¹ Ala phaamutji aAdao. Nihuku Nluku waamunpalyaawe ntthu, Yena aapankale phanka tjiryaawe. ² Yena aahomunpa nlopwana ninthiyana, aahaareerihatja ni aahowiihanatja apinaatamu. ³ Adao aahokhala eyaakha emiya wotalaathiini, aahon'yara mwaana phanka yena, ni aahomwiihana ntjina naSete. ⁴ Adao wan'yaralyaawe Sete, aahokhala eyaakha emiya naane ni ahaayara asaana assilopwana naasithiyana. ⁵ Adao aahokhala eyaakha emiya khentta wotalaathiini; ni phaakhwaawe. ⁶ Sete aahokhala eyaakha emiya nathanu ni aahon'yara Enos. ⁷ Wan'yaralyaawe Enos, Sete aahokhala eyaakha emiya naane ni aahaayara assaana assilopwana naasaana assithiyana. ⁸ Sete aahokhala eyaakha emiya khentta wokhuumi napiili; ni phaakhwaawe. ⁹ Enos aahokhala eyaakha hanssiini naarupayini ni aahon'yara Quena. ¹⁰ Wan'yaralyaawe Quena, Enos aahokhala eyaakha emiya naane wokhuumi nathanu ni aahaayara asaana assilopwana naasithiyana. ¹¹ Enos aahokhala eyaakha emiya naane nathanu; phaakhwaawe. ¹² Quena aahokhala eyaakha sapiini ni aahon'yara Maalalel. ¹³ Wan'yaralyaawe Maalalel, Quena aahokhala eyaakha emiya naane waarupahini phaayaraawe asaana. ¹⁴ Quena aahokhala eyaakha emiya khentta wokhuumi; phaakhwaawe. ¹⁵ Maalalel aahokhala eyaakha suthwiini nathanu ni aahon'yara Jarede. ¹⁶ Wan'yaralyaawe Jarede, Maalalel aahokhala eyaakha emiya naane wotalaathiini ni ahaayara asaana. ¹⁷ Maalalel aahokhala eyaakha emiya naane wohanssiini waarupayini nathanu; phaakhwaawe. ¹⁸ Jarede aahokhala eyaakha emiya wosapiini napiili ni aahon'yara Enoque. ¹⁹ Wan'ralyaawe Enoque, Jarede aahokhala eyaakha emiya naane ni aahaayara asaana. ²⁰ Jarede aahokhala eyaakha emiya khentta wosuthwiini napiili; phaakhwaawe. ²¹ Enoque aahokhala eyaakha suthwiini nathanu ni aahon'yara Matusalem. ²² Enoque aaheetta niNluku. Wan'yaralyaawe Matusalem, Enoque aahokhala eyaakha emiya tthaaru ni aahaayara asaana. ²³ Enoque aahokhala eyaakha emiya tthaaru wosuthwiini nathanu. ²⁴ Enoque aaheetta niNluku, ni aahorimeela, kontha Nluku aahonkussa. ²⁵ Matusalem aahokhala eyaakha emiya naane wothamaaniini nasaapa ni aahon'yara Lameque. ²⁶ Wan'yaralyaawe Lameque, Matusalem aahokhala eyaakha emiya saapa wothamaaniini napiili ni aahaayara asaana. ²⁷ Matusalem aahokhala eyaakha emiya khentta wosuthwiini nakhentta; phaakhwaawe. ²⁸ Lameque aahokhala eyaakha emiya wothamaaniini napiili ni aahon'yara mwaana, ²⁹ amwiihan'nyaawe Noe, iiraka: Ola phin'hala onimaaliha nimiteko tjon'matataniwihu, tjaakhumenlale mwaha wotthaya Apwiya etakhalin'hyaaya. ³⁰ Lameque aahokhala eyaakha emiya thanu wohansiini naarupayini nathanu phan'yaraawe Noe ni phaayaraawe asaana. ³¹ Lameque aahokhala eyaakha emiya saapa wosapiini nasaapa; phaakhwaawe. ³² Noe ahokhala eyaakha emiya thanu phan'yaraawe Sem, Cam ni Jafe.