¹ Ita, adda napaut a gubat iti nagbaetan ti balay ni Saul ken iti balay ni David. Ket pimmigsa a pimmigsa ni David, ngem kimmapuy a kimmapuy ti balay ni Saul. ² Naipasngay dagiti putot ni David idiay Hebron. Ti inauna a putot ket ni Amnon, a putotna kenni Ahinoam manipud Jezreel. ³ Ti maikaddua a putotna ket ni Keleab, nga impasngay ni Abigail, ti balo ni Nabal a taga Carmel. Ti maikatlo, ni Absalon, a putot ni Maaca a putot ni Tolmai nga ari ti Gesur. ⁴ Ti maika-uppat a putot ni David, ni Adonija nga anak ni Haggit. Ti maikalima a putotna ket ni Sefatias nga anak ni Abital, ⁵ ken ti maika-enem, ni Itream nga anak ti asawa ni David a ni Egla. Dagitoy dagiti lallaki a putot ni David a naiyanak idiay Hebron. ⁶ Dimteng ti tiempo kabayatan ti gubat iti nagbaetan ti balay ni Saul ken iti balay ni David a pinapigsa ni Abner ti bagina iti balay ni Saul. ⁷ Adda inkabbalay ni Saul a managan Rispa, a babai nga anak ni Aiah. Kinuna ni Isboset kenni Abner, "Apay a kinaiddam ti inkabbalay ni amak?" ⁸ Ket makaunget unay ni Abner kadagiti sasao ni Isboset ket kinunana, "Maysaak kadi nga ulo ti aso ti Juda? Ita nga aldaw, ipakpakitak ti kinapudnok iti balay ni Saul, nga amam, kadagiti kakabsatna a lallaki ken kadagiti gagayyemna, babaen iti saanko panangipaima kenka kenni David. Ngem pabasulennak pay laeng ita nga aldaw maipapan iti dayta a babai? ⁹ Aramiden koma ti Dios kaniak, Abner, ken nalablabes pay, no saanko nga aramiden para kenni David ti kas insapata ni Yahweh kenkuana, ¹⁰ nga iyakar ti pagarian manipud iti balay ni Saul ken panangisaad iti trono ni David iti entero nga Israel, ken iti entero a Juda, manipud Dan agingga iti Beerseba." ¹¹ Saan a makasungbat ni Isboset kenni Abner, gapu ta mabuteng isuna kenkuana. ¹² Ket nangibaon ni Abner kadagiti mensahero a mapan kenni David a makisarita para kenkuana a mangibaga, "Siasino ti makindaga iti daytoy? Makitulagka kaniak ket makitamto nga adda kenka ti imak, a mangiyeg kenka iti amin nga Israel." ¹³ Simmungbat ni David, "Nasayaat, makitulagak kenka. Ngem maysa a banag ti kiddawek kenka ket saanmo a makita ti rupak malaksid no iyegmo nga umuna ni Mikal, ti putot a babai ni Saul inton umaynak kitaen." ¹⁴ Ket nangibaon ni David kadagiti mensahero kenni Isboset, a putot ni Saul, a kunkunana, "Itedmo kaniak ti asawak a ni Mikal, ta binayadak iti gatad a sangagasut a kudil ti mabagbagi dagiti Filisteo." ¹⁵ Isu a nangibaon ni Isboset iti mangala kenni Mikal manipud iti asawana, a ni Paltiel a putot ni Lais. ¹⁶ Kimmuyog kenkuana ti asawana nga agsangsangit kabayatan ti ipapanna, ket simmurot kenkuana agingga idiay Bahurim. Ket kinuna ni Abner kenkuana, "Agawidkan." Isu a nagsubli isuna. ¹⁷ Nakisarita ni Abner kadagiti panglakayen ti Israel a kunana, "Iti napalabas kinalikagumanyo nga agari koma ni David kadakayo. ¹⁸ Aramidenyo itan. Gapu ta imbaga ni Yahweh maipapan kenni David a kunana, 'Babaen iti ima ti adipenko a ni David isalakankonto dagiti tattaok nga Israel manipud iti pannakabalin dagiti Filisteo ken kadagiti amin a kabusorda.'" ¹⁹ Nakisao pay a mismo ni Abner kadagiti tattao ni Benjamin. Kalpasanna, napan pay ni Abner a makisarita kenni David idiay Hebron tapno ipalawagna amin a banbanag a tinarigagayan dagiti Israelita ken ti sangkabalayan ni Benjamin nga aramiden. ²⁰ Idi simmangpet idiay Hebron da Abner ken dagiti duapulo kadagiti tattaona a mangkita kenni David, nangisagana ni David iti padaya para kadakuada. ²¹ Impalawag ni Abner kenni David, "Tumakderak ket ummongek amin nga Israel