¹ Bampa olusheke lushushire akarhi, b'aderha: yumanga ogerul'eshengero lya Nyamuzinda, n'olurhamba, n'abakuzizamo. ² Alikw'embuga w'eshengero, orhayiyerulaga oyileke bulala yahabirwe abanyamahanga na nji balabarh'amagulu gabo omu chishagala chichesibwa omu myezi makumi mane n'ebiri. ³ Nji naha bahamiriza bani babiri obushobozi b'okuleba, bayamber'ebishoho, siku chihumbi na magana mabiri na makumi gali ndarhu. ⁴ Abo bahamirizi y'emize kumi n'ebiri na bimole bibiri biyumangire emalanga ga Nahano w'egulu. ⁵ Nkahali owalonza kubajira kubi, omuliro gwarheng'omu bunu bwabo, gwanaly'abashombanyi babo. Na nkahali owalonza kubajira kubi, bikwanene ayirhwe ntyo. ⁶ Baherh'obushobozi b'okuchinga emalunga envula erharhogag'omu mango bali baleba; baherh'obushobozi b'oku hindamul'amenji kuba shagama n'okushurh'egulu obuhane bwa ngasi lubero ngasi mango balonzeze. ⁷ Han'obamala kuhamiriza echinyalubala chanazamuka kurheng'omu kuzimu chanabalwisa, chanabahima n'okubayirha. ⁸ N'emirhumba yabo nji yaba omu njira z'echishagala chinene, chilahamagala omu by'omuka mpu y'e Sodomo n'e Misri, Ohola ho Nahamwabo abambwaga. ⁹ Abantu b'amashanja g'oshi, b'emilala, enderho nji balola eyo mirhumba esharhu n'echichira. Barhakayemera bahabwe. ¹⁰ Enyanya z'ebyo, abantu b'egulu nji basima n'okushagaluka, n'okushegulana bulala abalebi babiri b'afire b'alemaga barhindibuz'egulu. ¹¹ Hagera siku esharhu n'echichira, omuka gw'akalamo, kurheng'emwa Nyamuzinda, gwanabajamo bana yumangir'oku magulu gabo, obuba bunene bwaja mubalala baligwerhe b'ababona. ¹² B'ayunv'omulenge kurheng'empingu gwaderha: muzamuk'eno, bazamukir'empingu omu bichu n'abashombanyi bali balola. ¹³ Mw'ako kashanji bayunv'omusisi gunene omu gulu n'echigabi chakabiri ch'echishagala, chagwa; bihumbi mushanvu by'abantu b'afa n'omusisi gw'egulu n'abandi bayubaha, b'alerh'obukuze oku Nyamuzinda oli empingu. ¹⁴ Obuhanya bwakabiri bwagerere, talaga okw'obuhanya bwa kasharhu buli hofi. ¹⁵ Malayika wa mushanvu aband'omu mushekera, haba omu mpingu emilenge minene y'aderha: obwami bw'egulu bukola bwa Nahamwerhu na Kristu wage, b'aburhambula emyaka n'emyaka. ¹⁶ Abagula makumi mabiri na bane bayiker'emalanga ga Nyamuzinda oku ntebe y'obwami bayinama kugera ahashi, b'amukuza Nyamuzinda. ¹⁷ B'aderha: rhukuvugir'omokwa Nahano Nyamuzinda ogala byoshi, webaho, wanaliriho, w'afarhir'obushobozi bukulu, wanagwarh'obushobozi bw'obwami bwawe. ¹⁸ Abanya mahanga baluba; oburhe bwawe bwayinja n'ebichanji by'okuchira abafir'olubanja by'ayinja. Ebyokuhemb'abakozi bawe, abalebi, abachesibwa n'abayubah'ezino lyawe, abadahwa n'abakulu n'okulimbula bala babihy'egulu. ¹⁹ Akanyamuzinda k'achingulwa omu mpingu n'esanduku y'endagano yage y'aboneka omushengero lyage. Hab'emibaraganyo, emilenge, emikungulo, n'omusisi omu gulu, n'envula y'olubula lunene bwenene.