¹ ''Caphelani kutsi ningakwenti kulunga kwenu embikwebantfu ngenhloso yekutsi nibonwe ngabo, nakungenjalo nitawubabete umvuzo kuYihlo losezulwini. ² Ngako ke nawupha lutfo kumuntfu loswele, ungakhalisi licilongo embikwakho njengobe kwenta betentisi emasinagogeni nasetitaladini, khona batewudvunyiswa bantfu. Ngicinisile ngitsi kini, sebawemukele umvuzo wabo. ³ Kepha nawupha sipho, sandla sakho sangesencele asingakwati lesikwentako sangesekudla, ⁴ kute sipho sakho sibesekusitsekeni. Khona ke uYihlo lobona ekusitsekeni utakuvuza. ⁵ '', Uma nithantaza, ningabi njenge batentisi ngobe batsandza kuthandaza bemile emasinagogeni, nasemajikeni etitaladi, khona batewubonwa bantfu. Ngicinisile ngitsi kini, sebawemukele umvuzo wabo. ⁶ Kepha wena nawuthandaza, ngena endlini yakho. Vala umnyango, uthandaze kuYihlo, losekusitsekeni. Khona uYihlo lobona ekusitsekeni utawukunika umvuzo. ⁷ 'Uma uthantaza, ungaphindzaphindzi emagama langasho lufto njengaloku betive benta, ngobe bacabanga kutsi batawuviwa ngenca yemagama abo lamanyenti. ⁸ Ngako ke, ningabi njengabo, ngobe uYihlo ukwati loko lenikudzingako ningakakuceli. ⁹ Ngakoke thandazani nitsi: ''Babe wetfu losezulwini, alingweliswe libito lakho. ¹⁰ Umbuso wakho awute. Intsandvo yakho ayentiwe emhlabeni, njengase zulwini. ¹¹ Siphe lamuhla sinkhwa setfu semihla ngemihla. ¹² Sitsetselele tono teftu, njengobe natsi sibatsetselele labasonako. ¹³ Ungasingenisi ekulingweni, kodvwa usisindzise kulomubi.(Tincwadzi tekadzeni letinye tite kutsi " ngobe wakho umbuso, emandla nenkhatimulo phakadze. Amen). ¹⁴ Ngobe nangabe niyabatsetselela bantfu tiphambeko tabo, neYihlo losezulwini uyawunitsetselela. ¹⁵ Kodvwa naningabatsetseleli bantfu tiphambeko tabo, neYihlo angeke anitsetselele tiphambeko tenu. ¹⁶ '''Nanizila kudla, ningabunyukumalisi buso benu njengebatentisi, ngobe bona banyukumalisa buso babo, kuze batekubonakalisa kubantfu kuzila kwabo. Ngicinisile, ngitsi kini, sebawemukele umvuzo wabo. ¹⁷ Kepha wena nawuzila, gcobisa inhloko yakho ugeze nebuso bakho, ¹⁸ kuze bantfu bangakuboni kutsi uzilile kodvwa ubonwe nguYihlo losekusitsekeni; neYihlo lobona ekusitsekeni utakuninika umvuzo." ¹⁹ "Ningatibekeli umcebo wenu lapha emhlabeni, lapho umvunya nekutfomba kuwubhubhisa, nalapho emasela agcekeza ebe. ²⁰ Kunaloko, tibekeleni umcebo wenu ezulwini, lapho khona umvunya, nekutfomba kungete kwawubhubhisa, nalapho emasela angagcekezi ebe. ²¹ Ngobe lapho ingcebo yakho ikhona, nenhlitiyo yakho itawuba khona. ²² Liso lisibane semtimba. Ngako ke, nangabe liso lakho lilihle, umtimba wonkhe ugcwele kukhanya. ²³ Kodvwa nangabe liso lakho lilibi, umtimba wonkhe ugcwele bumnyama. Ngako ke nangabe kukhanya lokukuwe kubumnyama, bukhulu kanganani ke lobo bumnyama. ²⁴ Kute umuntfu longasebentela emakhosi lamabili, phela angatondza lenye, atsandze lenye, uyakwetsembeka kulenye adzelele lenye. Ungeke usebentele Nkulunkulu nemcebo. ²⁵ Ngako ngitsi kini, ningakhatsateki ngemphilo yenu, kutsi nitakudlani ninatseni; nangemitimba yenu kutsi nitakwembatsani. Imphilo ayiyinkhulu yini kunekudla, nemtimba kunekwekwembatsa? ²⁶ Bukani tinyoni emoyeni. Atihlanyeli, ativuni, atibeki lutfo etincolobaneni, kodvwa uYihlo losezulwini uyatondla. Anincono kakhulu yini nine kunato? ²⁷ Kukhona yini emkhatsini wenu longatsi ngekukhatsateka engete umzuzwana ebudzeni bemphilo yakhe? ²⁸ Nikhatsatekelani ngetimphahla? Cabangani timbali tesiganga kutsi tikhula njani, atikhandleki, futsi atititfungeli kwekwembatsa. ²⁹ Noko ngitsi kini, ngisho naSolomoni ebukhatikhatini bakhe bonkhe abengeke afane ngisho nayinye yato ngekwembatsa. ³⁰ Nangabe Nkulunkulu abembatsisa kanjalo tjani besiganga, lobuphila lamuhla, kusasa bujikwe emlilweni, akayunembatsisa kakhulu yini nine, nine bekukholwa lokuncane? ³¹ Ngako ke ningakhatsateki nitsi, ''sitawudlani?" nome "sitawunatsani?" nome "sitawembatsani?'' ³² Ngobe betive bafunisisa tona leto tintfo, kantsi uYihlo losezulwini uyati kutsi niyatidzinga letintfo. ³³ Kodvwa funani kucala umbuso wakhe kanye nekulunga kwakhe, khona tonkhe leto tintfo titawunikwa nine. ³⁴ Ngako ke, ningakhatsateki ngelikusasa, ngobe likusasa liyakutikhatsalela lona. Lilanga linye linenhlupheko leyenele lona.