¹ Vano, Jose khaakhwitiri wiikhikitjera ohoolo waananteko yarinaawe. Ni aahuulumatja nintjuu nuulupale: Ooteenetjinhu, nkiiwatje. Khaavo nanteko hata n'motja aari niyena, owakathi Jose waaryaawe naasun'nawe. ² Yena aahunla tjinene, atthu owiigiipitu yaahiiwa naatthu ooteene yaakhala waFarao yaahiiwa. ³ Jose aahowiirela assihimaawe: Mi kiJose. Athumwanaka nanlelo akumi? Assihimaawe khaakhwitirale omwaakhula kontha yaanaamoovatja. ⁴ Vano, Jose aahowiirela assihimaawe: Sontte nkaattamenlatje. Vano, ayenatja yaahomwaattamenla. Yena aahiira: Mi kiJose, muulupaleenhu, yooyo ntumihaleenhu elapo yowiigiipitu. ⁵ Ohooriipeni nrima, wala n'hitjukulatje mwaha wookitumiha, kontha waari ossunkawinhu ekumitjinhu Nluku hokiveleeliha ohoolowinhu. ⁶ Eyaakha piili, enaahala okhala etala elapweela ni tjinaahala ovira eyaakha thanu woohilimiya wala ohephiya. ⁷ Nluku hokiruma wiira kiwehawehe malokweenhu nlaponi noowehaweha ekumitjinhu nootaphuwatja ventji. ⁸ Vano, khan'nakhala tinhu nkiwiihale, massi Nluku; ni yena naakikhalihaka athumwaane Farao, n'hooleli onupaawe yooteene ninkhulupale olapo yooteene yowiigiipitu. ⁹ Mwaakuvatjenre waathumwanaka ni mwawiirele: Mwaamwaninhu Jose niiratjo: Nluku holikhaliha nkhulupale owiigiipitu. N'waatje waryaaka n'hirupatje. ¹⁰ N'nohala okhalatja elapo yooGosen ni n'nohala okhala nimi, nhu naasaaneenhu naassaana aasaaneenhu ni tjitthu tjooteene tjirineenhu. ¹¹ Kinaahala woolihatjani, wiira n'hihuvatje, nhu, nupeenhu nitjitthu tjooteene tjirineenhu, kontha tjinaahala ovira eyaakha thanu tjotala. ¹² Nkawehani, meethweenhu an'noona, ni meetho amwaamun'nenhu Benjamim, ari phamalakwaaka anuuluma ninhu. ¹³ N'naahala waatjuweliha athumwanaka watjitthu tjooteene tjoonaleenhu. Mwaakuve waawaana athumwanaka. ¹⁴ Yena aahaataana nimwaamun'nawe Benjamim ni ooyeeli yaahunlatja oovarelana. ¹⁵ Yena aahaavaha etjwaatjwaa assihimaawe ooteene, unlaka. Waviralyaaya eyo, assihimaawe yaahohala niyena. ¹⁶ Nlamulon'no naakumiheriye owanuwawe Farao: Assihimaawe Jose yaahophiyatja. Yeeyo yaahontjivela Farao naanantekwaawe. ¹⁷ Farao aahomwiirela Jose: Waahimeerye assihimaa: Akussatje enamatjaya arwee elapo yooCanaa. ¹⁸ Mwaarweele athumwaninhu naassimutjiinhu ni n'waatje waryaaka. Kinaahala woovahani elapo yooreera nin'naahala olya tjoreera tjovathi. ¹⁹ Mwiirelatjetho, akusse mikukuttha tjolapo yowiigiipitu tjaassaaneenhu naasaarinhu. Mwaahaane athumwaninhu. ²⁰ N'hikutakuthyee mwaha wotjitthutjinhu, kontha elapo yooteene yowiigiipitu en'hala okhala yawinhu. ²¹ Asaana aIsrael yaahopanka tjitjon'mo. Jose aahaavahatja mikukuttha, phanka Farao tjaahimyalyaawe, ni aahaavahatja tjitthu tjokwahaaya. ²² Ooteenetjaya aahaavahatja ekuwo, massi Benjamim aahaavahatja emiya tthaaru tjoparatha niikuwo. ²³ Athumwaane aavahale: Ekavalo khuumi tjoopakhira tjitthu tjooreera tjowiigiipitu; ekavalo khuumi tjoopakhira etthaka, ephaawu nitjitthu tjikhwaawe tjokwaha tjaathumwaane. ²⁴ Vano, yena aahaaveleeliha assihimaawe ni yaahorwaatja. Ni aahowiirelatja: N'hithukatje ninttala. ²⁵ Yaahokhumatja wiigiipitu ni yaahorwaatja elapo yooCanaa, elapo yaathumwanawe Jaco. ²⁶ Ayenatja yaahomwiirelatja Jaco: Jose nanlelo nkumi, ni yena phin'hooleli olapo yowiigiipitu. Ni nrimaawe waahokhala ootuthuwa, kontha yena khaahala waamini yaahimiya. ²⁷ Yaahohimeeriya tjitthu tjooteene Jose tjaahimyalyaawe. Jaco wawehalyaawe mikukuttha tjaaveleelihiye ni Jose wiira akusse, n'nepa waathumwanawe waahotteeiya. ²⁸ Ni Israel aahiira: Wahophiyera. Mwaamwanaka Jose nanlelo nkumi. Kinaahala okoomoona kihinakhwa.