2 ¹ Yesu nikakhewulwa mu Bbesirekemu esyewuYudaaya, khu mireembe cha Herode Omwenengo, wona abakesikesi abatula ewukwe bacha e Yerusaalemi ² ni bateeba baati, Ali yeena weene oyo owiwuuywe Omwen’engo wa Bayudaaya? Olwokhuba khwawona eɳɳiniɳɳini e wukwe sakira khwiichire okhumwiinamira.” ³ Herode Omwen’engo nikawulira kelaliikhirira, alala nende abe Yerusaalemi boosi. ⁴ Kawuusa ba khawona bakhulutu boosi nende abeekesa bamalako kabateeba Kurisito yikakhewulwe. ⁵ Bamukowolamo baati, Mu Bbesirekemu esyewuYudaaya. Olwokhuba nje lu syawaandiikiwa nabbi siityo nti: ⁶ Ewe wesi Bbesirekemu, esyaalo sya Yuda, syooli mutono mu banawaami ba Yuda; olwokhuba otuka alitula mwiwe olyaaya abatu bange Yisirayiri. ⁷ Manu Herode kalanga abakesi kesi abo mu wekisi, kabahemekeresa lukali ebikha byeene bi ɳɳiniɳɳini yakhamala niyiwonekhire. ⁸ Kabatuma e Bbesirekemu, kabawoola ati, “Muche mukoonye lukali, muwone omwana oyo. Naye ni mu mwakhakana mwicha mwaamboolera sesi kho niiche mwiinamire.” ⁹ Nibamala okhuwulira Omwene’ngo byabawooye, bemeeda no’lukendo lwawe, manu eɳɳiniɳɳini eyo yibawonera ewukwe yabatangiramo yecha yema amukulu omwana ali. ¹⁰ Nibawona eɳɳiniɳɳini, basangaala lukali. ¹¹ Ne nibengira mu nyumba, bawona omwana nende Malyamu ɳɳina baafumala, benamira omwana. Bawolola ensawo chawe bamuwa ebiwaanwa ebye saabbu owubbani nende amafuta akawunya wulayi lukali. ¹² Ne nibalawuliwa mu silooto batakowolayo eyiri Herode, bakowolayo e waawe nibabita khungira yiindi. ¹³ Manu nibamala okhuwaawo, malayika wa Weere kawonehera Yusufu mu sirooto namuwoola ati. Singira, wukula omwana nende ɳɳina wirukhire e Misiri. Ba eyo okhwosa Ese omwene lu ndikhuwoola, olwokhuba Herode kecha okhumukiiya amwiite.” ¹⁴ Yusufu ni kasisimukha, kawukula omwana nende ɳɳina esiro baacha e Misiri, ¹⁵ baaba eyo okhwosa Herode lukafwa. Emboosi yolerere Weere yikalomalomera mu nabbi nga awoola ati: Nakhalange omwana wange okhutula mu Misiri. ¹⁶ Herode ni kawona nga abakesikesi bala bamwekosobanisyekho, kasunguwala lukali, kalagira okhwiita abaana besisyani boosi abali e Bbeserekemu nende khu njakho chasyo choosi abakhamala emyaaka chibiri nende assi wacho, nga ebiro bikateebereseramo lukali abakesikesi lu byali. ¹⁷ Manu nje emboosi nabbi Yeremiya yi kalomaloma luyolerera lukawoola ati: ¹⁹ Naye Herode nikamala okhufwa, wona malayika wa Weere kawonekhera Yusufu mu sirooto e Misiri ²⁰ nga awoola ati, Singira, owukule omwana nende ɳɳina oche mu syaalo sya Yisirayiri, olwokhuba abali bayiima omwana okhumwiita bafwiye.” ²¹ Kasingira, kayira omwana nende ɳɳina bacha mu syaalo sya Yisirayiri. ²² Naye nikawulira ati Akhikerawo nje Omwene’ngo we wuYudaya nga asikhiiye simwana Herode, katya okhukowolayo. Naye Weere keecha kamulawulira mu sirooto, kekholoobya kabita khu luwande lwe Ggaliraaya, ²³ keecha kaba mu siko eriita lyasyo Nasaalesi. Emboosi ba nabbi yi balomaloma yolereye yiiti: Kakhalangiwe mu Nasaalaayo.