¹ Ole nkela wukwanyulani neera awaaka wuuwananani. Nlipihere essiri tjo mpooma, n'wehawehe eparapara n'yo, wiilipihere, wathukumane anakhotto aa. ² Kontha Pwiya neera avussavusseraka omwene wa Jaco, toko omwene wo Israel, okhala wiira atakhali ahokwanyula tja miritta tjo miri. ³ Eyitjakihero yaanakhotto aa olipessa tjosheerya ni alopwana owivahenra ari owaratja tjosheeryaru; ekaruage tjaya tjineera tjaaryaka ni yumatjaya nihuku nowithenkatja ni mavaka omiri owinva aneera yenyeenyaka ntjulo. ⁴ Ekaruage tjaya tjineera tjeettaka tjinene mphironi, tjineera tjeettaka wowakuviaawene wakhula mphantti ephiro tjowaatapuwa. Ayena ari toko mwenke, anthyawa toko overunya. ⁵ Yoole nkela wukwanyulani naawiihana anatoropa awe; ayena anakwathulana nthu ninkhuawe mphironi wa. Ekhikitjero yowaatapuwa eri thayaari wo pheela wikhikitjera wa yeela ekotto eela. ⁶ Tjinvarenla maatji tjaahokhala tjithukuliyaka ni eparassa ehokhala yookuanyuwa. ⁷ Apwiyamene ahokhala oruliya ekuwo tjaya ni yahokussiya orwa othukeliya; ananteko aya athiyana anaathukumela toko ekhuntta, yitjattaka m'mapeleni waya. ⁸ Ninive ri toko mapuro ansunkiya maatji yiikhumaka, napoovo aya ethyawaka toko maatji oovira. Akina ekhuwelaka: "Mweemele, mweemele", maasi khaavo noweha ottuli. ⁹ Nkusse eparata, nkusse ewooru, kontha khiivo emalelo wa yoole owaarya wa tjithu tjoreera tjo Ninive. ¹⁰ Ninive khiivo ethu ni ori wookwanyuwatja. Mirima wa athu oteene tjinatothua, makutha athu oteene tjineera tjithukumelaka, otjukula ori wa athu oteene; ekhove tjaya tjiri tjootjukuliha. ¹¹ Ori vai, n'navaa, mwiithe wa akharamu, nipuro akharamu oyevatja anlyaaya, nipuro kharamu ni havara oneettettaaya, ni assaana aya, nipuro nihinoovaaya ethu? ¹² Kharamu anawantaka tja nthu warwaanela assana awe; yena anawinva yovarihiya warwanela ahavara, anatjariha makhuku awe enama tjovarihiya; n'mwiitheni waya, karakaasa tjoyevihatjiya. ¹³ "Nkoona, Mi akonopheela" ala moolumo aPwiya Anakhotto. "Kinaahala opaha ekaro tja wa mwiissini, ni katana aka kinaahala owinvakatja akharamu oyevatja oteene. Mi kinaahala waamalamaliha owavarihaa onlaponi waa, matjuu wa yaale anaarumaa khan'hala winwiyatho".