¹ Abhanu bafu bhekomesishe okujitonda kisi emisango jinu jakumiye agati yeswe. ² Lwakutyo eswe chayabhwilwe na bhanu bhajilolele na ameso kwambila kubhwambilo bhali bhakosi bho Omusango gwa Nyamuanga. ³ Kulwejo anye ona, nejile namala okukengela kisi obhwambilo bhwe emisango jona- nalola ati nikisi nikwandikile kubhwitondi bhwajo-Teofilo owechibhalo. ⁴ Koleleki utule okumenya echimali che emisango jinu weigisibhwe. ⁵ Munsiku ja Herode omukama wa Yudea, aliga alio omugabisi atogwaga Zakaria, owamulubho lwo obhugabhisi bhwa Abiya; omugasi waye Elizabeti aliga asokole muluganda lwa Haruni. ⁶ Abho bhone bhaliga bhali bhalengelesi imbele ya Nyamuanga bhagwatiliye ebhilagilo byona ebhyo Omukama na jindamu jaye. ⁷ Nawe bhaliga bhatana mwana, kulwokubha Elizabethi aliga alimugumba, na bhaliga bhakokoye muno. ⁸ Kakingile akatungu ko olubho lwa Zakaria okubha imbele ya Nyamuanga nakolaga emilimu jobhugabhisi, ⁹ Mbe nibhamusola okwingana lwa kutyo bhasolwaga mumilimu jo obugabhisi, agende mwiyekalu okututa omuchumulilo. ¹⁰ Katungu nibhatuta omuchumulilo elikofyanya lyaliga lilianja nilisabhwa. ¹¹ Mbe Malaika wo Omukama amufulumukiyeko nemelegulu mukubhoko kwe ebhulyo okwe ebhigabhilo bhokututila. ¹² Ejile Zakaria amulola natinyuka nabhamo nobhubha. ¹³ Nawe malaika namubhwila ati, "Wasiga kubhaya Zakaria, kulwokubha lisabhwa lyao lyongwibhwa. Omugasi wao Elijabeti kaja okwibhulila omwana we echilume. Risina lyaye umutoge Yoana. ¹⁴ Ulikondelwa nokusandabha, na bhanfu bhalikondelelwa ukwibhulwa kwaye. ¹⁵ Kulwokubha alibha mukulu imbele ya meso go Omukama. Atalinywa omulamba gwa majabhibhu amwi echinu chinu echitamisha, na alijusibhwa Mwoyo Mweru kusokelela munda ya nyilamwene. ¹⁶ Alubhasubhya bhanu bhafu bha Isiraeli kumukama Nyamuanga webhwe ¹⁷ Alitangata imbele yo obhusu bhwa Lata Bhugenyi kulwo mwoyo na mumanaga ga Eliya. Alikola kutyo koleleki asubye emitima ja abhebhusi kubhana, koleleki bhanyantongwa bhalame mubhwengeso bhwa abhalengelesi. Alikola kutyo okubhemalilisha bhanu bhelabhilwe okusolwa ingulu yaye." ¹⁸ Zakaria nabhwila malaika ati, "Omusango gunu enigumenya kutiki? Kulwokubha anye nakokoye ke emyaka jo omugasi wani ona jabheye myafu muno." ¹⁹ Malaika nasubhya namubhwila ati, "Anye nanye Gabhulyeli, unu nimeleguyu imbele ya Nyamuanga. Nitumilwe okuja nikubhwile omusango gunu ogwekisi. ²⁰ Mbe lola oubha mujibhi, utakwaika kukingila kulusiku olwo jinu jilikumila. Kulwokubha walemele okwikilisha emisango jani ejojilikumila mukatungu akene. ²¹ Mbe abhanu bhaliga bhamulindiliye zakaria. Nibhalugula okulola namala omwanya mulela ali mwiyekalu. ²² Nawe ejile auluka atatule kwaika nabho. Nibhamenya ati aliga alolele chiroro mwiyekaru. ²³ Nijibha ati ejile amala emilimu jo obhugabhisi nemuka okusubha ika owaye. ²⁴ Ejile Zakaria amala okusubha ika okusoka kumilimu jaye eja muyekalu, omugasi waye nagega inda. Mbe namala mesi gatanu obhutasoka