¹ Malaikha meelyaayo yaahorwaa oSodoma ohiyu, Lo nookomale vankhora ooSodoma. Lo aahaawehatja, aahovuwa ni aahorwaa waaryaaya khwaakokhorela. ² Yena aahiira: Kinaalepela nvire wanantekweenhu, mwarupe noorapiha enhaatjinhu. Vano, owitjisuuru nkhumeke nrweeke. Ayena yaahomwaakhulatja: Mena, ninkoorupa eriyari epooma. ³ Massi yena aahaakhanhenratja ventji jtinene, ni yaarorwaa owanuwawe. Yena aahottonkomaniha eyoolya, aahoossa ephaawu tjoohimiripo ni yaaholyatja. ⁴ Massi wiiraaya ahinaaya orupatja, atthu ooteene ooSodoma yaahorukureerya enupa yooteene, okhuma anamwane naatthu oolupale. ⁵ Ayenatja yaahomwiihanatja Lo ni yaahonkohatja: Alopwana awaakhenlalyaa ohiyuulava arivai? Waawaane nihi nirupe naayena. ⁶ Vano, Lo aahotthuka nkhora. ⁷ Ni aahiira: Kinawoolepelani assun'naka, n'hipankeni etthu yootakhala. ⁸ Kihaana asaanaaka eeli ahinantjuwela nlopwana. Kinawaawaana mwaapankatje etthu enpheelatjeenhu. Massi alopwanaalamu n'haapankatje eethu kontha awaatjale omumulatja. ⁹ Ayenatja yaahiiratja: Okhumen'mo! Yaahiiratja tootho: Ola waale okhala phanka nan'mwa vano naanihoolelatho. Vano, ninawoohasara woovikana ayon'mo. Ayenatja yaahonkhanhenratja Lo, ni yaahaattamenlatja wiira akwanhule nkhora. ¹⁰ Massi malaikhaale yaahotaphula matataaya, yaahonvara Lo ni yaahonwiiha npaani ni yaahotthuka nkhora. ¹¹ Vano assilopwana yaari nphantte woota wonupa, yaamakale owanuwawe Lo, yaahotthukatjiya meetho, muulupale nimwankaani, wiiraaya awehawehaka nkhora wonupa. ¹² Vano, assilopwana eelyaale yaahomwiirela Lo: Haavotho rimoomu? Asitjulaa, asaanaa nintthu oteene notjuwela, waakumihe moomu. ¹³ Kontha ninphela okwanhula nipuron'na, tjitthu tjiniiranyaa nipuron'na tjinkhala phanka onhakuliya ohoolo waaPwiya naayena anooniruma wiira nikwanhule. ¹⁴ Lo aahorwaa waasithelyaawe, alopwana yaakhuluvelihalyaawe wathela asaanaawe ni aahowiirelatja: Mwaakuvatje nkhumatje nipuron'na kntha aPwiya anphookwanhula elapweela. Massi asithelyaawe yoona phanka ehantissi. ¹⁵ Wasalyaaya, malaikha yaahomwaakuvenla Lo an'himeeryaka: Waakusse amwaaraa naasaanaa wiira ahiphwnhe ehukhumu yolapweela. ¹⁶ Okhala wiira yena aanaapitja, aahovariya moono, naamwaarawe naasaanaawe, kontha aPwiya yaanomoonela ekiriri. Yaahohiyatjiya ota wopooma. ¹⁷ Weeraaya arweehiyaka ota, nlopwana n'motja aahiira: Waapule ekumyaa! Ohiwehe ottuli, ni oheemele nipuro nowoonyaa. Otthawele n'mamyaakoni, wiira ohirimeele. ¹⁸ Lo aahomwiirela: Mena, sontte, Apwiya! ¹⁹ Kinaaphwanhaka mahala nmethoniwinhu ni n'naakoonelaka ekriri tjinene mwaha weekumyaaka, kihitthaweleke nmyaakoni kontha mahuviho anaahala okiphwanha. ²⁰ Kontha epoomeeyo eri vakhiviru ni yankaani. Sontthe nkihiye kitthawele woowu, ni ekumyaaka enaahala woophwaa. ²¹ Yena aahomwiirela: Khweeli, kiniira kiwehaka enlepelaa, akin'hala okwanhula elapo ehimyatjalyaa. ²² Waakuvatje! Otthawele woowu, kontha akinvara etthu ohiphiyale wu. Phimaana epooma yaahiihaniya Zoar. ²³ Ntjuwa naahokhuma Lo waaphiyaawe elapo yooZoar. ²⁴ Apwiya vano, yaahokuussa epula yomooro Sodoma ni Gomorra. ²⁵ Apwiya yaahokwanhula elapo tjoopiili, mowoonyaa mooteene, atthu ooteene yaakhala npooma nimiri tjooteene. ²⁶ Massi amwaarawe Lo, yaari ottuliwawe, yaahoweha ottuli ni yaahothatuwa nluku nomaakha. ²⁷ Abraao aahovuwa owitjissu ni aahorwaa nipuro naaryaawe naaPwiya. ²⁸ Yena aahoweha oSodoma ni Gomorra niilapo yooteene. AAhoweha ni aahotutthuwa oonaka mwiissi womooro. ²⁹ Vano, Nluku wakwanhulalyaawe epoomaan'nhe, aahomuupuwela Abraao ni aahonkumiha Lo eriyari wookwanhuwatja, wakwanhulatjalyaawe epooma Lo tjaakhalaawe. ³⁰ Massi Lo aahokhuma oZoar, wiira akhale nmamyaakoni naasaanaawe, kontha aanawoova okhala oZoar. Vno, aahokhala n'nikhukuni yena naasaanaawe. ³¹ Omuulupale aahomwiirela omwankaani: Athumwanihu ahuuluvala ni khaavo nlopwana vakhiviru oopheela orupanihi phanka elamalelo yolapo yooteene. ³² Nttwee naahapalihe ni anaanirupanatja wowiira nikhalihe nlokonaya. ³³ Ayenatja yaahaavahatja nipha athumwanaya ohiyu yoole. Vano, omuulupale aahaarupana athumwaane; ayena khiivo yaatjuwelaaya. ³⁴ Nihuku nikhwaawe, omuulupale aahomwiirela mwaamun'nawe: Ohiyu, kihorupa naathumwanaka. Naavahetho nipha ohiyuula, niwe waarupaneke, wowiira nissunke nlokonaya. ³⁵ Vano, yaahaavahatja nipha athumwanaya ohiyuule ni omwankaani owaarupana athumwaane. Ayena ahitjuwelaka etthu. ³⁶ Vano, asaana ooyeeli aLo yaahorupala erukulu tjan'nathumwanaya. ³⁷ Omuulupale aahon'yara mwaana , anvahalyaawe ntjina naMoabe. Yooyo hokhala aamoabita olelo. ³⁸ Omwankaani aahon'yara mwaana, anvahalyaawe ntjina naBen-Ami. Yena hokhala amonita olelo.