¹ Nkaambonzi manyika naali mumasukusyo, alimwi nkaamboonzi bantu nibachita mabambe atazwidilili? ² Baami banyika babweza chiimo chabo antomwe alimwi baleli balajatana antoomwe mukukazyania a Jehova akukazyania amutumwa wakwe, kabati, ³ ''Atudeluule tugwisye zisamo nzibatubikilide alimwi tusowe nketani zyabo.'' ⁴ Ooyo uukkede mumajulu ulabanyanyaala; Mwami ulabanyansya. ⁵ Mpawo uyowambuula ambabo mubukali bwakwe akubakolongania mubukali bwakwe, kati, ⁶ ''Imebo lwangu ndakananika Mwami wangu aa Ziyoni, chilundu changu chisalala.'' ⁷ Ndiyo wambilizya malayilile aa Jehova. Wakandaambila kuti, ''Uli mwana wangu mulombe. Oobuno buzuba ndilaba wuso. ⁸ Ndikumbile, alimwi ndiyokupa manyika kuti ibe lukono lwako aminkome yanyika kuti iibe buvubi bwako. ⁹ Uyozityola akabulo mbuli nkomesi yasikubumba uyozipwaya zikabe tumpanzi tumpanzi. ¹⁰ Nkiinkako linobu, inywebo nobaami, amuchenjezegwe, amuzyotololwe, nobatongi banyika. ¹¹ Amukombe Jehova mukuyoowa alimwi mubotelwe akuteketa. ¹² Mumyoonte mwana mulombe nakuti amunyemene, alimwi muyoofwa munzila aawo bukali bwakwe kabupya kwachiindi chinini biyo. Balongezegedwe biyeni aabo bayanduula kuyuba muli nguwe.