¹ Apwiya yaahomwiirela Noe: Orwee nkalawani, we naasimutjyaa ooteene, kontha kihoona wiira khunatanpi. ² Wakhula enama, onaahala okussa saapa tjoolopwana ni saapa tjeethiyana; ni, enama tjoohiphwanela, yoolopwana niiyo yoothiyana. ³ Niinuni tjowiirimu, on'hala okussa saapa tjoolopwana ni saapa tjoothiyana, wiira yamala epaluweyo tjihale tjikumi. ⁴ Kontha womahuku saapa, kinaahala okurussa epula yomahuku arupayini othana noohiyu. Kinaahala otankulatja tjitthu tjooteene tjovathi tjunpalyaaka. ⁵ Noe aahovara tjooteene tjiireliyaawe naaPwiya. ⁶ Wawaalyaaya epaluwa Noe iira narina eyaakha emiya sita. ⁷ Noe aahokela nkalawani naasaanaawe naamwaarawe naasaara aasaanaawe, mwaha womaatji opaluwa. ⁸ Enama tjoophwanela nitjoohiphwanela, enuni, nitjooteene tjeetta vathi, ⁹ tjaakhala piili piili, yoolopwana ni yeethiyana, tjaahorwaa wa Noe ni tjaahokela nkalawani, phanka Nluku tjaamwiirelalyaawe Noe. ¹⁰ Waviralyaaya mahuku saapa, etthaya yaahomiriya naimaatji. ¹¹ Noe owakathi waarinaawe eyaakha emiya sita, mahuku khuumi nasita womweeri wonamiili, tjaahokwanhuwatja epahari tjooteene, mikhora tjowiirimu tjaahotthukuwa. ¹² Epula yaahantja orupa nimaatji yaahotjara vatthayani womahuku arupayini othana noohiyu. ¹³ Nihuku nen'no, Noe aahokela nkalawani naasaanaawe Sem, Cam ni Jafe, amwaara aNoe naasaara asaanaawe. ¹⁴ Ayenatja, niinama tjooteene, wonayeeli niikhalelwaaya, enama tjooteene tjoohuwiya, nimakhalelwaaya, wakhula enama yeetta vathi, niikhalelwaaya, ni wakhula yowunpiya yaarina mapupha. ¹⁵ Wakhula enama tjaakhala piili piili tjinarina okumi tjaahorwaa wa Noe ni tjaahokela nkalawani. ¹⁶ Enama tjaakelale tjaari tjilopwana ni tjithiyana; Tjaahokela phanka Nluku tjaahimyalyaawe. Vano, Apwiya yaahotthuka nkhora. ¹⁷ Ni yaahowa epaluwa vathi, womahuku arupayini, ni maatji yaahontjeryaa jikalawa yaahovussiya vathi. ¹⁸ Niitthaya yooteene yaahomiriya nimaatji, ni ekalawa yaahokala vatjulu maatji. ¹⁹ Maatji yaahontjryaa tjinene vathi nimyaako tjoorekamessa tjaari vathi erimu tjaahomiriya . ²⁰ Maatjyaayo anavikanale mwaako yaahaana emeeturu khuumi nathanu. ²¹ Apinaatamu ooteene yaari vathi yaahokhwa: enuni, enama tjovapuwani, tjntakhwani, naatthu ooteene. ²² Tjooteene tjaamumula niikumi ni ooteene yaari vatthayani yowuuma yaahokhwa. ²³ Vano, atthu ooteene yaakhala vathi yaahokwanhulatjiya, okhuma atthu npaka enama, niinuni tjowiirimu. Ooteene yaahorimeela vathi. Yaahanle paasi phiNoe naale yaarinaawe n'hina mokalawa. ²⁴ Maatji yaahohala oweemela mahuku emiya wohanssiini.