¹ Jose aahokhuma okonttonkela Farao: Athumwanaka naassihimaaka, enamatjaya nitjitthu tjooteene tjirinaaya tjihophiya elapo yooCanaa; vano n'natjo elapo yooGosen. ² Yena aahathanla assihimaae athanu ni aahaarweeha wa Farao. ³ Farao aahowiirela assihimaawe Jose: Nrinatja nrittani? Ayenatja yaahaakhulatja: Anantekweenhu ahakheli opwittipwitthi, phanka atthweehu okhalayi. ⁴ Vano, ayenatja yaahiiratja: Niwaale wiira nikhale moomu, kontha elapo yooCanaa etaleeyo yuulupale ni khaavo mapuro oopheela oliha enama tjaanantekweenhu. Vano, n'natjo, sontte, waahiye anantekweenhu akhale elapo yooGosen. ⁵ Vano, Frao aahomwiirela Jose: Athumwanaa naassihimaa ahooweelatja. ⁶ Elapo yowiigiipitu eriniwe. Wowiira athumwanaa naassihimaa akhale elapo yomaana, elapo yooGosen. Wantjuwela ntthu oophwanela waayenatja omwiirele ahoolele enamatjaka ⁷ Vano, Jose aahaawaana athumwaane waathoonha waFarao. Jaco aahonreeriha Farao. ⁸ Farao aahonwiirela Jaco; Orina eyaakha kavi? ⁹ Jaco aahomwaakhula: Eyaakha tjeettalyaaka nlaponi tjiri emiya wotalaathiini. Eyaakha tjeekumyaaka tjiri vakaani. Khatjittalinve phanka atthu okhalayi. ¹⁰ Ni Jaco aahonreeriha Farao ni aahokhuma waaryaawe. ¹¹ Jose aahaakhikitjera athuwaane naassihikaawe. Yena aahaavahatja mapuro elapo yowiigiipitu, yooreeressa yeelapweeyo, elapo yoRemesses, phanka Farao tjaahimyalyaawe. ¹² Jose aahokuha eyoolya aavahaka athuwaane naassihimaawe niinupa ooteene yaathumwaane, phanka asaanaawe tjaaryaaya. ¹³ Elapweele yooteene khayarivo eyoolya, kontha etala yaari yuulupale. Elapo yowiigiipitu ni oCanaa yaahotteetthyaa mwaha wotala. ¹⁴ Jose aahokhupa nssurukhu wooteene waari elapo yooCanaa ni wiigiipitu, atumihaka tjitthu tjaarivo, vano Jose aahokussa nssurukhu arweehaka waFrao. ¹⁵ Wamalalyaaya nssurukhu wolapo tjoopiili, atthu ooteene owiigiipiu yaahowa waJose yiiraka: Onivahe eyoolya! Naahala okhwa ohoolowa kontha khaninanssurukhu? ¹⁶ Jose aahowaakhulatja: Wakhala wiira nssurukhweenhu ohomala, n'waane enamatjinhu mwaakakhaniheke niiyoolya. ¹⁷ Vano, ayenatja yaahowaana enamatjaya waJose. Jose aahaavahatja eyoolya aakakhanihaka niwakhula enan'na yonama. Aahaalihatja mwaakhoole wooteene. ¹⁸ Wamalalyaaya mwaakhoole, yaahowaatja waJose, mwaakha nkhwaawe, yiiraka: Khanin'hala waavitha aPwiyeehu wiira nssurukhweehu ohomala, ni aPwiya an'nowiiha enamatjihu. Khiivo ehanle owiitho waaPwiya, woohikhala erutthutjihu niilapotjihu. ¹⁹ Naahala okhwela essiyani, hi niilapotjihu wameethoniwinhu? Okusse elapotjihu vowaakakhaniha niiyoolya ni nin'hala okhala ananteko aFarao. Onivahe epyoo wiira nikhale ni nihikhwe ni elapo ehaakulele otteetthyaa. ²⁰ Tjitjon'mo, Jose aahokussa elapo yooteene yowiigiipitu wiira anvahe Farao. Khula ntthu aahotumiha mathalaawe, kontha etala yaari yuulupale. Weenan'na yeeyo, elapo yaahokhala yaFarao. ²¹ Ni atthwaale yaahokhala epottha. ²² Mathala yahathumalyaawe aanankuttho, kontha anankuttho yaavahiya mathala oyoolya. Ayenatja yaalya nmathalani yaavahiyaaya ni Farao. Phimaana, khaatumihale mathalaaya. ²³ Jose ahowiirela atthu: Nkawehani, kihoothumani ni kihonthumea Farao elaptjinhu. Vano kinawoovahatjani epyoo mwaaleke. ²⁴ Owakathi woohepha nphantte woneethanu n'nohala on'vaha Farao ninphantte woneetjesse phin'hala okhala yawinhu, yoopheela waala ni waaliha assimutjiinhu naassaaneenhu. ²⁵ Ayenatja yaahaakhula: Nhu n'hoopola ekumitjihu. Nihophwanha mahala wameethoniwinhu. Nin'hala okhala epottha tja Frao. ²⁶ Vano, Jose aahopanka nlamulo elapo yowiigiipitu nihimanle npaka nihuku nolelo: Nphantte woneethanu waFarao. Mathala aanankuttho phahikhanle aFarao. ²⁷ Tjitjon'mo Israel aahokhala elapo yowiigiipitu, oGosen. Atthu yaahophwanha mapuro. Ayenatja yaahoruweryatja ni yaahoyaranatja ventji. ²⁸ Jaco aahokhala elapo yoowiigiipitu eyaakha khuumi nasaapa, vano, eyaakha tjeekumi tja Jaco tjaari emiya waarupayini nasaapa. ²⁹ Waattamenlalyaa mahuku oopheela okhwa Israel, aahomwiihana mwaamwanawe Jose ni aahomwiirela: Wakhala wiira kinawoophwanhera mahala, okikhuluvelihe nroromelo. Sontte ohikissikhe wiigiipitu. ³⁰ Kakhwavale naassithumwanaka, okirweehe nipuro nkhwaawe ni okissikhe nan'nathumwanaka. Jose aahowaakhula: Kinaahala opanka phanka tjihimyaleenhu. ³¹ Israel aahiira: Olaphe, ni Jose aaholapha. Vano, Jose aahooromela wiimuru nkoryaawe.