¹ Ayiri kutocin wa kata, Yisa yira Bitrus ku nin Yakubu a Yuhanna gwana me, ada ninghinu kitene likup lizalang inung litiime. ² Atunna asaka ukama nbun mine. Umuro me balta naffo uwui, kulutuk me ta kanag nafo nkanag. ³ Na nin nanzu kubi ba Musa nin Iliya nuzu ilira nan ghe. ⁴ Bitrus kawa aworo Yisa ku, "Cikilari, ucaun na arike di kikane. Andi uyinna, meng ba ke adanga atat kurum kunfe, kurum kun Musa, a kurum kun Iliya." ⁵ Kubi ko na awa di nlirua na nin nanzu kubi ba kuwut nuzu ku kanag da ta nani ushin, na nin molu kubi ba liwui nuzu nan nya kuwut, aworo, "Kanere Gono kin nayi nighe, ulle na ndin nlatizu nmang me lanzan ghe." ⁶ Na nono katuwa me nlanza nani, ideo nin timuro mine kutyin, iwa di nlanzu fiu. ⁷ Ame Yisa da ada duduzo nani a woro, "Fitan yenje iwa lanza fiu." ⁸ Inug yene kitene kani, na iyene umon ba, Yisa ari cas wa duku. ⁹ Na iwa kpilin unuzu kitene likupe, Yiisa kpada nani aworo, "Na iwa bellin alle amore kitin nmon ba, udu kubi ko na Usaun Nnit ba fitu nan nya nkul." ¹⁰ Nono katuwa me tiringhe iworo, "Iyaghari wati anan ninyerte wa woro Iliya ma burnu adak?" ¹¹ Yisa kauwa a woro nani, "Iliya badak ada kurtunu imon vat." ¹² Nene meng bellin minu, Iliya namalu udak, na iyininghe ba. Nin nani, iwa a sughe vat nimon ille na idinin suwe. Nanya libau lirume, Gono Nnit ba niu nacara mine." ¹³ Inug nono katuwa me, yinno adin nliru nanghinu kitene Yuhanna unan Baptismari. ¹⁴ Na ikpilla kiti ligozine, umon unit da kitime, ada tumuno nbun me, anin woro, ¹⁵ "Cikilari, lanza nkune kune ngono nighe, bara adinin nkonu matirizi, adin nniu mun kang, kubi-kubi asa adiso nlah sa nmyen. ¹⁶ Meng da ninghe kitin nono katuwa fe, na iyinno ushinu ninghe ba." ¹⁷ Yisa kauwa a woro, "Anan salin nyinnu nin kuji kunanzang, udu kome kubiari mba so nanghinua? Udu kome kubiari mba nonku kibinai ninghinua? Dan ninghe kiti nig kika." ¹⁸ Yisa kpada ghe, Kugbergenue nuzu nan nya me, kwanyane shino nkone kube. ¹⁹ Nani nono katuwa da kiti Yisa kusari kurum i woro, "Iyaghari ntah na arik nyinnno nutunghe ba?" ²⁰ Yisa belle nani, "Bara ncingilin nyinnu sa uyenu mine. Kidegen ndin bellu minu, asa idinin yinnu sa uyenu cing nafo fiyip fikan Imustard, uwasa ubelle likup lole, 'kalla litiife kikane udo kanie,' aba du nin litime, na imomon ba yitu munu nin nijasi nsu ba. ²¹ Vat nani imus nale agbergenu wasa inuzu nani cas ba, se ligowe nin lira a ukifu nnu." ²² Kube na iwa sosin Galili, Yisa belle nono katuwa me, "Iba ni gono nnit nacara nanit. ²³ Inug ba molughe, nan nya liri lintat aba fitu." Ayi nana nono katuwa me nani yototo. ²⁴ Na ida Ukafarnahum, annit alenge na iwadi imal sesu kagisin fishekel nafo ugandu, da kitii Bitrus a woroghe, "Na unan yirru mine din nizu kagisin nishekel ngandu ba?" ²⁵ A woroghe, "Nanere." Da na Bitrus npira nan nya kilari, Yisa cizina uliru ninghe aworo, "Iyaghari udin kpilize, Simon? Ago inyi, kitinghari idin sesu ugandu kuwa? Kiti nanit minere sa kiti namara?" ²⁶ Na Bitrus nworo, "Kiti namarari," Yisa bellinghe, "Ikala anit mine nbiuze. ²⁷ Na tiwa ti nani anan sesu ngandu isu kulapi ba, cang kulli kudia, to liwita fe nanye, uwunun fibo fo na fi burno udake. Asa upuno unu finin uba se fishekel ku, yira finin udi ni anan sesun unani ni unfe."