¹ Wabese Jesu waholelwa ngumoya longcwele ehlane kuyolingwa ngu sathane. ² Ngesikhatsi azile emalanga langemashumi lamane nebusuku lobungemashumi lamane, abesalambile. ³ Lomlingi weta kuye watsi kuye, ''Uma uyindvodzana yaNkulunkulu, tjela lamatje kutsi abe sinkhwa.'' ⁴ Kepha wamphendvula watsi kuye, ''Kubhaliwe, 'Umuntfu angeke aphile ngesinkhwa sodvwa, kepha ngawo onkhe emavi laphuma emlonyeni waNkulunkulu.'' ⁵ Wabese sathane umyisa edolobheni lelingcwele wambeka esicongweni sesakhiwo selithempeli, ⁶ watsi kuye, ''Uma uyindvodzana yaNkulunkulu, tijike phasi, ngoba kubhaliwe, 'Utotjela tingelosi takhe kutsi tikunakekele,'futsi, 'Titokuphakamisa etandleni tato, khona ungeke ukhutjwe litje ngetinyawo takho.'' ⁷ jesu watsi kuye, ''Phindze kubhaliwe, 'Ungaboyilinga iNkhosi Nkulunkulu wakho.'' ⁸ Phindze, sathane wamuyisa etulu edvwaleni leliphakeme wamkhombisa yonkhe imibuso yemhlaba kudze nenkhatimulo yayo. ⁹ Watsi kuye, '' Tonkhe letintfo leti ngitokunika, uma uwa phasi ungikhotsamele.'' ¹⁰ Jesu watsi kuye, ''Suka lana, Sathane! Ngoba kubhaliwe, 'Utokhotsama iNkhosi Nkulunkulu wakho, futsi utokhonta yena kuphela.'' ¹¹ Wabese sathane wamshiya, futsi bheka, tingelosi teta tamsita. ¹² Ngesikhatsi Jesu eva kutsi Johane uboshiwe, wabese uya eGalile. ¹³ Wahamba wayohlala eKhaphanawume wayishiya iNazaretha, leyingaselwandle lasegalile etindzaweni taZebuloni netakaNaftali. ¹⁴ Loku kwenteka kugcwalisa lokwashiwo ngumphrofethi Isaya, ¹⁵ ''Live lakaZebuloni nelive lakaNaftali, lelingaselwandle, ngesheya kweJordane, Galile lebetive! ¹⁶ Labantfu labebahlala ebumnyameni sebabone kukhanya lokukhulu, kulabo labebahleti eveni nasetfunti lekufa, kukhanya sekuphumele tikwabo.'' ¹⁷ Ngaleso sikhatsi Jesu wacala kushumayela atsi, ''Phendvukani, ngoba umbuso welizulu sewudvute.'' ¹⁸ Nakasahamba hamba ngaseLwandle laseGalile, wabona bobhuti lababili, Simoni lobitwa Phetro, naAndreya umnakabo, baphosa linetha ekhatsi elwandle, ngoba bebabadwebi. ¹⁹ Jesu watsi kubo, ''Wotani, ngilandzeleni, ngitawunenta badwebi bebantfu.'' ²⁰ Bashiya emanetha abo ngalesosikhatsi bamulandzela. ²¹ Asahamba Jesu esuka lapho wabona labanye bobhuti lababili, Jakobe indvodzana yaZebedi, naJohane umnakabo. Bebanababe wabo Zebedi kulesikebhe bachibela emanetha abo. Wababita, ²² bashiya sikebhe ngaleso sikhatsi nababe wabo wamlandzela. ²³ Jesu walihamba lonkhe langaseGalile, afundzisa emasinagogeni abo, ashumayela livangeli lembuso, aphilisa lonkhe luhlobo lwesifo nekugula kubantfu. ²⁴ Letindzaba letimnandzi tandza iSiriya yonkhe, bantfu baletsa kuye bonkhe labo labebagula banetifo letitinhlobonhlobo netinhlungu, labo labahlaselwe madimoni, nalabanesitfutfwane nalabakhubatekile. Jesu wabaphilisa. ²⁵ Ticuku letikhulu tamlandzela tisuka eGalile, eDekhapholisa, Jerusalema, naseJudiya, nangesheya kweJordane.