¹ Abraao aahuuluvala, ni Apwiya yaahonreeriha Abraao weetthu tjooteene. ² Abraao aahomwiirela nantekwaawe, omuulupale ni aakhalenla tjitthutjae tjooteene tjaarinaawe: Weesenre ntatanaa nkatakatawaka, ³ ni kinaahala wooluphela waaPwiya, Nluku owiirimu ni Nluku ovathi, wiira khun'hala onkussa nthiyana onvahaka mwaamwanaka aassaana aacananeu, yaayo anaakalaaka. ⁴ Massi on'hala orwaa elapwaaka ni amuutjaaka ni onaahala onkussa nthiyana amwaamwanaka Isaque. ⁵ Nanteko aahomwiirela: ⁶ Athiyanaayo yeehitthune okitthara npaka elapweeyo? Kin'hokolossereke mwaamwanaa elapo ewaalyaawe? Abraao aahomwiirela: Ohin'hokolosse mwaamwanakooyo! ⁷ Apwiya, Nluku owiirimu, kikussale enupa yaathumwanaka niilapo yaamutjaaka ni kikhuluvelihale nuuluphela iiraka: Nlokonaa, kinaahala waavaha elapweela, Yena naahala oruma nlaikhanawe woohinaaya, ni onaahala onkussa nthiyana amwaamwanaka. ⁸ Massi, athiyanaayo yeehitthune wootthara, onaahala okhala ootaphuwa niyooluphelaaka. Massi ohin'hokolosse mwaamwanaka. ⁹ Vano, nanteko aaheesa moonuaawe nkatakata mwa Abraao, aPwiiyaawe, ni aahonluphela mwaha wonlamulo nen'no. ¹⁰ Nanteko aahokussa ekamelo khuumi tjaapwiiyaawe ni aahorwaa. Ni yena aahokussa khula etthu yooreerela yaapwiiyaawe. Aahovuwa arwaaka elapo yooMesopotamia, epooma yoNaor. ¹¹ Yena aahokhoromiha ekamelu tjooteene ota wopooma, waattamenla enro yomaatji, yootjootjilo, athiyana yeekhumaka orweela maatji. ¹² Ni aahiira: Pwiya, Nluku aaPwiyaka Abraao, nkivahe olelo yooreerela ni yoothoonhera wapwiyaka Abraao. ¹³ Kiri vaa, enro yomaatji, ni asaana aatthu oopooma anwoorika maatji. ¹⁴ Wiiranyee tjitjon'mo. Kamwiirela mwanthiyana: Sontte, nkurusse ntiiteenhu kivurye, ni yene phukiirela: ovuryeke kinaaha ovaha maatji ekamelutjaatootho, vano, yooyo aPwiya phinthalalyaaya wiira nantekwaa Isaque anthele. Tjitjon'mo kinaahala otjuwela wiira n'hothoonhera nreerelo waaPwiya. ¹⁵ Hinaaya omaliha wuulumatja, Rebeca aahowa nimaatjaawe wanikhatani. Rebeca aari mwaana Betuel, mwaana Milca, amwaara Naor, mwaamun'nawe Abraao. ¹⁶ Mwanthiyanooyo aahoreera, aari harussi. Yena aahorwaa omuro, aahorika maatji ni aahokhuma. ¹⁷ Vano, nanteko aahotthawenla ni aahomwiirela: Sontte, okimeele maatjaayo vakaani. ¹⁸ Yena aahiira: Nvuryeke Pwiya ni wowaakuvyaatja aahokurussela maatji nmatataniwawe ni aahovurya. ¹⁹ Wavahalyaawe maatji, aahiira: Kinaavaha maatji enamatjaa, npaka wan'malihaaya ovurya. ²⁰ Vano, yena aahaakuvatja arweelaka maatji makhwaawe oopheela ovurya enama. ²¹ Nlopwanoole aanoweha woomalelya wiira khweeli aPwiya yaari niyena. ²² Enama wamalihalyaaya ovurya, aahokussa ewooru, elemelelo yonuussu, niipulsseera piili nmoononiwawe, ephimelo khuumi tjowooru ²³ ni aahokoha: Omwaana