ika owaye. Naika ati, ²⁵ "Linu nilyo Lata Bhugenyi amankolelea ejile ansima koleleki ansosheko jinswalo imbele ya abhanu." ²⁶ Inda ya Elijabheti yejile yakingya mesi mukaga, Nyamuanga atumile malaika Gabhulieli okugenda mumusi gwa Galilaya gunu ogutogwa Najareti, ²⁷ ku muyalajuma unu asandwaga obhuko no mulume natogwa Yusufu. Omumula oyo aliga wamuluganda lwa Daudi, na lisina lyo omuyalajuma aliga natogwa Mariamu. ²⁸ Ejile amukingako naika ati, "Uno omu! embe, unu Uyabhilwe libhando enene! Omukama ali amwi nawe." ²⁹ Nawe emisango ja malaika nijimusobhela nalema okumenya obhukesha obhwokulugusha bhunu bhuna nsongaki ku mwene. ³⁰ Malaika namubhwila ati "Utobhaya, Mariamu, obha wabhwene ribhando ku Nyamuanga. ³¹ Rora ougega inda Munda yao no owibhula omwana na lisina ryae oumutoga Yesu. omwene ³² alibha mukuru alitogwa omwana wa unu ali inguru muno Lata Bhugenyi Nya Daudi esemwene ³³ Alikama oruganda lwa Yakobo kajanende no bhukama bhwaye bhutaliwao. ³⁴ Mariamu nabhusya malaika jiribha kutiki okubha nitana murume. ³⁵ Malaika namubhira "moyo mweru alikwijila inguru yao, namanaga unu aliinguru muno Anja inguru yao. ku nokubha omwana unu kebhulwa alitongwa omwana wa Nyamuanga. ³⁶ Lola, omuili wao Elijabheti ali na inda yo mwana mu bhulame bhae obhwo bhukaluk. Kunu ni kwesi kwa sita kwa inda yae, unu aliga natogwa mugumba. ³⁷ Kulwokubha litalio linu elimusinga Nyamuanga." ³⁸ Maliamu naikati, Lola, anye ndi mukosi we chigasi wa Nyamuanga. Siga jibhe kutyo aikile kwanye emisango jao."Neya malaika namusiga. ³⁹ Nio kunsiku ejo Mariamu nagenda bhwangu mu chalo chebhima, mu musi mu nsi ya Yudea. ⁴⁰ Agendele nengila munyumba ya Jakalia namukesha Elijabheti. ⁴¹ Oli yabhonekene ati Elijabheti ejile inkesha ya Maliamu, omwana munda yae nejunga, na Elijabheti nejushwa no mwoyo mwelu. ⁴² Naikila ingulu kwo bhulaka bhunene,"una libhando agati ya bhagasi bhona, no mwana unu ali munda yao ona abhonekewe. ⁴³ Jabhakutiki kwanye ati, nyila wa Latabhugenyi jimwiile aje kwanye? ⁴⁴ Kulwokubha lola, anu nongwo obhulaka bhwo kukeshyanya kwao, omwana munda yani nejunga ku lwokusandabha. ⁴⁵ Na abhonekeweomugasi oyo unu ekilisishe ati jakabhonekene jinu jaikilwe jili ja chimali jinu abhwiliwe okusoka ku Latabhugenyi." ⁴⁶ Maliamu naikati, omwoyo gwani ogumukuya Latabhugenyi, ⁴⁷ No mwoyo gwani gukondelewemu Nyamuanga omukisha wani. ⁴⁸ Kulwokubha amalola kutyo ali mwololoomukosi wae owechigasi. Lola, okwambila woli jinyibhulo jona ejija okumbilikila owamabhando. ⁴⁹ Kulwokubha omwene owobhutulo amakola amgambo manene kwanye, na lisina lyae ni lyelu. ⁵⁰ Nechigongo chae chilio okusoka maimbo na maimbo ku bhanu bhanu abhamwikilisha. ⁵¹ Olesishe amanaga kwo kubhoko kwae, anyalambuye bhanu bhekushaga ingulu yo bhwiganilisha bhwe mioyo jebhwe. ⁵² Abhatelemusishe ansi abhana bha bhakama okusoka kubhitebhe bhyebhwe ebhyobhukama no kubhakusha bhanu bhaliga bhagailwe. ⁵³ Abhegusishe bhanu bhaliga bhana omweko gwe bhinu bhyekisi, tali abhanibhi abhabhilimishe bhatali na chinu. ⁵⁴ Asosishe obhusakisi ku Israel omukosi wae, koleleki okwichuka okwolesha echigongo ⁵⁵ (lwakutyo aikile ku bhalata bheswe) ku Abrahamu no lwibhulo lwae kajanende." ⁵⁶ Maliamu ekae na Elijabheti kwa mwanya gwa mesi gasatu kutya nio nasubha ika ewae. ⁵⁷ Woli omwanya gwaliga gweile ogwa Elijabheti okwibhula omwana wae na nebhula omwana we chilume. ⁵⁸ Abhekashanya bhae na bhaili bhae bhonguhywe kutyo Latabhugenyi amwikisishe echigongo kumwene, nibhakondelelwa amwi nage. ⁵⁹ Woli jasokene ku lusiku lwa nane ati bhejile okumtenda omwana. Jaliga jibheile okumtoga lisina lyae,"Jakaliya,"kwo kulubha lisina lye esemwene, ⁶⁰ Tali nyila wae nasubhya naikati,"Payi; kabhilikilwa Yowana." ⁶¹ Nibhamubwilati, atalio na umwi amwi mubhaili bhao unu kabhilikilwa lisinaelyo." ⁶² Nibhamukolela echijejekanyo esemwene wae okususanyisha omwene aliga nenda atogwe niga. ⁶³ Esemwene nenda olubao lwo kwandikila, na nandikati,"Lisina lyae ni Yowana."Bhona nibhalugusibhwa nelyo. ⁶⁴ Aonao omunwa gwae nigwiguka no lulimi lwae nilusulumuka. Naloma nakumukusha Nyamuanga. ⁶⁵ Nibhobhaya bhona bhanu bhaliga bhekae ayeyi nabho. Emisango ejo nijiswila muchalo chona echa mabhanga ga Yudeya. ⁶⁶ Bhona bhanu bhagonguhye nibhagabhika mumitima jebhwe, nibhaika ati, "Omwana unu ni wakutiki?" Kulwokubha okubhoko kwa Nyamuanga kuliamwi nage. ⁶⁷ Esemwene wae Jakaliya ejusibhwe no Mwoyo Mwelu nasosha obhulagi, naikati, Asimwe ⁶⁸ Latabhugenyi, Nyamuanga wa Isilaeli, kulwokubha amasakila na amafulubhendela omwelulo gwa bhanu bhae. ⁶⁹ Amachinamusisha liyembe elyomwelulo mu nyumba yo mukosi wae Daudi, okusoka mubhamwi bho luganda lwo mukosi wae Daudi, ⁷⁰ Lwakutyo aikile kwo munwa gwa bhalagi bhae bhanu bhaliga bhalio ku mwanya gwa kala. ⁷¹ Kaja ochikisha okusoka kubhasoko bheswe no kusoka mumabhoko gabhanu bhachiyatile. ⁷² Alikola kutya okwolesha echigongo kubhalata, nokwichuka lilagano lyae lyo bhwelu, ⁷³ no mulayi gunu aikile ku lata weswe Aburamu. ⁷⁴ Alaiye okwolesha ati jakatulikene okumukolela Omwene atali na bhubuha, chisanga chamalile okuchungulwa okusoka mumabhoko ga bhasoko bheswe. ⁷⁵ Mubhwelu no bhulengelesi lmbele yaye munsiku jeswe jona. ⁷⁶ Yee, aona mwana, oubhilikilwa mulagi wa Unu ali ingulu muno, kulwokubha ouja okugenda mubhusu bhwa Latabhugenyi koleleki okumuchumila injila, okubhamenyesha abhanu kulwokuja kwae, ⁷⁷ Okubhamenyesha abhanu bhae ati, bhalichungulwa kwo kwiswalililwa ebhibhibhi bhyebhwe. ⁷⁸ Linu libhonekene kulwainsonga ye chigongo cha Nyamuanga weswe, kulwainsonga ati lisubha okusoka ingulu lilichijila, ⁷⁹ Okumulikila bhanu bhanu bhekae muchisute na mwilengesi lyo lufu. Kakola kutyo okutangasha amagulu geswe mu njila yo mulembe." ⁸⁰ Woli, omwana oyo nakula nabha namanaga ge chinyamwoyo na ekae mwibhala kukinga olusiku lwo kubhonekana kwae ku Isilaeli.