¹ Yesu kawa anin lira nani nin tinan kuguldo tutung, abenle, ² "Kilari tigo Kutelle masin umon unit na awa su usaune ubuki ni lumga. ³ A too a cin me idi yicila ale na a wa duru nani ilumge idak, na ida ba. ⁴ tutung a too among a cin, abenle nani, 'Benlang ale na ina duru nani ilumge, "Yenen, mmalu kanju imonle. Ina nan niyin nighe i malu basu, vat nimong nmalu zuru. Dan kiti nilumge."' ⁵ Bara nani na anit an nda ba. Among kpila udu anenmene kagisine kpila udu kitin lesu nin sesu mene. ⁶ Amen ta acin me imancing, inin molo nani. ⁷ Bara nani ugowe nana ayi. A too anang likum me idi mulsu nani, inin juju kagbire. ⁸ Anin woro na cin me, 'Ilumge din cinu, uzuru tutung ale na ina belin nani na ida ba. ⁹ Bara nani can kitene tibau idi beleng vat ule na iyeneghe adok kitin nilumge.' ¹⁰ A cine do kitenen libauwe idi yicila va nle na iyeneghe, anit a acine nin na le na idi acine ba, bara nani kutii nilumge wa kula gbem nin nanit. ¹¹ Bara nani na ugowe nda aba da yenu ale na ida kutii nilumge, a yene umun ule na awa shon kultuk nilumghe ba. ¹² Ugowe woroghe, 'Udundun, utiza iyiziyari upira kikane sa kulutuk nilumge?' unite yisina nin kutike. ¹³ Ugowe nin woro na cin me, 'Teren unit ulele nacara nin nabunu i tuughe ndas nanyan nsirti, kika na ama gilu nin talu nayini.' ¹⁴ Bara na anit gbardang na iwa yicila nani ma cunghari ina fere." ¹⁵ A Farasiyawa non do idi mune atee ikye inda na ima kifu Yesu nanyan nliru me. ¹⁶ Inin too ghe nono katwa mene, ligowe nan na Hirudiyawa. I woro Yesu ku, "Kumalami, ti yiru fe unan kidegenari unin din dursuzu tibau Kutelle nanya kidegene, tutung na umong ma wantinfi ubenlu kibinai fe ba, na udin feru anit ba. ¹⁷ Bara nani benle nari iyanghari udin kpilizu? Ukari i ugandu kitin Kaisar ra sa babu?" ¹⁸ Bara nani Yesu yino nibinai ni nanzan mene anin woro, "Iyarin ta idin dumuzuni, anu anan kinuu? ¹⁹ Duruni fikurfunghe." Inin da nin fikurfunghe kiti me. ²⁰ Yesu woro nani, "Kuyelin ghari nin lisa di kiteme fikurfunghe?" ²¹ Iworoghe, "Kaisar." Yesu nin woro nani, "Bara nani nang kaisar ku imon ile na idi Kaisar, in Kutelle tutung imon ile na idi in Kutelle." ²² Na ilanza nani, ikifo ti nuu mene. Inin sunghe iya. ²³ Liri lole amon a Sandukiyawa da kitime, ale na ina woro na ufitun kul duku ba. I tiringhe, ²⁴ i woro, "Kumalami, Musa naworo, 'Unit wa ku na amara go ba, gwane yira uwane a se nono ku bara gwane.' ²⁵ Linwana kuzir wa duku, unan burne ku na asu ilumge, na ase nono ba. A suna gwane uwane. ²⁶ Unan mbe ta nafo ame, nanere unan tat udu unang zure. ²⁷ Kimal mine vat, uwane da kuu. ²⁸ Nene lirin fitun nyii, uwanin ghari ba yitu nanya mene? Bara na vat mene wa yininghe nafo uwani." ²⁹ Bara nani Yesu kawa a woro nani, "I tana bara na iyiru uliru Kutelle sa likara me ba. ³⁰ Bara na nin fitu nanan kull, na ilumga ma yitu ba a na ima nizu ilumga ba. Nnu nani, ima yiti nafo anan kadura Kutelle kitene kane. ³¹ Bara ubelen nfitu nanan kull, na isa yene nanya niyerte ile imon na i wa beleng minu nuzu Kutelle, ³² 'Mere Kutellen Ibrahim, Kutellen Ishaku, nin Kutellen Yakub'? Kutelle na Kutelle na beari ba, bara na Kutelle nanang nlai yari." ³³ Na ligozin na nite nlanza nani, ikifo tinuu nin ma dursuzu dursuzu me. ³⁴ Bara na a Farisiyawan nlanza au Yesu ntursu ti nuu na Sandukiyawa, i pitirino ati mene kiti kirum. ³⁵ Umon nanya mene, ulauya, tiringhe a dumunghe- ³⁶ "Kumallami, lome liduari lidya nanya na du fe?" ³⁷ Yesu woroghe, "'U ma ti usu ncif Kutelle nin kibinaife, nin kidowe fe vat nin kibinai fe.' ³⁸ Uleleunare udyawe nin unburne. ³⁹ Un be masin ulele-'Uma ti usun nang kupoo fe nafo litife.' ⁴⁰ Kitene na le adu abere uduke sosin ku nin liru nin nuu Kutelle." ⁴¹ Nene na a Farisiyawa wadu kiti kirum, Yesu tirino nani. ⁴² A woro, "Iyanghari idin kpilizu nin Kristi? Gonon ghari ame?" I woroghe, "Gonon Dauda." ⁴³ Yesu woro nani, "iyarin nta Dauda nanyan Ruhu din yecughe ucef, a benle, ⁴⁴ 'Ucef uworon ncef nin, "Suu ncara uleme ning, saide nta anan nari fe imon patilu na bunu fe.'" ⁴⁵ Andi Dauda din yicu Kristi ku 'Ucif', a ta iyiziari a so Gonon Dauda?" ⁴⁶ Na umong ula kawughe imon ba, na umong kuru a tiringhe imomon tutung ba uworu lire.