apani? Sontte, okihimeerye, ohaavo opuro waathumwanaa nakhale ohiyu? ²⁴ Yena aahomwaakhula: Kimwaana Betuel, mwaana Milca ni Naor. ²⁵ Yena aahomwiirela tootho: Nihaana eyoolya yintji ninipuro noopheela okhala. ²⁶ Vano, nlopwana aahokokhoa ni aahon'vuwiha Pwiya. ²⁷ Yena aahiira: Ooreerihiya akhale Pwiya, Nluku aapwiiyaaka Abraao, ahihiyale waakhuluvela aPwiyaka. Apwiya ahokikussa npaka waasimutjaaya aPwiyaka. ²⁸ Vano, nthiyana aahotthawa okowaahimeerya amutji aanumwaane tjitthu tjooteene. ²⁹ Rebeca aahaana mwanrokorawe, ntjinanawe iihaniya Labao. Ni Labao aahotthawa npaka wanlopwana eemelale nparapaarani, waattamenla emuro. ³⁰ Owakathi woonalyaawe tjitthu tjowooru nmoonooni wamwaanrokorawe ni iiwaka moolumo amwanrokorawe Rebeca: Phikihimeeryalyaawe nlopwanooyo, yena aahorwaa npaka wanlopwanooyo, ni yooyo aattamenlale enamatjawwe. ³¹ Ni Labao aahiira: Nkaawa, ooreerihiya ni Pwiya. Weemelenleni otan'wo? Kihotthonkomaniha enupa ni opuro tjonamatjaa. ³² Vano, nlopwana aahorwaa npaka wapuwani ni aahotaphula enama. Eyoolya tjaahovahiya enama nimaatji yaahokumihiya wiira tjirapihiye enhaatjawe niinhaa tjaalopwana yaarinaawe. ³³ Mun'vahatje eyoolya, massi yena aahiira: Akinlya kihuulumatjale enpheelaaka ohimya. Vano, Labao aahiira: Nkuuluma: ³⁴ Yena aahiira: Kinanteko aAbraao. ³⁵ Apwiya aanonreeriha tjinene, ni yene naakhuluvela. Ayena aahonvaha epwittipwitthi niimope, eparatha niiwooru, ananteko alopwana naanaanteko athiyana, niinama enaná ekhwaawe. ³⁶ Sara amwaara aamwenyaaka, yaahuuluvala owakathi wan'yaraaya mwaana naayena. Ni yene aahon'vaja tjooteene tjaarinaawe. ³⁷ Amwenyaaka ahokilaphiha, yiiraka: Kunontheliha nthiyana mwaamwanaka asaana aacananeu, wayaayo anaakhalaaka. ³⁸ Ohiya vaa, orwee elapwaaka ni wankusse nthiyana onphwanela mwaamwanaka. ³⁹ Kaahowiirela amwenyaaka: Nthiyanooyo khankitthara. ⁴⁰ Massi ayena yaahokiirela: Apwiya yaale anaattharaaka, anaahala oruma nlaikha nikhale niwe, ni ayena anaahala wookhaliha munttalani, wowiira onkusse nthiyana amwaamwanaka ni wonupa yaathumwanaka. ⁴¹ Massi onaahala okhala saawa nuuluphelawaka ni warwaa waamutjaaka ni ayenatja phuwaateeliha nthiyanooyo. Onaahala okhala ootaphuwatja. ⁴² Vano, olelo kihophiya nkhayi emuro ni aahiira: Apwiya, Nluku amwenyaaka Abraaao, mwapheela, nkitthunihere nteko onpheelaaka ovara. ⁴³ Mi kirivaa, waattamenla maatji. Ntthunihe wiira nthiyana n'hala oweela maatji, kimwiirelaka: Sontte okimeele maatji kivurye, ⁴⁴ ni nthiyanooyo phukiirela: Ni kinaahala ovaha maatji enamatjaa, Pwiya akhale phinthiya nthanlelaleenhu mwaana aamwenyaaka. ⁴⁵ Kihinaaya omaliha wuuluma wanrimaniwaka, Rebeca aahowa nimaatjaawe wanikhatani ni aahokhuruwela nmuro wiira arike maatji. Vano, kaahomwiirela: