1

1 ز پولوس، زندونیِ عیسی، وُ تیموتائوس، گِوو ایما به رفیق عزیز و همکار ایما فیلیمون، 2 به دَدو ایما آپفیا وُ هُمرزم ایما آرخیپوس، وُ به کلیسایی که مِنه حُووِت اَنجوم اِبووِه. 3 فَیض وُ سلومتی ز جانوُوِه خدا بُووِه ایما، وُ خداوند عیسی مسیح وُر ایسا بُوه. 4 مو وا به یاد آوُردِنِت مِن دعاهام، همیشه خدانه شکر اِگوم. 5 به ای خاطر که توصیف ایمانت وِخداوند عیسی وَ مَحبتت وِهمه مقدسین اِشنُفُم. 6 دعامویونِه که مشارکت ایمُونت خَیلی کارساز آوُیده، تونِه وِ شناخت هر قابلیت نیکویی رهنمون ایبوِن که سی جهت رسیدن به قامت مسیح مِن ایمانِه. 7 مَحبتت مُونِه خَیلی شاد وُ دلگرم کِرده، چون تو به دلا ایما مقدسین طراوت وُ تازگی بخشیدی. 8 سی هِمیو،هر چَندَم مِنِ مسیح ای دِلِیرینِه دارُم که به اَنجُمِ اوچی که لایُقِه دستور بدُم، 9 ترجیح اِدُم که وُر اساس مَحَبت خواهش بُکنُم. پَه مو، پولوس پیر، که حالا هَم زِِندونی مسیح عیسام، 10 درباره کُرُم اونِسیموس که مِنِ زِندون بُوش اُبیدُم، تمِنایی زِت دارُم. 11 هو مِنِ گذشته سیت بِیفایده بید، اما الآنه هم سی تو هم سی مو فایده داره. 12 هو که پاره تَنِ مونِه دُوارته اِفِرستومش طَیِِ تو. 13 اِخواستوم طَیِ خوم بِیلومِش تا مِدَتی که سی دل انجیل مِنِ بندُم، سهم تونَه مِنه خذمته به مو به عهده بِگِره. 14 اما نخواستُم کاری بدون موافقت تو کِردِه بووُم، تا خوبیت زِ رِی مَیل بوُه، نه به زور 15 بساکوم سی هِمیو یَه مِدَتی زِتوجدا وُبی تا سی همیشه طَیت وُر گرده، 16 اما دیه نه جورِ نوکر، بلاکوم بالاترزهو، جورِیَه گِوعزیز. هو سی مو خَیلی عزیزه، اما سی تو عزیزتره، خواه مِنِ مقام یه انسان وُ خواه مِنِ مقام یَه گِو مِنِ خداوند. 17 په اَیَر مُونَه رَفیق خوت اِدونی، هُونه همیطَو قِوُول کن که مونَه قِوُول کِردی. 18 اَیَر خطایی وِ تو کِرده یا یَه چی وِتو بِدِکارِ، هُونَه وِ حِساوِ مُو بنه. 19 مُو، پولُس، وِ دستِ خوم اِنِویسُم که هُونَه جبران اِکونُم. البت نیازی نیبینُم بُگوم که تو جُونِ خوتَه به مو مدیونی. 20 ها ای گِو، آرِمون دارُم مِنِ خداوند منفعتی زِ تو وِ مو برسه؛ پَه جوونِ مونَه مِنِ مسیح تازه کن. 21 یُونه اِنویسُم سی یو که زِاطاعت تو اِطمینون دارُم وَ اِدوُنم حتی بِیشتر ز اوچی که اِگوم، اَنجوم اِدی. 22 ضمن یوکه، یَه تُویی سی مواَماده کن، سی یو که امید دارُم سی دله دعاهاتون وِ ایسا بخشیده وابوم. 23 اِپافراس، هُمزِندوُنی مو مِنِ مسیح عیسی، وِت سلام اِیفرسته. 24 همچونو همکارام، مَرقس، آریستارخوس، دیماس و لوقا وِتو سلام اِگون. 25 فَیض خداوند عیسی مسیح وا روح ایسا بوُوِه.