1 Kwatsi nase kutawuphela liSabatha, sekutawucala kusa kube lilanga lekucala leliviki, Mariya waseMagadala nalomunye Mariya beta kutawubona lithuna. 2 Bheka, kwabakhona kutamatama kwemhlaba lokukhulu, ngoba ingilosi yeNkosi yehla ezulwini, yefika yaligicita yalisusa lelitje, yase ihlala etikwalo. 3 Kubonakala kwayo kwakunjengembane, timphahla tayo timhlophe njengesitfwatfwa. 4 Balindzi bachachatela ngekwesaba baze baba njengebantfu labafile. 5 Ingilosi yakhuluma nalabafati yatsi kubo, ''Ningesabi, ngiyati kutsi nifuna Jesu, labekabetselwe. 6 Akekho lapha, kodvwa uvukile, njengobe abeshito. wotani nibone indzawo lapho abelele khona. 7 Hambani masinyane niyewutjela bafundzi bakhe, sewuvukile kulabafile. Bukani, uyahamba phambi kwenu uya eGalile. Kulapho nitawumbona khona.' Bukani, senginitjelile.'' 8 Labafati ngekushesha besuka ethuneni ngekwesaba nangentfokoto lenkhulu, base bayagijima kuyawutjela bafundzi bakhe. 9 Bheka, Jesu wahlangana nabo watsi, '' Sanibonani''Labafati beta, bambamba tinyawo takhe base bayamkhonta. 10 Wase Jesu utsi kubo, ''Ningesabi. Hambani nibikele bomnaketfu kutsi bahambe baye eGalile. Lapho ke batawungibona. 11 Batsi labafati basahamba, bheka, labanye bebalindzi baya edolobheni batjela baphristi labakhulu tonkhe letintfo letentekile. 12 Kwatsi baphristi sebahlangene netibondza bakhulumisana ngalendzaba nabo, bawanika imali lenkhulu lamasotja, 13 base babatjela, ''Nibotsi kulabanye, 'bafundzi baJesu bafikile ebusuku baseba sidvumbu sakhe ngesikhatsi tsine silele.' 14 Nangabe lombiko ufika kusibalukhulu, tsine siyawumchazela eve kahle sikususe konkhe kukhatsateka kini.'' 15 Ngako lamasotja bayitsatsa lemali benta njengobe bebayaliwe. Lombiko wandza kabanti emkhatsini wemaJuda futsi usachubeka nalamuhla. 16 Kepha bafundzi labalishumi namunye baya eGalile, kuleyo ntsaba lapho Jesu abebalayete kuyo. 17 Batsi nabambona, bamkhonta, noko labanye babengabata. 18 Jesu weta kubo wakhuluma nabo watsi, ''Onkhe emagunya nginikiwe ezulwini nasemhlabeni. 19 Ngako-ke hambani nente bafundzi betive tonkhe. Nibabhabhatise egameni leYise, neleNdvodzana, nelaMoya Longcwele. 20 Nibafundzise kugcina tonkhe letintfo lenginiyale ngato. Bukani, mine nginani ngaso sonkhe sikhatsi, kute kube ngusekugcineni kwetikhatsi.''