¹ Nazvinezvi Ukulu wa Kudzaulu ndiwo ninga mwenekatchiro munda ubodzi kuti adabuda kweru, tchakumatchibese, kaswaga wanyamubasa wakumunda watche. ² Patche adapeza kupindirana na wanyamubasa denari libodzi pantsiku, iye adawatuma kwenda kumunda watche. ³ Iye adabudazve paswa panguwa zikaita zitatu ese adawona wenango wanyamubasa wakubvswa mumusewu. ⁴ Ese adawabvunza: 'Endaniwo basi kumunda wangu, ese ine ndinadzakupasani zvidakwanirana. Napenepo iwo wadaenda kasenza. ⁵ Ulengo unango, iye adabuda panguwa zikaita zitanhatu ese, paswa, panguwa zinomwe, futi adaita zvibodzibodziwo. ⁶ Kanangozve panguwa zikaita kumi naibodzi, iye adabuda ese adasangana nawenango kuti wakabvswa. Ese adabvunzisa: 'Thangweranyi kulikubvswa iyense ntsiku?' ⁷ Iwo wadamudaira: 'Thangwe hapalibe alikuda kuti timusenzere'. Iye adawabvunza: Endani basi kumunda wangu'. ⁸ Pako kumawulo kudaswika, mwenekatchiro adati kuna muemereri: 'Daidza wanyamubasa ese wabadale male zawo, tangisa kuna wakupezesera kuswikira wakutanga'. ⁹ Pawo wanyamubasa kuti wadatoliwa panguwa iyatchi kumi naibodzi wadaswika, mubodzi namubodzi adatambira denari libodzi. ¹⁰ Pawo wanyamubasa wakutanga wadaswika, iwo wakafunga kuti wangada tambira zakuwanda, napenepo mubodzi namubodzi watche adatambira denari libodzi. ¹¹ Pawo iwo wadatambira mubadalo wawo, wadamangala kuna mwenekatchiro munda. ¹² Iwo wadati: 'Awa wakupezeserawa wasenza nguwa ibodzi basi, apo iwe watsazanisa na ife, kuti tapirira nakuneta ense ntsiku futi nakupitsa kukulu'. ¹³ Apo mwenekatchiro adadaira kuna mubodzi watche, atchiti: 'Chamwali, ine handisi kukubvswinyirira, hauna kupangana naine denari libodzi? ¹⁴ Tambira zvako kuti nswako ese enda zvako; ine ndaphasisa kupasa kuna awa wanyamubasa wakupezesera ndende kuna iwe. ¹⁵ Ausi ulele wangu kuti ine ndiite zvangu ndinadda nazvinhu zvangu? Kana ndimatso iyako iyadanyangala thangwe ine ndine wakuchupha?' ¹⁶ Nadyali wakupezesera wanadzagala wakutanga, ese wakutanga wakupezesera." [Wazinji wadadaidziwa, apo wadoko ndiwo wadasankuliwa. (zvinembwa zvakalekale zvinatowezera phindi iri)]. ¹⁷ Patche Djeso akakwira kwenda Djerusalema, adadaidza pakundu wapfunzi kumi nawairi ese, munjira adawabvunza: ¹⁸ "Wonani: Ife tirikukwira kwenda ku Djerusalema, ese Mwana Wamunhu anadzaperekiwa mumanja mwa wakulu wakulu na wanembi. Iwo Wanadzamutongera kufa ¹⁹ ese Wanadzamupereka kuna mahedeni kuti Wamunyoze, Wamunere na kumukokomera. Apo nantsiku iyatchitatu Iye anadzamuka". ²⁰ Napenepo mai wawana wa Zebedeu adauya kuna Djeso nawana watche. Iye adagodama pamberi Patche ese Adamukumbira. ²¹ Djeso adamubvunzisa: "Ulikudanyi?" Iye adadaira: "Tongerani kuti, muukulu Wanu, wana wangu wairiwa wakwanise kugalawo, mubodzi kumadyo Kwanu ese unago kubvwere Kwanu". ²² Apo Djeso adadaira ese adati: "Hausikudziwa zvako ulikukumbira. Imwe munakwanisa kumwa mukombo kuti Ine ndiripaduze kuti ndimwe?" Iwo wadadaira: "Tinakwanisa". ²³ Iye adawabvunza: "Mukombo Wangu tchaizvo munadzamwa. Apo kugala kumadyo kwngu futi kugala kugala kubvwere kwangu Handikwanisi kukutenderani, apo izvi zviri kuna wenewale kuti wadalongedzerha na Baba Wangu". ²⁴ Pawo wenagowo kumi wapfunzi wadabva izvi, iwo wadagala wakuchamisiwa na wabale wairiwo. ²⁵ Apo Djeso adawadaidza kuna Iye ese adawabvunza:"Dziwani kuti wakulu wakulu wamahedeni walikuwatonga, ese wamuna wakukhodzeka waliita ntsimba kuna iwo. ²⁶ Apo ngazvireke kuita dyali pakati panu. Kunza kwaizvi, weneule kuti anada kita mukulu kunaimwe ngagale nyamubasa wanu; ²⁷ ese weneule kuti anada kugala wakutanga pakati panu ngagale nyamubasa wanu; ²⁸ nadyali ninga Mwana Wamunhu halibe kuuya kuti atsidzirhe, apo kuti atsidzire, ese kuti apereke mulalama kwatche ninga kubatsira kuwazinji". ²⁹ Pwao iwo wadabuda pa Djeriko, mbumba izinji Idamutewera. ³⁰ Ese wonani kuti wamuna wairi mapofu wakadagala mumerera mwamuseu; pawo iwo wadabva kuti Djeso alikupinda napaduze, wadakuwa watchiti: "Tchangamire, Mwana wa Davidi, itani ntsisi kuna ife". ³¹ Apo mbumba idawawatamiza, itchiwabvunza kuti galani ziyi. Napenepo iwo wadakuwa maningi futi watchilanga: "Tchangamire, Mwana wa Davidi, itani ntsisi na ife" ³² Napenepo Djeso adaema, adawadaidza ese adati: "Mulikuda kuti Ine ndiuyitenye?" ³³ Iwo Wadamudaira: "Tchangamire, kuti matso iyathu iyavulike". ³⁴ Napenepo Djeso, adatenyesiwa nantsisi. Tchiripo ripotcho iwo wadatambira kuwona futi wadamutewera.