¹ Vano, Dina, mwaana Lia an'yaralyaawe ni Jaco, aahokhuma wiira aaatjuwele assaanaawe eelapweele. ² Siquem, mwaana Hamor, nkhulupa;e olapweele, aahomoona, aahonvara, aahonkussa ni aahonrupana. ³ Yena aahonssan'mwa Dina, mwaana Jaco, ni aahomuulumana wonpheela. ⁴ Siquem aahowiirela athumwanawe Hamor: Mwaakhwitiri athiyanaala akhale amwaaraka. ⁵ Jaco aahiiwa wiira yena honrupana Dina, mwaamwanawe. Assaanaawe yaari nmwiini niinamatjaya; Jaco aahomaala npaka wahokolyaatjalyaaya. ⁶ Hamor, athumwan Siquem, yaahokhuma wiira yamuulumane Jaco. ⁷ Assaanaawe Jaco yaahohokoleela nmwiini ni yaahiiwa yaakhumenlale. Ayenatja yaahorussatjiya, yaahotiinihatjiya kontha yena aahontakharyatja Israel, mwaha wonrupanatja mwaana Jaco, etthu yaahaaphwanela wiira enapankiye. ⁸ Hamor aahowiirelatja: Mwaamwanaka Siquem nanpheela mwaamwaninhu. Sontte munvahatje wiira akhale amwaarawe. ⁹ Mwaataane nihiivano, n'nivahatje assaaneenhu ninhu mwaakusse assaaneehu. ¹⁰ Nin'hala okhala nkhayi ni elapo eri thayaari wowiira nkhale, n'naahala omwiira nakosso npaka ophwanha mihakhutjinhu. ¹¹ Siquem aahowiirela athumwaane naassirokorawe Dina: Nkihiye kiphwanhe muupuwelelwaaya ni en'haleenhu okilepela kinaahala woovahani. ¹² Nkilepele en'haleenhu opheela mwaha wanthiyana owaapuleliya ni kinaahala woovahani en'haleenhu olepela, massi nkivahe nthiyanooyo akhale amwaaraka. ¹³ Assaana Jaco yaahomwaakhula Siquem ni Hamor, athumwaane, woohikhala, mwaha wa Siquem yanpankalyaawe Dina, mwanrokorayatja. ¹⁴ Ayenatja yaahiiratja: Khaninpanka tjon'mo: onvaha mwanrokorihu ntthu oohuula, enkookhala etthu yoohilika. ¹⁵ Etthu emotja enpheeleehu muulatje phanka hiivano, ni khula ntthu haana uulaka. ¹⁶ Vano, ninaahala woovahani assaaneehu nihi ninaahala waakussa assaaneenhu, ninaahala okhala nkhayi, ni nin'hala okhala nphwinko n'motja. ¹⁷ Massi mweehiniiwatje ni mweehuulatje, ninan'hokolossa mwanrokorihu. ¹⁸ Moolumwaala yaahobtjivela Hamor ni mwaamwanawe Siquem. ¹⁹ Nanttonpyoole khaapitjale noopanka yaahimyatjalyaaya kontha yena aanantjivela mwaana Jaco ni kontha yena aari ntthu oottittimihiya vatthokoni waathumwaane. ²⁰ Hamor ni mwaamwanawe Siquem yaahorwaa onkhora wopooma ni yaahuuluma naatthu ooteene, yiiraka: ²¹ Atthwaala ari ninrettele nihiivano, mwaahiye akhale nlaponimu ni mwaahiye amwiire nakosso, elapweela yuulupale. Naakusse assaanaaya akhale assaarihu ni naavahatje asssaaneehu. ²² Phaari phiitthu emotja atthwaale yaatthunalyaaya wiira akhale nihiivano nookhala nphwinko n'motja: Wakhala wiira khula ntthu namuula, phanka ayenatja tjiryaaya. ²³ Enama tjooteene khatjinakhala tjawinhu nimhahu khatjinakhala tjawinhu? Niiwananeke, vano, anaahala okhala nihiivano. ²⁴ Atthu ooteene opoomeele yaahomwiiwa Hamor ni Siquem, mwaamwanawe. Nikhula nlopwana aahuula. ²⁵ Nihuku noneeraru, yoonatjaka oweryaa nanlelo, assaana eeli a Jaco, Simeao ni Levi, assirokorawe Dina, yaahokussa ekatanatjaya, yaahokelatja woomalelyaa npooma ni yaahowiiva atthu ooteene. ²⁶ Yaahomwiiva Hamor ni siquem, mwaamwanawe, niikatana ni yaahonkumiha Dina ntthoko na Siquem ni yaahorwaatja. ²⁷ Assaana akhwaawe a Jaco yaahorwaa npaka waari mahithi ni yaahokussa tjitthu tjooteene tjonpooma kontha atthu ooteene khayanttittimihale mwanrokorayatja. ²⁸ Ayenatja yaahokussatja tjitthutjaya tjoteene tjaari npooma ni mooteene, ²⁹ mihakhutjaya tjooteene. Anamwane ooteene naassaaraya yaahovarakatjiya. Ayenatja yaahokussatja tjitthu tjooteene tjaari nmatthokoniwaya. ³⁰ Jaco aahomwiirela Simeao ni Levi: N'hokiwiiheratja mikutakutho tjintji, wowiira atthu olapweela akitanhifu. Okhala wiira niri vakaani, ayenatja yatakaneela wiira akiwanane, anaakikwanhulatja niitthokwaaka. ³¹ Massi Simeao ni Levi yaahiiratja: Siquem aahala onkhaliha mwanrokorihu phanka namararuwa?