Sontte, okimeele maatji kivurye. ⁴⁶ Yena wowaakuvyaatja aahorula maatji ni aahiira: Ovurye ni minaahala ovaha maatji enamatja. Vano, kaahovurya ni yena aahovaha enamatjaka maatji. ⁴⁷ Kaahonkoha kiiraka: Omwaana apani? Yena aahokaakhula: Kimwaana Betuel, mwaana Naor ni Milca. Vano, kaahon'wariha tjitthu tjowooru nmoononiwawe. ⁴⁸ Vano, kaahokokhora niwaavuwiha aPwiya, Nluku aamwenyaaka Abraao, keettihale nttala womaana wiira kaaphwanhe amutji aamwenyaaka wowiira mwaamwanwe akhalane othela. ⁴⁹ N'navaa, mwakhala ootthonkomanyaa woopheela waakhenla amwenyaaka phanka nmutji, nkihimeerye. Massi, mweehikihimeerye, kikusse nttala womoono weelopwana wala womoono weethiyana. ⁵⁰ Vano, Labao ni Betuel yaahaakhulatja: Eyo ewaale waaPwiya; nihoovaanhihe wala nihoorumenlihe. ⁵¹ Rebeca ri ohoolowaa. Onkusse orwee, wiira akhale mwaara amwaana aamwenyaa, phanka aPwiya tjihimyalyaaya. ⁵² Nanteko aAbraao wawiiwalyaawe, aahaakokhorela aPwiya. ⁵³ Nantekoole aahowaana tjitthu tjoparatha niiwooru ni tjoowariya ni aahon'vaha Rebeca. Yena tootho aahaavaha tjitthu tjooreerela anumwaane nimwanrokorawe. ⁵⁴ Yaaholya ni yaahovurya yena naatthu yaarinaawe. Yaahovirihatja ohiyu wooteene, wavuwatjalyaaya owitjissu, yena aahiira: Nkihiye kirwee waamwenyaaka. ⁵⁵ Mwanrokorawe naanumwaane yaahiira: Onihiyere mwanthiyanooyo akhale nihi wookhalaka mahuku khuumi. Vano arweeke. ⁵⁶ Massi yena aahowiirelatja: N'hikinkitthe, okhala wiira aPwiya ahoreeriha nttalaaka. Nkihiye keette ratta ninttala npaka waamwenyaaka. ⁵⁷ Ayenatja yaahiiratja: Ninaamwiihana mwanthiyanooyo ni ninankoha. ⁵⁸ Vano, ayenatja yaahomwiihanatja Rebeca ni yaahonkoha: Onaarwaa ninlopwanoola? Yena aahaakhula: Kinaahala orwaa. ⁵⁹ Vano, aahovleelihiya mwaamun'nawe Rebeca ni nantekwaawe, ekwaheeyo, ni nanteko aAbraao naatthaawe. ⁶⁰ Ayenatja yaahonreerihatja Rebeca ni yaahomwiirelatja: Mwanrokorihu, okhale numwaane aatthu entji ni nkhotonaa nikusse nkhora waale anoothanha. ⁶¹ Vano, Rebeca aahovuwa ni, vamotja naanantekwaawe, aahontthonkomaniha ekamelu ni aahontthara nlopwanoole. Nantekoole phankussaawe Rebeca attharaka nttala. ⁶² Isaque aakhala oNeguebe ni aahokolyaale phiyaaru akhumaka oBeer-Laai-Roi. ⁶³ Isaque aahorwaa waasitja, yootjootjilo. Wawehalyaawe ntjulu, aahoona wiira tjinaawa ekamelu! ⁶⁴ Rebeca aahoweha ni, wamoonalyaawe Isaque, aahotupha wakameluni ni ⁶⁵ aahomwiirela nanteko: Nlopwanoole tupani neetta aniweelaka? Nanteko aahiira: Amwenyaaka. Vano, yena aahokussa nleesonawe ni aahiikhuneela. ⁶⁶ Nanteko aahonttonkela Isaque tjooteene tjaavaralyaawe. ⁶⁷ Vano, Isaque aahonkussa npaka n'heemani mwaanumwaane, Sara, ni aahonkussa Rebeka, amwaarawe, ni yena aahaafenta. Vano, Isaque aahomaalihiya okhwa waanumwaane.