¹ Ita, dagitoy dagiti maudi a balikas ni David— ni David nga anak ni Jesse, ti tao a napadayawan unay, ti tao a pinulotan iti Dios ni Jacob, ti nalaing a salmista ti Israel. ² "Nagsao ti Espiritu ni Yahweh babaen kaniak, ket adda dagiti balikasna iti dilak. ³ Nagsao ti Dios ti Israel, kinuna ti dakkel a Bato ti Israel kaniak, 'Ti sililinteg a mangiturturay kadagiti tattao, isu a mangiturturay nga addaan iti panagbuteng iti Dios. ⁴ Kaiyarigannanto ti lawag iti agsapa no sumingsingising ti init, maysa nga agsapa nga awan ti ulep, ken no agrusing dagiti naganus a ruot iti daga babaen iti naraniag a singising ti init kalpasan iti tudo. ⁵ Kinapudnona, saan kadi a kastoy ti pamiliak iti imatang ti Dios? Saan kadi a nakitulag isuna kaniak iti agnanayon, nabilin ken saan a mabaliwan iti amin a wagas? Saan kadi a patalgedenna ti pannakaisalakanko ken ipatungpalna ti tunggal tarigagayko? ⁶ Ngem dagiti awan serserbina ket maiyarigdanto amin kadagiti siit a maibelleng, gapu ta saan ida a maurnong dagiti ima iti siasinoman. ⁷ Ti tao a mangsagid kadagitoy ket masapul nga agaramat iti landok wenno putan ti gayang: masapul a mapuoranda iti ayanda.'" ⁸ Dagitoy dagiti nagan dagiti mabigbigbig a soldado ni David: Ni Isbaal a Takmonita ket isu ti pangulo dagiti mabigbigbig a soldado. Nakapatay isuna iti walo gasut a lallaki iti naminsan a ranget.. ⁹ Sumaruno kenkuana ket ni Eleazar a putot ni Dodai a maysa nga Ahohita, maysa kadagiti tallo a nasisiglat a tattao ni David. Adda isuna idi kinaritda dagiti Filisteo a naguummong tapno makigubat, ken idi nagsanod dagiti lallaki ti Israel. ¹⁰ Nagtakder ni Eleazar ket kinarangetna dagiti Filisteo agingga a nabannog ken simmikkil dagiti imana ket saannan a maibbatan ti pag-egeman iti kampilanna. Nangiyeg ni Yahweh iti naindaklan a balligi iti dayta nga aldaw. Nagsubli dagiti armada kalpasan ni Eleazar tapno laeng labusanda dagiti kayatda kadagiti natay. ¹¹ Sumaruno kenkuana ni Samma a putot ni Age a taga-Hara. Naguummong dagiti Filisteo iti talon a namulaan iti bukbukel, ket intarayan ida ti armada. ¹² Ngem nagtakder ni Samma iti tengga ti talon ket sinalaknibanna daytoy. Pinatayna dagiti Filisteo, ket nangyeg ni Yahweh iti naindaklan a balligi. ¹³ Tallo kadagiti tallupulo a soldado ti simmalog iti ayan ni David iti panawen ti panagaapit, iti rukib ti Adullam. Nagkampo ti armada dagiti Filisteo iti tanap ti Refaim. ¹⁴ Iti dayta a tiempo adda idi ni David iti paglemlemmenganna nga maysa a rukib, kabayatan iti panagkampo dagiti Filisteo idiay Betlehem. ¹⁵ Mawaw idi ni David ket kinunana, "No adda la koma mangted kaniak iti danum nga inumek a naggapu iti bubon idiay Betlehem, ti bubon nga adda iti asideg ti ruangan!" ¹⁶ Isu a simmina dagitoy a tallo a nasisiglat a lallaki ti armada kadagiti Filisteo ket napanda simmakdo iti