¹ Abraao aahokhuma arwaaka elapo yiihaniya Nequebe ni aahokhala eriyariru woCades ni Sur. Yena aari nan'mwa ahalaka oGerar. ² Abraao aahowuulumela amwaarawe Sara: Yena mwanrokoraka. Vano, Abimeleque aahaaruma atthwaawe ni ahaakussa wiira akhale amwaarawe. ³ Massi, Nluku aahonkhuruwel Abimeleque nttorani, ohiyu, ni aahiira: We ontthu ookhwa mwaha waathiyana yaakussalyaa, kontha ahaana awan'haya. ⁴ Abimeleque aari hinaakwanha, ni aahiira: Apwiya, n'naahala wiiva elapo yossariya? ⁵ Khanakhala yena phiirale: Yena mwanrokoraka? Naayena phukiirelaka: Mwanrokoraka. Kivarale eyo nimuupuwelelwaaka ni tjoovaratjaka. ⁶ Vano, Nluku aahomwaakhula nttorani: Khweeli, kinaatjuwela wiira opankale nimuupuwelelwaa ni kihoohapussa okikossera, phimaana, akootthunihale waakwanha. ⁷ Nen'nava, waahokolossere athiyanaayo awan'nhaya, kontha yena nrumeyi naahala woovekelela ni onaahala okhala. Massi, waahaahokolosse, onaahala okhwa naale ooteene ari awaa. ⁸ Abimeleque aahovuwa owitjisuru ni aahowiihana anantekwaawe ooteene. Yena aahaattonkela tjitthu tjooteene, ni yaahoovatja. ⁹ Vano, Abraao aahiihaniya ni Abimeleque ni aahomwiirela: Onipankaleni? Kookosseraleni, owaaka okikossiiha nuumwenyaaka? Ohokipanka etthu ehinpankiya. ¹⁰ Abimeleque aahomwiirelatho Abraao: Yoopankihale essiyani tjitthun'nha? ¹¹ Abraao aahaakhula: Kontha kaanowoonela kimwaneene: Wiira nipuron'na khanooviya Nluku ni anaahala okiivatja mwaha waamwaaraka. ¹² Ohiyavaa, wekhweeli yena mwanrokoraka, mwaana aathumwanaka, massi khanakhala mwaana aanumwanaka, phimaana akhalaka amwaaraka. ¹³ Nluku wakikumihalyaawe ookossa waathumwanaka, kaahomwiirela Sara: Ohaana okikhalihaka phanka amwaaraka: Mapuro ooteene anvireehu, wiireke mwanrokoraka. ¹⁴ Vano, Abimeleque aahonliva enama nimihuwo; ananteko athiyana naananteko alopwana ni aahonvaha Abraao. Ni aahohokolosseriya Sara, amwaarawe Abraao. ¹⁵ Abimeleque aahiira: Elapwaaka eri niwe. Okhale nipuro ninpheelaa. ¹⁶ Ni aahomwiirala Sara: Onvahe mwanrokoraa ekonto emotja tjonsurukhu woparatha, wooveehalyaaka, ohoolo watthwaa ooteene; oholaphululiya ohoolo waatthu ooteene. ¹⁷ Abraoo aahonvekela Nluku ni Nluku aahonvoniha Abimeleque, amwaarawe naaseettyaawe, wiira akhalane asaana. ¹⁸ Kontha Apwiya athiyana ooteene yaakhala wa Abimeleque khayaayara, mwaha wa Sara, amwaara aAbraao.