para kenka, apok nga ari, tapno makitulagda kenka tapno maiturayam dagiti amin a tarigagayam nga iturayan." Pinapanaw ngarud ni David ni Abner, ket pimmanaw ni Abner nga addaan kapia. ²² Kalpasanna, simmangpet dagiti soldado ni David ken ni Joab manipud iti panangrautda ket adu ti insangpetda a sinamsamda. Ngem awanen ni Abner iti ayan ni David idiay Hebron. Pinapanawen ni David, ket nakapanawen ni Abner nga addaan kapia. ²³ Idi simmangpet da Joab ken amin nga armada a kaduana, imbagada kenni Joab, "Ni Abner a putot ni Ner ket napan iti ari, ket pinapanaw ti ari isuna, ket pimmanaw ni Abner nga addaan kapia." ²⁴ Ket napan ni Joab iti ayan ti Ari ket kinunana, "Ania ti inaramidmo? Kitaem man, immay ni Abner kenka! Apay a pinapanawmo isuna, ket awanen isuna? ²⁵ Saanmo kadi nga ammo nga immay ni Abner a putot ni Ner tapno allilawennaka ken tapno ammoenna dagiti panggepmo, ken adalenna ti tunggal aramidem?" ²⁶ Idi pinanawan ni Joab ni David, nangibaon ni Joab kadagiti mensahero a mangkamakam kenni Abner, ket insublida isuna manipud iti bubon ti Sira, ngem saan nga ammo ni David daytoy. ²⁷ Idi nakasubli ni Abner idiay Hebron, inayaban isuna ni Joab idiay igid ti ruangan tapno makisarita kenkuana iti sililimed, ket sadiay a dinuyok ni Joab ti tianna ket pinapatayna isuna. Iti daytoy a wagas, imbales ni Joab ti dara ni Asael a kabsatna. ²⁸ Idi nangngeg ni David ti maipapan iti daytoy ket kinunana, "Siak ken ti pagariak ket agnanayon nga inosente iti sangoanan ni Yahweh maipapan iti dara ni Abner nga anak ni Ner. "Agdissuor koma ti dusa iti pannakatay ni Abner iti ulo ni Joab ken iti amin a balay ti amana. ²⁹ Adda koma a kanayon iti pamiliana ti agkukutel wenno sakit ti kudil wenno panakapilay ken agsarrukod a magna wenno matay iti kampilan wenno agkurang iti makan. ³⁰ Isu a pinatay da Joab ken Abisai a kabsatna ni Abner, gapu ta napatayna ti kabsatda a ni Asael iti ranget idiay Gabaon. ³¹ Kinuna ni David kenni Joab ken kadagiti amin a tattao a kakaduana, "Pisangenyo dagiti pagan-anayyo, agikawes kayo iti nakersang a lupot, ket dung-awanyo ti bangkay ni Abner." Ket nagna ni David iti likudan ti bangkay idi maipunpon daytoy. ³² Intanemda ni Abner idiay Hebron. Impigsa ti ari ti sangitna idiay tanem ni Abner, ket nagsangit met dagiti amin a tattao. ³³ Nagleddaang ti ari ken nagdung-aw, "Rumbeng kadi a matay ni Abner a kas iti pannakatay ti maysa a maag? ³⁴ Saan a nagalotan dagiti imam. Saan a nakawaran dagiti sakam. Kas iti pannakatinnag ti tao iti sangoanan dagiti annak ti awanan hustisia, isu a napapatayka." Nagsangit manen dagiti tattao gapu kenkuana. ³⁵ Immay dagiti amin a tattao a mangallukoy kenni David a mangan kabayatan nga aldaw pay laeng, ngem nagsapata ni David, "Aramiden koma ti Dios kaniak, ken ad-ada pay koma, no rumamanak ti tinapay wenno aniaman sakbay a lumnek ti init." ³⁶ Nadlaw dagiti amin a tattao ti panagladingit ni David, ken naay-ayoda iti daytoy, aniaman nga inaramid ti ari ket naay-ayoda. ³⁷ Isu a naawatan amin dagiti tattao ken amin nga Israelita a saan a pagayatan ti ari a mapapatay iti dayta nga aldaw ni Abner nga anak ni Ner. ³⁸ Kinuna ti ari kadagiti adipenna "Saanyo kadi nga ammo a maysa a prinsipe ken natan-ok a tao ti napapatay iti daytoy nga aldaw iti Israel? ³⁹ Ken nakapsutak ita nga aldaw, uray no napulotanak nga ari. Dagitoy a lallaki, a putot ni Zeruyas, ket naranggas unay kaniak. Pagbayaden koma ni Yahweh dagiti managdakdakes, babaen iti panangdusana kenkuana gapu iti kinadakesna, a kas maikari kenkuana."