danum idiay bubon ti Betlehem, ti bubon nga adda iti ruangan. Innalada ti danum ket impanda kenni David, ngem nagkedked isuna nga inumen daytoy. Ngem ketdi, imbuyatna daytoy a kas datonna kenni Yahweh. ¹⁷ Ket kinunana, "Iyadayom kaniak, Yahweh, nga inumek daytoy. Rumbeng kadi nga inumek ti dara dagiti lallaki a nangipusta iti biagda?" Isu a nagkedked isuna nga inumen daytoy. ¹⁸ Ni Abisai a kabsat ni Joab a putot ni Zeruyas, ti kapitan dagiti tallo. Adda naminsan a nakiranget isuna babaen iti gayangna iti tallo gasut a lallaki ket pinatayna ida. Masansan a madakamat isuna a kadua dagiti tallo a soldado. ¹⁹ Saan kadi a nalatlatak isuna ngem kadagiti tallo? Isuna ti nagbalin a kapitanda. Nupay kasta, ti kinalatakna ket saan a kas iti kinalatak dagiti tallo a kalalatakan a soldado. ²⁰ Ni Benaias a taga-Kabzeel ket putot ni Jehoyada; maysa isuna a napigsa a lalaki a nakaaramid kadagiti aramid a mangipakita iti kinatured. Pinatayna dagiti dua a putot ni Ariel a taga-Moab. Bimmaba pay isuna iti maysa nga abut ket pinatayna ti maysa a leon kabayatan nga agtudtudo iti niebe. ²¹ Ken napatayna ti maysa a nagdakkel a lalaki nga Egipcio. Nakaiggem iti gayang daytoy nga Egipcio, ngem kinaranget daytoy ni Benaias babaen laeng iti sarukod. Inagawna ti gayang manipud iti ima ti Egipcio ket pinatayna isuna babaen iti daytoy met laeng a gayang. ²² Inaramid ni Benaias a putot ni Jehoyada dagitoy a kinatured, ket nainaganan isuna a kadua dagiti tallo a nasisiglat a lallaki. ²³ Mararaem isuna ngem dagiti tallopulo a soldado, ngem saan isuna a mararaem a kas kadagiti tallo a mabigbigbig a soldado. Nupay kasta, isuna ti dinutokan ni David a mangimaton kadagiti guardiana. ²⁴ Dagiti tallopulo ket isuda dagiti sumaganad a lallaki: Ni Asael a kabsat ni Joab, ni Elhanan a putot ni Dodo a nagtaud iti Betlehem, ²⁵ ni Samma ken ni Elika a taga-Harod, ²⁶ ni Helez a taga-Paltit, ni Ira a putot ni Ikkes a taga-Tekoa, ²⁷ ni Abiezer a taga-Anatot, ni Mebunai a taga-Husa, ²⁸ ni Zalmon a taga-Ahohi, ni Maharai a taga-Netofa; ²⁹ ni Heleb a putot ni Baana a taga-Netofa, ni Ittai a putot ni Ribai a taga-Gabaa iti kaputotan ni Benjamin, ³⁰ ni Benaias a taga-Piraton, ni Hiddai a nagtaud kadagiti tanap ti Gaas, ³¹ ni Abi-Albon a taga-Arbata, ni Asmabet a taga-Barhum, ³² ni Eliaba a taga-Saalbon, dagiti putot ni Jasen, ni Jonatan a putot ni Shama nga taga-Hararita; ³³ ni Ahiam a putot ni Sarar a taga-Hararita, ³⁴ ni Elifelet a putot ni Ahasbai a taga-Maaca, ni Eliam a putot ni Ahitofel a taga-Gilon, ³⁵ ni Hezro a taga-Carmel, ni Paarai a taga-Arbita, ³⁶ ni Igal a putot ni Natan a taga-Soba, ni Bani a taga-Gad, ³⁷ ni Zelek a taga-Ammon, ni Naharai a taga-Beerot, a para-awit iti armas ni Joab a putot ni Zeruyas, ³⁸ ni Ira ken ni Gareb a taga-Itreo, ³⁹ ni Urias a Heteo—tallopulo ket pito amin.