¹ Napasamak daytoy iti panawen a panagtutubo dagiti mulmula, iti gagangay a tiempo a mapan makigubat dagiti ari, imbaon ni David ni Joab, dagiti adipenna, ken amin nga armada ti Israel. Dinadaelda ti armada ti Ammon ken rinautda ti Rabba. Ngem nagtalinaed ni David iti Jerusalem. ² Ket napasamak iti maysa a rabii a bimmangon iti pagiddaanna ni David ken nagpagnapagna iti tuktok ti palasiona. Manipud sadiay, natannawaganna iti maysa a babai nga agdigdigus, ken nakapinpintas unay a kitkitaen ti babai. ³ Isu a nangibaon ni David ken nagsaludsod kadagiti tattao no siasino ti makaam-ammo iti babai. Adda maysa a nangibaga, "Saan kadi a daytoy ni Batseba a putot a babai ni Eliam, ken saan kadi nga isuna ti asawa ni Urias a Heteo?" ⁴ Nangibaon ni David kadagiti mensahero ket innalada ti babai; napan ti babai kenni David ket kinaiddana isuna (ta kalkalpas ni Batseba iti binulan a seremonia ti pannakadalus gapu iti panagreglana). Kalpasanna, nagawid ti babai iti balayna. ⁵ Nagnginaw ti babai, nangibaon isuna ket imbagana kenni David, "Masikogak." ⁶ Ket nangibaon ni David iti ayan ni Joab a kinunana, "Ibaonmo kaniak ni Urias a Heteo." Isu nga imbaon ni Joab ni Urias a mapan kenni David. ⁷ Idi makadanon ni Urias, dinamag ni David no kumusta ni Joab, ti armada, ken ti gubat. ⁸ Kinuna ni David kenni Urias, "Bumabaka idiay balaymo, ket buggoam dagiti sakam." Isu a pinanawan ni Urias ti palasio ti ari ket nangipatulod iti maysa a sagut ti ari para kenni Urias kalpasan a nakapanaw isuna. ⁹ Ngem naturog ni Urias iti ruangan ti palasio ti ari a kadua dagiti amin nga adipen ti apona, ket saan isuna a bimmaba iti balayna. ¹⁰ Idi imbagada kenni David, "Saan a bimmaba ni Urias iti balayna," Kinuna ni David kenni Urias, "Saan kadi a kasangsangpetmo manipud iti panagdaliasat? Apay a saanka a bimmaba iti balaymo?" ¹¹ Simmungbat ni Urias, "Adda kadagiti tolda ti Lakasa ti Tulag, ti Israel ken ti Juda, nakakampo pay iti nalawa a tay-ak ni apok a Joab ken dagiti adipen ti apok. Kasanoak a mapan iti balayko tapno mangan, uminom ken makikaidda iti asawak? Agingga a sibibiagka apo ari, saankonto nga aramiden dayta." ¹² Isu nga imbaga ni David kenni Urias, "Agtalinaedka pay ditoy ita nga aldaw, ket palubosankanto a pumanaw inton bigat." Isu a nagtalinaed ni Urias iti Jerusalem iti dayta nga aldaw ken iti sumaruno nga aldaw. ¹³ Idi inayaban ni David isuna, nangan ken imminom isuna iti sangoananna, ket binartek isuna ni David. Iti dayta a rabii, rimmuar ni Urias tapno maturog iti pagiddaanna a kaduana dagiti adipen ti apona; saan isuna a bimmaba iti balayna. ¹⁴ Isu nga iti kinabigatanna, nagsurat ni David kenni Joab, ket impatulodna daytoy iti ima ni Urias. ¹⁵ Kinuna ni David iti suratna, "Ikabilmo ni Urias iti sango iti nainget a gubat, ket umadayokayo manipud kenkuana tapno matamaan isuna ket matay." ¹⁶ Isu a bayat ti panangbuya ni Joab ti panakaraot iti siudad, pinagpuestona ni Urias iti disso nga ammona a paggubatan dagiti kapipigsaan a soldado kadagiti kabusor. ¹⁷ Idi rimmuar dagiti lallaki iti siudad ket nakirangetda iti armada ni Joab, natumba ti sumagmamano kadagiti soldado ni David, ket natay met sadiay ni Urias a Heteo. ¹⁸ Idi nangibaon ni Joab iti damag kenni David iti amin a napasamak maipapan iti gubat, ¹⁹ binilinna ti mensahero a kinunana, "No malpasmo nga ibaga iti ari ti amin a banag maipapan iti gubat, ²⁰ nalabit a makaungetto ti ari ket kunananto kenka, 'Apay nga immasidegkayo unay iti siudad a makiranget? Saanyo kadi nga ammo nga agpanada manipud iti pader? ²¹ Siasino ti nangpatay kenni Abimelec a putot ni Jerobaal? Saan kadi a maysa a babai ti nangipuruak iti gilingan a bato kenkuana manipud iti pader, isu a natay isuna idiay Tebes? Apay nga immasidegkayo unay iti pader?' Ket kastoyto ti isungbatmo, 'Natay met ti adipenmo a ni Urias a Heteo.'" ²² Isu a pimmanaw ti mensahero, napan kenni David ket imbagana amin nga imbilin ni Joab kenkuana. ²³ Kinuna ti mensahero kenni David, "Idi un-unana, napigpigsa dagiti kabusor ngem kadakami; rimmuarda ket dimmarupda kadakami idiay tay-ak, ngem naabogmi ida a pasubli iti pagserrekan ti ruangan." ²⁴ Manipud iti tuktok ti pader, pinana dagiti pumapana dagiti adipenmo ket napapatay ti sumagmamano kadagiti adipen ti ari ken napapatay met ti adipenmo a ni Urias a Heteo" ²⁵ Kinuna ni David iti mensahero, "Ibagam daytoy kenni Joab, 'Saanmo nga ipalubos a paglidayennaka daytoy, ta alun-onen ti kampilan ti maysa kasta met ti sabali. Papigsaenyo pay ti pannakirangetyo maibusor iti siudad, ket dadaelenyo daytoy,' Ken pabilegem ni Joab." ²⁶ Isu nga idi nangngeg iti asawa ni Urias a natayen ti asawana, nagdung-aw isuna iti nakaro para iti asawana. ²⁷ Idi nalpasen ti panagladingitna, nangibaon ni David ket inyawidna ti babai iti palasiona, nagbalin isuna nga asawana ket nangipasngay iti maysa a lalaki. Ngem saan a naay-ayo ni Yahweh iti inaramid ni David.