¹ Apwiya yaahonkhavihatjera Sara, phanka tjaahimyalyaawe. ² Sara aahorupala ni aahon'yara mwaana, owakathi yooyo waahimyalyaawe Nluku. ³ Abraao aahovaha ntjina mwaamwanawe, Isaque. ⁴ Abraao aahomuuliha mwaamwanawe Isaque weettaaya mahuku naane eeyareelo, phanka Nluku tjaahimyalyaawe. ⁵ Abraao aarina eyaakha emiya wan'yaralyaawe mwaamwanawe Isaque. ⁶ Sara aahiira: Nluku hokiteeha, atthu ooteene yiiwavale anaahala othyaa nimi. ⁷ Ni aahintjenratho: Tupani aahala omwiirela Abraao wiira Sara naahala omwaamwiha mwaana? Kihonvaha mwaana niwuuluvalawawe. ⁸ Mwaana aahuunuwa ni aahohiihiya nipele, ni Abraao aahotthonkomaniha essukuhuulu yuulupale owakathi Isaque waahiihiyaawe nipele. ⁹ Sara aahomoona mwaana aAgar, an'yaralyaawe ni Abraao,anthanhaka Isaque. ¹⁰ Vano, ayena yaahomwiirela Abraao: Woomole epottheeyo nimwaamwanooyo, kontha mwaana eepottheeyo khan'hala okhalana yoohalana nimwaamwanaka Isaque. ¹¹ Nuulumon'no naahonrussa Abraao mwaha wamwaamwanawe. ¹² Vano, Nluku aahomwiirela Abraao: Ohirussiye mwaha wamwaana wala mwaha wanantekwaa. Omwiihenle Sara yooteene enoohimeeryaawe, kontha Isaque phin'hala wiihana nlokonaa. ¹³ Nimi kinaahala owiiha nloko wamwaana anantekwaa, kontha yena nmutjya. ¹⁴ Abraao aahovuwa owitjissu, aahokussa ephaao nimaatji ni aahonvaha Agar, amweesenraka wanikhatani. Yena aahonvaha mwaana ni aahonleeha Agar. Ayena yaahokhuma arwaaka moothakoni oBerseba. ¹⁵ Wamalalyaaya maatji yaavahiyaaya, yaahonhiya mwaana vathi woniphunpulu. ¹⁶ Vano, ayena yaahokhuma orwaa wookoma nttayinttayi, kontha yaahohimya; Akinhala omoona nookhwe amwaana. Ayena yaahookoma ohoolowawe, aahokhuwela. ¹⁷ Nluku aahiiwa ntju namwaana, ni nlaikha naNluku naahomwiihana Agar ni naahomwiirela: Agar orinani? Ohoove, kontha Nluku hiiwa ntju namwaana waryaawe. ¹⁸ Ovuwe, onkusse mwaanooyo ni onvarenle nmatatani, kontha kinaahala onvaha omutji. ¹⁹ Vano, Nluku aahohula meethwaawe, naayena yaahoona epuussu. Yaahokhuma okoorika maatji ni yaahonvaha mwaana ovurya. ²⁰ Nluku aari nimwanlopwanooyo; yena aahuunuwa, aahokhala moothakoni ni aahokhala namattheere. ²¹ Yena aahokhala moothakoni oPara, ni anumwanawe yaakhala elapo yowiigiipitu. ²² Owakathi yoole, Abimeleque ni Ficol, n'hooleli aanakhottwaawe, yaahomwiirela Abraao, iiraka: Nluku riniwe en'halaa ovara yooteene. ²³ Okikhuluvelihe mwaha waNluku, wiira khun'hala okihukhumu, wala mwaamwanaka, wala mwantjulaka. Okithoonhere elapo enkhalakaa wayeele yoothoonheralyaaka. ²⁴ Abraao aahiira: Kinaakhuluveliha. ²⁵ Abraao aahonttokuttela Abimeleque mwaha wopuussu yomaatji yeeyo ananteko aAbimeleque phayaakhalenla. ²⁶ Abimeleque aahiira: Akinontjuwela pankale. Ni khukittonkelale khalayi; kaari kihiniiwa nen'ne nen'ne npaka olelo. ²⁷ Vano, Abraao aahokussa enama niimope emotja ni aahonvaha Abimeleque, ni alopwana ooyeeli yaahossikissana. ²⁸ Abraao aahossunka enama saapa. ²⁹ Abimeleque aahomwiirela Abraao: Enama tjissunkalyaa saapa tjin'himyani? ³⁰ Yena aahaakhula: Enama saapan'nha n'nohala waakhenla nmatataniwinhu wowiira tjikhale tjonamoona wiira kihothipa ehime. ³¹ Vano, aahiihana nipuron'ne Berseba, kontha yaaholuphela. ³² Ayenatja yaahotthukatjeranatja oBerseba, ni Abimeleque ni Ficol, n'hooleli aanakhotto, yaahohokoleela elapo yomafilisteu. ³³ Abraao aahaala nri oBerseba ni vaava aahovuwiha ntjina naaPwiya, Nluku oohimala. ³⁴ Abraao aahokhala elapo yomafilisteu womahuku mentji.