¹ Ang lang sakrau ami chauüa low, enni plan chang angak dowi bowt kownkow maiawng ünmi ang rui enni mi chekhai. Now amia iawngmi chün chü plan chang angak khai iawk hanow aia vüi Pa tut-e a-i luk kowi tek laiklow kownmi na uowi lowkia kown chekhai. Nami dow Isu Krista chekhai,aia tut-e dow angak uowi dowi chekhai. ² Aia dow a-i ngak kuakla kownkow aiamat buk kow uang ta-ap, hanow Thurai paw sak-i ah khai. A-i ngak krowng chow paw nadowi bowk bowk maru vüi paw uang tape mi chekhai. ³ Aiamat laiklow a-i chün hanow aia kowi dow a-i tukmat mi nowna kown. ⁴ Amia iawngmi chow ‘Thurai kowi ang tuk’ pah tek kow aia lai chün dowi miuüa da aia tut-e dai kangow, anowm uowi dowimi chekhai. ⁵ Now, aia laiklow iawng chünmi sarui dow lainowmma aia tut-e Thurai sakraura ngat khai bowt. Nami hownia a-i tuk midow aia tut-e a-i uowi khowk pami chekhai. ⁶ Now miaiawngmi chow ‘Thurai tut-e ang uowi’ pah tek, nami dow Isu Krista chowm krang uowi krang iawng pacham uowi lah! ⁷ Chauüa low, ang pe enni alow sarmi nadowi alai hownia kow alowpek prim ang pe enni mi chekhai; enni rikta ami alow pek paw nakhai. ⁸ Enni vüi kowi asar iawngmi alow ang pe enni mi paw Krista kowi dow anowm mami chekhai; now uar da kowi hanow uarthowi uang na khai bowt. ⁹ Now amiachow anowi kowi uowi khowk kow pamatia tainau kowi sui midow kawmat pat a iu kowi uowi reng takmi chekhai. ¹⁰ Now amiachow pamatia tainau kowi sakrau hai nowi kowi uowi midow aia tut-e angak uowi dowi bowtmi chekhai. ¹¹ Now amiachow pamatia tainau kowi sui midow a iu kowi uowi reng tak, a iu kowi mang reng tak, tawng pra chow mangmi aiamat hing tuk dowi; a iu mih aiamat mik kowi dutape khai rakowi. ANOWMA HAI THURAI SAKRAURA KOWI NAUOWI KOWN MI ¹² Ang sakraumi chauüa low, Krista ming hown enni sünta hanow angak lawtta enni khowk mi chekhai. ¹³ Pauüa low, enni tut-e ang rui eeni mi auan dow a uown hownia kow uowimi kowi dow enni tuk khowk. Klanguüa, enni tut-e ang rui enni setan kowi dow enni awngta khai bowt. Ngeuüa low enni paw eeni Pa Thurai kowi dow enni tuk khai bowt. ¹⁴ Pauüa low, enni tut-e ang rui enni, auown hownia uowimi kowi enni tuk khai, klanguüa low enni tut-e paw ang rui enni, enni kür uowimi hai Thurai laiklow enni tut-e uowi rakowi setan kowi dow enni iata khai bowt. LUSA KOWI HANG KOW SAKRAU BÜAH DIAH ¹⁵ Enni da lusa hai lusa kowi kow auan kowi hang kow sakrau bua diah. Amia iawngmi chow lusa kowi sakrau midow Pa sakraura krüa kowi uowi dowi. ¹⁶ Tawng palawng, lusa kowi kow uowimi uan dow buk kow sakraira hai mik irra, bawrira, hanow nami maten dow Pa hownia kow nadowi, nami dow lusa kowikow uowimi uan chekhai. ¹⁷ Nahanow lusa kowi kow auan uowimi ün dow tama bowk kown; nachepaw Thurai nau iawng chün midow achowngma na sing kown. ¹⁸ Ngeuüa low, achur khin uang ting khai bowt, enni taah mi iawng dow Krista ransu uang ting khai, kawmat hownia Krista ransu mih ahuma uang ting khai bowt. Naiawng rakowi achur khin dow uang ting khai bowt. ¹⁹ Nami Krista kow ransu midow a-i hownia awr lawt khai, nachepaw amatni dow a-i kow maru nadowi. Amatni dowi, amatni dow a-i kow maru nakhai eda a-i iawng natawi uowi diah; nadowi rakowi lawt büa khai bowt. Lowkia paw amatni dow a-i kow maru nabüa dowi chekhai. LÜMLASAI HOWN NÜMNAMAH MI ²⁰ Now, enni tarap dow lümlasai hai phawk enni sau bowk mi chekhai; enni midow anowm mami kowi tuk bowk. ²¹ A nowm mami kowi enni tuk dowi rakowi ang rui enni mi nadowi; anowm mami kowi enni dow tuk khowk rakowi dailai dow ianowm dowi pami rakowi ang rui enni rowtmi chekhai. ²² Now, Isu kowi Krista pami nautawi ngih dowimi khowt nga midow uowi dowi bowt. Amia iawngmi chow Krista hai chang ransu midow Pa hai Chapa pami tuk dowi. ²³ Amia chow Chapa kowi ngih dowi midow Pa kowi paw tawi ia ka dowi, amia chow Chapa kowi tawi ngih mi dow nami dow Pa kowi kami chekhai. ²⁴ Now, enni dow auown hownia enni ta khowk rakowi enni matia sak kowi pacham uowi lah. A uown khe kow enni ta ami enni matia sak kowi uowi khowk midow Pa hai chapa tut-e paw uowimi nakhai. ²⁵ Hanow mami chekhai aia laikham dow, nami dow achowngma singra lai chekhai. ²⁶ Amia chow angak tia pra kowi pawla enni kown naumi lawnguan rui enni kown ang nau khai. ²⁷ Hanow, Krista rakowi phawk enni sau khowk miuüa dow enni saktuak kowi paw uowi khai bowt. Akengmi uang tüng sang enni kown hau dowi bowt, phawk enni sau midow lowrami uan kowi tüng enni sang enni khowk. Nami dow anowm mami chekhai dai nadowi bowt. Tüng sang enni mih powm iawng enni matia paw aiamat tut-e uowi diah Thurai chah enni nakhai bowt rakowi. ²⁸ Ang sakrau ami chauüa low, enni dow aiamat tut-e uowi büa diah, aia nauangmi khin khe enni sak nakraing la kownkow hai aiamat pur kowi enni na rukrai dowi kownkow. ²⁹ Enni dow tuk khai bowt, aia dow maru achi anawm mami chekhai, nami klen kowi amichow chowm krang uowi krang iung mami dow Thurai hownia kow diami chekhai pami enni tuk khai bowt.