¹ Etala yaari yuulupale nlaponi. ² Wamalihalyaaya eyoolya yaawaanalyaaya wiigiipitu, yaahowiirelatja athumwanaya: Nrwaatjetho mwathume eyoolya. ³ Juda aahomwaakhula: Nlopwana aahonaateeliha: Khan'noonatho ekhovyaaka, mwaamun'ninhu aahikhale ninhu. ⁴ Mwanivaha mwaamun'nihu, ninaahala owaana eyoolya. ⁵ Mweehinivahe khanin'hokolyaa. Kontha nlopwanooyo phiiralyaawe: Khan'noonatho ekhovyaaka, mwaahin'waane mwaamun'ninhu. ⁶ Israel aahiira: Opankenleni tjo, wiiraka kihaana mwaamun'naka nkhwaawe? ⁷ Ayenatja yaahaakhulatja: Nlopwanooyo aahokohakoha mwaha waamutjiihu. Yena aahiira: Athumwanitjinhu nanlelo akumi? N'haanatja mwaamun'ninhu nkhwaawe? Yaahaakhulatja phanka tjaakohiyaaya. Mwaahala otjuwela tjani wiira phaahalaawe wuulumatja:Munwaanatje mwaamun'ninhu? ⁸ Juda aahomwiirela Israel, athumwaane: Munkussatjeke mwanlopwanooyo. Ninaahala orwaa wiira nikhale ni nihikhwe, okhuma hiivano, nhuuva, naassaaneenhu. ⁹ Kin'hala okhala nkhuluvelwaawe ni n'naahala okikhaliha nkhulupale. Keehinwaane, kinaahala okhala ookossa woohimala. ¹⁰ Nahaapitjale , weekhweeli naakowiiraka nihaakulela emaara yonapiili. ¹¹ Athumwanayatja, Israel, aahowiirelatja: Wakhala tjitjon'mo, npanke yeeyo. Nkussatje mihakhu tjooreeressa mweerwaaka. Munkussere nlopwanooyo phanka yoovahiya: ¹² Nkussatje nssurukhu. N'hokolosse nssurukhu waahokolossiye owakathi waatthukuliye mirinttitjinhu. ¹³ Nrwaatjeke ni munkussatjeke mwaamun'ninhu. ¹⁴ Nluku oowerya tjooteene awoonelatjeni ekiriri ohoolo wanlopwanooyo, wiira yena anleve mwaamun'ninhu nkhwaawe ni Benjamim. Kaakhiya asaana, kinkoohala voohaasaana. ¹⁵ Atthu yaahokussa tjoovaha ninssurukhu, vamotja ni Benjamim. Ayenatja yaahovuwatja ni yaahorwaatja elapo yowiigiipitu, ni yaahophiyatja waaryaawe Jose. ¹⁶ Jose wamoonalyaawe Benjamim naayenatja, aahomwiirela nkhulupalyaawe: Waakusse atthwaala waarweehe npaani, wiive enama alyaatje nimi, othana. ¹⁷ Nkhulupale aahopanka phanka Jose tjaahimyalyaawe. Yena aahaakussa atthwaale aarweehaka npaani mwa Jose. ¹⁸ Atthwaale yaanawoova mwaha wookela npaani mw Jose. Ayenatja yaahiiratja: Nlattu wonssurukhu ohokolossiye nmirinttiniwihu nkwaha woopatjera naawaaniyeehu, kontha nolpwanooyo npheelatja maniphwanhero. Yena naahala onitthukela phanka epotthatjawe, nookussa enamatjihu. ¹⁹ Ayenatja yaahomwaattamenla nkhulupale onupa ya Jose, ni yaahomwiirelatja wankhora wonupa, ²⁰ yiiraka: Ninaalitjera owa othuma eyoolya. ²¹ Waphiyaleehu onikhupini, mitthukulaka mirinttitjihu, nssurukhu wakhula ntthu wahi waakhala vatjulu. Nihohokolossatho. ²² Nihowaanatho nssurukhu wiira nithume eyoolya. Khninontjuwela ntthu eessale nssurukhu nmirinttiniwihu. ²³ Nkahulupale aahiira: Nrettele okhale ninhu, n'hoovatje. Nlukweenhu ni Nluku aathumwaninhu pheessale nssurukhu nmirinttiniwinhu. Kihaakhenla nssurukhweenhu. Vano, nkhulupale aahaawiihatjera Simeao. ²⁴ Nkhulupale ahaawaana atthwaale npaani mwa Jose. Yena aahaavahatja maatji, ni yaahorapihatja enhaatjaya. Yena aaholiha enamatjaya. ²⁵ Ayenatja yaahotthonkomanihatja tjoovahatjaya wiira Jose waahalaawe owa othana, kontha yaahiiwatja wiira an'haala olyatja nkhayi. ²⁶ Jose wawaalyaawe, ayenatja yaahowaanatja tjoovahatjaya tjaarinaaya nmatatanimwaya ni yaahonkokhorela ohoolowawe. ²⁷ Yena aahaakohatja iiraka: Athumwaninhu aniireenhu ahuuluvala, akumi? Ayena nanlelo akumi? ²⁸ Ayenatja yaahiiratja: Nantekweenhu, athumwanihu, akumi. Ayena nanlelo akumi. Ni yaahokokhoratja ni yaahooromatja. ²⁹ Wavussalyaawe meethwaawe, aahomoona Benjamim, mwaamun'nawe, mwaana aanumwanawe, ni aahiira: Ola phimwaamun'ninhu amwaatjen'nhu? Vano, aahiira: Nluku ooreeriheni, mwaamwanaka. ³⁰ Jose aahaakuvatja wiira akhume npaani, kontha aari noothunku mwaha wamwaamun'nawe. Yena aahorwaa nipuro okowunla. ³¹ Yena aahokhutja owiitho ni aahohokolya. Yena aahiira ekawiye eyoolya. ³² Ananteko yaahonkawela Jose nphanttyaaweru, naassihimaawe nphanttyaayaru. Ni atthu owiigiipitu yaari vaavale yaaholya bphanttyaayaru, kontha atthu owiigiipitu khayaalya naatthu oweebreu. ³³ Assihimaawe yookomale waaryaawe ni yookomihatjiye okhuma omuulupale npaka omwankaani, woottharenlana eyaakha. Ayenatja yaari ootikinihatjiya. ³⁴ Jose aahaavahatja eyoolya yaari ohoolowawe. Massi eyoolya ya Benjamim yaari weemaara thanu ovirikana naassuulupalyaawe. Ayenatja yaahovuryatja ni yaahotthapatja ni yena.