¹ Na Yesu wa malu uni nnono katwa me likure nan wabe kadura, a nya kikane cundu nanya Nigbiri udu ndursuzu nani tipinpin. ² Na Yuhana nlaza kilari licin, kata ka na Kristi dumun, a to nono katwa me kadura inung naba. ³ aworo nani, can idi woroghe, "Fere ule na udin cinu udake, sa tiso nca nmong?" ⁴ Yesu kawa aworo nani, "Can idi belin Yuhana ku imon ilenge na ilanza iyene. ⁵ Adu din sesu uyenju kiti, anan sali nabunu din cin, akutulu se ushinu, a turi din lanzu tutung, abi din fituzu nin lai, idin bellu anan sali nimon uliru ulau. ⁶ Unan mariari ule na ase imon ntirzu liti ning ba." ⁷ Na ale anite nya libau mine, Yesu cizina ubelu ligonzine uliru litin Yuhana, "Inyaghari i do nyenje nanya kusho- ufunu nzunu nkpe myena? ⁸ Ani inyaghari inuzu ndin yenje ndas- unit na ashono imon tigowa? Nanere, ale na idin sho imon tigo sosin nilari Tigo. ⁹ Sa nyaghari ido idi yene ndase- unan liru nin nu Kutelle? Eh nbelin minu tutun, ukatin unan liru nin nu Kutelle. ¹⁰ Ulengenere ame ule na iwa yertin litime, 'yenjen nma tu unan kadura ning nbun timuro mine, ulenge na ama ke udina ning nbun mine.' ¹¹ Nbelin minu kidegene, vat nale na kumat nwani, na warum duku na akatin Yuhana unan shintu nanit nyen ba. Vat nani unit ubene kilari tigo kitene kani katinghe. ¹² Unuzu nayirin Yuhana unan shintu nanit nmyen udak nene, kilari tigo kitene kani nneu nin fizu nayi, tutun anit anan fizu naye na bolu nin likara. ¹³ Bara vat anan liru nin nu Kutelle nin duka wa tizu amoro alau udakin Yuhana. ¹⁴ Andi tutung iyina userun nin, ulele amere Iliya, urika na awadi unan dak. ¹⁵ Ame ulenge na adinin natuf nlanzu, na alanza. ¹⁶ Inyaghari nma batu ko kuje mun? Imasin nonoari navu nkasa, alenge nasa iso iyica atimine. ¹⁷ Inin woro, 'tidin wulsu fi fishira na udin yizunu ba. Tiyita tiyom ana ugila ba.' ¹⁸ Bara Yuhana wadak, na awadi nli nimonli a aso nmyen narau ba iworo, 'adi nin kugbergenu.' ¹⁹ Gono Kutelle wa dak, nli nimonli nin so nmyen narau iworu, 'Yeneng unan su kileu kikan, nin shituzu nso, udondong nanan sesun gandu nan nanan kulapi!' Ama njijing nse ubunku bara kata me." ²⁰ Yesu cizina ukpaduzu nigbiri nirika asuzu imon izikiki ku, bara iwa nari uni nati. ²¹ "Ukaito fe Corazin! Ukaitofe Betsaida! Nfo katwa kadidya kane na nnasu kiti mine, nwansu Ntyra nin Sidon, iwa ni ati nworsu, icino alapi mine nanyan najasi nimon nin tong. ²² Bara nani, uma katinu anan Sidon ku nin Tire liri nshara Kutelle. ²³ Anung u Kaparnahum, idin yenju ima ghatinu minu udu kitene kane? Na nanere ba, ima tultun minu udu ukul sa ligan. Bara andi Nsodom iwa su nita nididya nanga na ina su anung ku, uwa dutuku udak kitimone. ²⁴ Uma yitu sheu ni nmyin Nsodom lirin shara nbun mine. ²⁵ Kubi kone, Yesu woro, "ndi rufi, Ucif, Cikilari unan kitene kani nin kutyin, bara una nyeshe ilenge imone kiti na jijin nin nanan yiru, tutung umini na pun kiti nalenge na iyiru ba, nafo ninono ni bebene. ²⁶ Aee Ucif, nanere una tifi mang nyenjufe. ²⁷ Vat nimon inani ununzu Ncif ning. Tutung na umong yiru Usaune ba se Ucife, ana umong yiru Ucife ba se Usaune, tutung nin lenge na Usaune nyina aduroghe ame. ²⁸ Dan kiti ning, vat anung ale na imin kutura kugetek, meng ma nimu ushinu. ²⁹ Yaunang Kugbetu ning kiti mine imasu uyinnu kiti ning, bara ndi sheu nin kibinayi kimang, imanin se ushunu tilai mine. ³⁰ Bara kugbetu ning sheu a kutura ning di getek ba."