¹ Nulumo nakhenlalyaawe profeta Habacuque: ² "Pwiya, mpaka nihukuni onkelaka okhuwela okhaviheriya, ni Nyu khamwin'hala win'wa? Kin'nookhuwelani: "Mahuviho", maasi Nyu khan'nokoopola. ³ N'nokothonyiherani etampi ni koonaka tjoonyalya? Okwanyuliya ni mahuviho ari ohoolo waka; ohokhala ohin'wanana ni oneera okhumenlaka onyakulihana! ⁴ Phimaana, Ekettelo khitharihenlya ni essariya kinkhala mahuku mentji. Thivo atakhali anawuurerya anassariya; phimaana, enkhumenlaaya essariya yohitjuwania". Pwiya ahomwaakhula Habacuque: ⁵ Nkaweha elapo ni woone; wuutjiveleke! Kontha kinaahala opaka ethu mahuku aa ahinkela okupali wankela ohimeeriya we. ⁶ Kontha, nkoona! Kim'pheela wawiiha macaldeu, elapo yowoopiha ni yootjatja ele, eneetteetta n'yaatapuwelo ni yo elapo, wo wiira yakusse enupa tjihiri tjawaya. ⁷ Ari athu owoopiha ni owooviya; waa yena onaakhala mahukhumu aya. ⁸ Ekhavalo tjaya tjinaathiawa tjinene toko havara, tjowakuva toko mwiitji wiiripelaka. ekhavalo tjaya tjinaweetta ni aneettiha ayo ankhumamapuro ottayi; ayena anaavava toko assaaka anakuvenla olya. ⁹ Oteene waya an'waana mahuviho, athu aya anrwa toko ephyo yo muuthakoni ni ayena anawaathukumaniha ananthukiya toko n'haava. ¹⁰ Vano, ayena anawaatarawa mamwene, ni ahooleli ari toko ethu paahi tjomatarawo wa ayena. Ayena anathya wa kuta elipihero, kontha anathakumaniha elapo n'yo ni phukussaka. ¹¹ Vano, ephyo enkela weetta wo waakuvya ni enaaviraayena alopwana ahinoova nlattu, kontha nluku phikuru waya". Habacuque ahakohatho Apwiya: ¹² "Nyu khan'nowa okathi wokhalayi, Pwiya, Muluku aka, Ttakattiifu aka? Hi khaninkhwa. Pwiya harwanela wiira enamuliye, ni Nyu, Mwala, n'howiiha wiira nvaanyihe. ¹³ Mentho en'nyu ari oreera tjinene wo wiira yoone tjoonyala, ni Nyu khan'nowerya woona etampi. Essiyani, vano, Nyu waawehaka tjinene yaale ahinowinwenlani? N'nomaalelani, n'woonaka atakhali yaamiryaka yaale ari ossariya owavikana ayena? ¹⁴ Nyu n'nawapaka athu toko ehopa tjo mpahari, toko enama tjihirina nthu opheela waahoolela. ¹⁵ Ayena anavuwa oteene waya ni ereetja; anawaapurula alopwana ni mathavi aya ni anawaathukumaniha mwinthavini waya yo wapurula. Phimaana, ayena anaatteliya ni anaathapa. ¹⁶ Phimaana, anavaha nkutho wa nthavini waya ni anaapaha elumpani omwinthavini waya, kontha ni mathavi yaayo phinkhalaaya saana, eyolyaaya enkhala yoreera! ¹⁷ Kiireke wiira, ankela waahuviha ni mathavi aya ni yinvaka elapo yoteene, wo hiwoonela ekiriri?".