¹ Nene na Asabat wa cinu ukatu, a icina upiru liri lin finnun nsati, Maremu Magdalin nin leli Mareme da ida yene kiseke. ² Itunna iyene ina su uzulunu kutyin kang, bara kunan kadura Kutelle wa tolu unuzu kitene kani, ada turno litale, anin so kitene linin. ³ Uyenju me wadi nafo umalizunu nwuru, a imon me wa pugun nafo aduga. ⁴ Anan cawe nketuzu ninfiu inin so nafo abi. ⁵ Unan kadura Kutelle lira nin nawane, aworo nani, "Yenje iwa lanza fiu, bara nyiru idin pizuru Yesue ku, urika na iwa kotinghe. ⁶ Na adi kikane ba, amal fitu, nafo na awa belin minu. Dan ida yene kiti kanga na Cikilare wa non ku. ⁷ Can mas idi bellin nono katwa me, 'Afita nanya nanan kul. Yenen amini nbun mine udu Ugalili.' Ima yenughe kikane, yenen, nbelin minu." ⁸ Awane tunna inya kiti kisseke nin fiu nin nayiabo kan, nin cum ndi bellin nono katwa me. ⁹ Yesu tunna azuro nan ghinu aworo, "Ishawan." Awane da, ikpa abunu me, inin sughe usujaida. ¹⁰ Yesu nin woro nani, "Yenje iwa lanza fiu. Can idi bellin nuana inya udu Ugalili. Kikane, ima yenii." ¹¹ Na awane wadi ncin, vat nanan cawe pira nanya kipine idi bellin Ugo na Prieste vat nimon ilenge ifara. ¹² Na a Prieste wa zuro nin nakune isu ulire nan ghinu, ina anan tecu natine ikurufun gbardang. ¹³ Inin woro nani, "Belle among non katwan 'Yesu' na dak nin kitik ida tuzu kidowo me a arik yita nmoro.' ¹⁴ Asa uliru ulele nduru kitin gumna, tima sonu litime na ama su minu imonimon ba." ¹⁵ Asoje sere ikurfughe, itunna isu nafo na ibelle nani isu. Uliru ulele mala kiti nanya na Yahudawa, uleo ubun tutung udak ko kube. ¹⁶ Ama inung nono katwa likure nin warum nya udu Ugalili, udu likup longo na Yesu wa woro nani ido. ¹⁷ Na iyeneghe, isughe usujada, among yitan shaka me. ¹⁸ Yesu da kiti mine, alira nan ghinu aworo, "Likara vat kitene kani nin lin kutyin, inani nacara ning. ¹⁹ Bara nani, can nanya nipinpin nyii idi su uwazi ise nono katwa. Ishintu nani nmyen nanya lissa Ncif, nin Saun, a Uruhu ulau. ²⁰ Dursuzon nani idofin vat nimon ile na nna bellu minu. Tutung yenen, Ndi ligowe nanghinu kolome liri, udu ligan nyii."