¹ Idi umuna a panawen, pinarsua ti Dios dagiti langlangit ken ti daga. ² Awan langlanga na ti daga ken awan naggianna. Sipnget ti adda iti rabaw ti taaw. Ket ti Espiritu ti Dios, aggargaraw iti rabaw dagiti danum. ³ Kinuna ti Dios, "Mapaadda ti lawag" ket immadda ti lawag. ⁴ Nakita ti Dios ti lawag, a daytoy ket nasayaat. Pinagsinana ti lawag ken ti sipnget. ⁵ Inawagan ti Dios ti lawag nga "aldaw," ken inawaganna ti sipnget a "rabii." Daytoy ket rabii ken bigat, ti umuna nga aldaw. ⁶ Kinuna ti Dios, "Mapaadda iti nalawa nga espasio iti nagbaetan dagiti danum, ket daytoy ti mangbingay kadagiti danum manipud kadagiti danum." ⁷ Nagaramid ti Dios iti nalawa nga espasio ket pinagsinana dagiti danum nga adda iti babaen ti espasio kadagiti danum nga isu iti ngatoen ti nalawa nga espasio. Ket kasta ngarud ti napasamak. ⁸ Inawagan ti Dios ti nalawa nga espasio iti "tangatang." Daytoy ket rabii ken bigat, ti maikadua nga aldaw. ⁹ Kinuna ti Dios, "Maurnong iti maysa a disso dagiti danum nga adda iti babaen ti tangatang, ket agparang met ti disso nga awan danumna." Ket kasta ngarud ti napasamak. ¹⁰ Inawagan ti Dios ti disso nga awan danumna iti "daga," ken inawaganna dagiti nagmaymaysa a danum iti "baybay." Nakitana a daytoy ket nasayaat. ¹¹ Kinuna ti Dios, "Agrusing dagiti mulmula iti daga: mulmula a mangpaadda iti bukel ken kaykayo nga agbunga iti adda bukelna, tunggal mula segun iti naggapuanna." Ket kasta ngarud ti napasamak. ¹² Nangpaadda ti daga kadagiti mulmula, mulmula a mangpapaadda iti bukel segun iti naggapuanda. Nakita ti Dios a daytoy ket nasayaat. ¹³ Daytoy ket rabii ken bigat, ti maika-tallo nga aldaw. ¹⁴ Kinuna ti Dios, "Mapaadda dagiti silaw iti tangatang a mangbingay iti aldaw ken iti rabii. Ket agbalinda a kas pagilasinan, kadagiti panawen, kadagiti aldaw ken kadagiti tawen. ¹⁵ Agbalinda a silaw iti tangatang a mangted iti lawag iti daga." Ket kasta ngarud ti napasamak. ¹⁶ Inaramid ti Dios iti dua a dakkel a silaw, ti dakdakkel a silaw nga agturay iti aldaw, ken ti basbassit a silaw nga agturay iti rabii. Inaramidna met dagiti bituen. ¹⁷ Inkabil ida ti Dios iti tangatang a manglawag iti daga, ¹⁸ a mangituray iti aldaw ken iti rabii, ken mangbingay iti lawag ken iti sipnget. Nakita ti Dios a daytoy ket nasayaat. ¹⁹ Daytoy ket rabii ken bigat, ti maika-uppat nga aldaw. ²⁰ Kinuna ti Dios, "Mapunno dagiti danum kadagiti adu nga sibibiag a parsua, ken agtayab dagiti tumatayab iti ngatoen ti daga iti nalawa nga espasio iti tangatang." ²¹ Pinarsua ti Dios dagiti dadakkel a parsua iti baybay, kasta met ti tunggal kita iti agbibiag a parsua, parsua nga aggargaraw ken aguummong iti danum, ken iti tunggal kita iti billit nga adda payakna. Nakita ti Dios a daytoy ket nasayaat. ²² Binendisionan ida ti Dios, a kunana, "Agbalinkayo a nabunga ken agpaadukayo, punuenyo dagiti danum nga adda kadagiti baybay. Agpaadu dagiti tumatayab iti daga." ²³ Daytoy ket rabii ken bigat, ti maika-lima nga aldaw. ²⁴ Kinuna ti Dios, "Mapataud iti daga dagiti sibibiag a parsua, tunggal maysa segun iti bukodda a kita, dagiti dingwen, dagiti agkarkarayam a banbanag, ken dagiti atap nga animal, tunggal maysa segun iti bukodda a kita." Ket kasta ngarud ti napasamak. ²⁵ Pinarsua ti Dios dagiti atap nga animal iti bukodda a kita, dagiti dingwen iti bukodda a kita, ken amin nga agkarkarayam iti daga iti bukodda a kita. Nakitana a daytoy ket nasayaat. ²⁶ Kinuna ti Dios, "Mangaramidtayo iti tao a kalanglangatayo, kas kadatayo. Iturayanda dagiti lames iti baybay, dagiti dingwen, ti entero a daga, ken iti tunggal agkarkarayam a banag iti rabaw ti daga." ²⁷ Pinarsua ti Dios ti tao a kalanglangana. Iti bukodna a langa, pinarsuana isuna. Pinarsuana ida a lalaki ken babai. ²⁸ Binendisionan ida ti Dios a kinunana kadakuada, "Agbalinkayo a nabunga ken agpaadukayo. Punwenyo ti daga ket iturayanyo daytoy. Iturayanyo dagiti lames iti baybay, dagiti tumatayab iti tangatang ken tunggal sibibiag a banag nga aggargaraw iti daga." ²⁹ Kinuna ti Dios, "Kitaenyo, intedko kadakayo ti tunggal mula a mangpapaadda iti bukel iti rabaw ti daga, ken tunggal kayo nga agbungbunga nga addaan iti bukel. Agbalin dagitoy a taraon kadayo. ³⁰ Iti tunggal naunget nga ayup iti daga, iti tunggal tumatayab iti langit, ken kadagiti amin nga agkarkarayam iti rabaw ti daga, ken iti tunggal parsua nga addaan iti anges ti biag, intedko ti tunggal nalangto a mula nga agserbi a taraonda." Ket kasta ngarud ti napasamak. ³¹ Nakita ti Dios ti amin nga inaramidna. Ket adtoy, pudno a nakasaysayaat. Daytoy ket rabii ken bigat, ti maika-innem nga aldaw.