¹ Sara aahokhala eyaakha emiya wosiriini nasaapa. ² Sara aakhwale oQuriate-Arba, waari Hebrom, elapo yooCanaa. Abraao aahomunlela Sara. ³ Vano, Abraao aahovuwa ni aahohuluwa nrutthu naanankhwelyaawe ni aahuuluma naamutji oHete, iiraka: ⁴ Mikinan'mwa wanhu. Sontte, nkivahatje nipuro kaassikhe amwaaraka. ⁵ Atthu oHete yaahomwaakhula Abraao, yiiraka: ⁶ N'niiwe, Pwiya. Nhu mwantthu ookhuluveliya aNluku wariihuva. Mwaassikhe amwaarinhu nipuro nooreerela. Khaavo wahi n'hala owaateelihani waassikha amwaarinhu. ⁷ Abraao aahovuwa, aahooromela vathi ohoolo waatthu olapweele, ⁸ ni aahowiirelatja: Mwakitthunihatja waassikha amwaaraka elapweenhu, n'mwiirelatje Efrom, mwaana Zoar. ⁹ N'mwiirelatje yena wiira akitumihere nipuro niihaniya Macpeta, akilanle tjinpheelaawe, phanka yoohiyeriya yomahiye eriyariinhutja. ¹⁰ Vano, Efrom, ookomale naatthu oHete, aahomwaakhula Abraao, wowiira yiiwe atthu oHete naale yaari nphantte wonkhora woopooma, yiiraka: ¹¹ Mena, Pwiya, nkiiwe. Kinawoovahani paasi nipuron'no. Kinoovahani ohoolo waatthwaaka wiira mwaassikhe amwaarinhu. ¹² Vano, Abraao aahooroma ohoolo waatthu eelapweele ¹³ ni aahomwiirela Efrom, yiiwaka atthwaale ooteene: Wakhala wiira ohaamini kinawoolepela okiviriyane. Kinawooliva phanka tjin'halaa okilanla nipuron'no; waakhenle, ni phin'halaaka waassikha amwaaraka. ¹⁴ Efrom aahomwaakhula Abraao, iiraka: ¹⁵ Sontte, Pwiya, nkiiwe. Nuussu noopuro ninkhala emiya tjesse tjoparatha. Essiyani yeeyo nhu nimi? Mwaassikhe amwaarinhu. ¹⁶ Abraao aahomwiiwa Efrom ni aahokumiha nssurukhu phanka tjaahimwalyaawe yiiwaka atthu oHete, emiya tjesse tjoparatha, nssurukhu waatjuwanyaale naanamatumiha. ¹⁷ Tjitjon'mo nipuro nooteene na Efrom, naari oMacpeta, waattamenla oManre nimiri tjaarinaawe tjooteene tjaahokussiya ¹⁸ ni Abraao ohoolo waatthu ooteene oHete ni ohoolo waatthu ooteene yaakela nkhora woopooma. ¹⁹ Waviralyaaya eto, Abraao aahonssikha Sara, amwaarawe, nipuro niihaniya Macpela, waattamenla oManre, Hebrom, elapo yooCanaa. ²⁰ Tjitjon'mo, nipuro naaavahiye Abraao naatthu oHete womapuro woossikhaniya.