süngdum hai Antikiaw marow mowr cham len büah khai. Now akeng miuüa kowi tek dowi hai Judauüa kowi krowngcha cham tek satangiung lai büah khai.
20
Nachenganchepaw amatni pungma dawng kowi kupra hai Kawrini hownia ka maru uowi ne khai. Amatni dow Antikiaw kowi uangah hanow, Grikuüa tut-e CHAKRAMANG Isu Krista lawnguan satang iung laiklow tek büah khai.
21
Now CHAKRAMANG rut dow amatni tut uowi khai rakowi maru akawmma tawi owm khai hanow, CHAKRAMANG tut-e uang plan khai.
22
Now akung kowi amatni lawnguan Jerusalem kowi kow Thurai maruüa tuk khai, naiawng rakowi kow büah dow Antikiaw mowr Barnaba kowi uang chinah khai.
23
Barnaba dow uang now CHAKRAMANG sanara uang khi khai hanow, awmrawmah khai. Now aia dow amatni kowi sakdawng hown CHAKRAMANG kowi natadowkla reng kownkow chükah khai.
24
Barnaba dow maru iungtangmi chekhai. Lümlasai hai owmra hai kow atekma mi chekhai. Now maru kawmma dow CHAKRAMANG tut-e uang tachin tarawm khai.
25
Now akung kowi aia dow Sil kowi na krawi chamah kownkow Tarsa kowi kow kowi khai.
26
Aia dow kow ka tow khowbowt now Antikiaw kowi uang pawla khai. Now amatchi achima paning mowr Thurai maruüa tut-e tawi taklawp taiua khai, now maru akawmma kowi tüngah sangah khai. Antikiaw hownia chekhai tapeuüa kowi kristian pamih ming rik rükah mi.
27
Now na ün mi khin khe risiuüa Jerusalem hownia Antikiaw kowi uang ne khai.
28
Amatni pungma dawng kowi aming Agap pami maru lowkia mi awr iowngah now palusama khown nakuak kown pamih lümla hown awr tek khai; nami khown dow Klaudia mang chowng kowi chekhai.
30
Amatni pungma dawng kowi aming Agap pami maru lowkia mi awr iowngah now palusama khown nakuak kown pamih lümla hown awr tek khai; nami khown dow Klaudia mang chowng kowi chekhai.
29
Naiawng kow tapeuüa dow bowk bowk ia mowr chi Juda pren tainau uüa tut-e khowng-kumüa na peah kown mi tuak büah khai
30 Now tuakah mi iawng lup paw chang büah khai, Barnaba hai Sil iüa rut kowi hai lawngtang chauüa tut-e krawi pe tangka büah khai.