¹ Patche Djeso adapeza kupfunzisa wapfunzi kumi nawairi, adabuda penepo adaenda kapfunzisa nakapalidza mumaluwani iyawo. ² Juwau patche adabva muperezo pamusana pamabasa iya Djeso, adatumira masoko napamusana pawapfunzi watche ³ ese Adamubvunza: "Imwe Ndimwe mukada kuuiya, kana kuna unango munhu kuti tinadikana kuemera?" ⁴ Djeso adawadaira: "Endani ese bvunzani Juwau zvatche awona nakubva: ⁵ mapofu adatambira kuwona, zvirema zvidafamba, wanyamapere wadatchenesiwa, nkutyi zitchibva, wanyakufa wanauiyisiwa wapenyu, ese walombo wanaparidzirha matswa iyamuche. ⁶ Futi adakomborerha ndiye weneule kuti hawoni thangwe lakutsauka kuna Ine". ⁷ Pawo iwo wakafamba njira zawo, Djeso adatanga kulanga kuna mbumba pamusana paJuwau: "Mudaenda kawonanyi murusere? Musale ubodzi kuti udathusiwa namhepo? ⁸ Udaenda kawonanyi? Mwamuna mubodzi kuti akadatsimira nguwo zidoko? Tchadiko, weneule kuti anatsimira nguwo zidoko anagala mamiyi iya wakulu wakulu. ⁹ Apo, mudaenda kawonanyi? Muprofiti mubodzi? Ande, Ine ndirikukubvunzani: kupinda muprofiti. ¹⁰ Uyu ndiye weneule pamusana paadanembiwa: 'Wonani, Ine ndirikutumira nyamasoko Wangu pamberi pankope iyako, wakuti atchadza longedzera njira pamberi pako'. ¹¹ Tchadiko ndirikukubvunzani: wenewale kuti wadabaliwa namukadzi, hapalibe mukulu kupinda Juwau munyiki; napenepo munu adakhodzeka padoko muUkulu Wakudzaulu ndiye mukulu kupinda iye. ¹² Kubudira ntsiku zaJuwau Munyiki kuswikira nyamuntsi, Ukulu Wakudzaulu unabonera uphwazi, ese wanhu kuti wanazvisenzesa nauphwazi wanautola nantsimba. ¹³ Thangwe wense maprofiti na mutemo unaprofita kuswikira Juwau. ¹⁴ Ese, mungati imwe mulikuda kutenda izvi, uyu ndiye Elia, kuti alikuda kuuiya. ¹⁵ Weneule kuti anamakutu iyakubva ngabve. ¹⁶ Ndinatsazanisa nawani dzinza iri? Ndilo ninga wana walikubvswa kwakugulisira, kuti wanagala ese watchidaidzana woga woga ¹⁷ ese watchilanga: 'Ife tirikuliza kanagali kuna imwe, ese amulibe kubvswa. Ife tidagulukuta, ese hamulibe kulira'. ¹⁸ Napenepo adauiya Juwau, halibe kurja, halibe kumwa, ese iwo wadalanga: 'Iye anadimoni'. ¹⁹ Mwana Wamunhu adauya atchirja futi atchimwa, ese iwo wadalanga: 'Wonani, Iye ndiye mwamuna dzimwe na nyopozi, chamwali mubodzi wawalongosi wamisonko futi wawanyangazi! Nazvizvi kudziwa kudairirha namabasa iyatche'. ²⁰ Napenepo Djeso adatanga kusunga maluwani kuti midzaidzai mizinji idaitika, thangwe iwo awalibekuzvitsumba. ²¹ "Udatukwa iwe, Korazimi! Udatukwa iwe, Betsaida! Ingati midzaidzai kuti idaitika kuna imwe deka idaitika kuTiro naku Sidomi, iwo deka wazvitsumba kalekale nanguwo zamasakhi nadhotha. ²² Napenepo kungadawoneka kulekerera kuna Tiro naSidomi pantsiku iyakutongiwa kupinda imwe. ²³ Iwe, Kafernaumi, unadzabererha kudzaulu? Nkabe! Unadzathusiwa pantsi, kumoto; nazvinezvi, kungati kuSodoma kudaitika midzaidzai kuti idaitika kuna iwe, iye angadalambirira kuswikira nyamuntsi. ²⁴ Apo Ine ndirikukubvunzani kuti zvinadzagala zvakudonha kuna dziko laSodoma, pantsiku iyakutongiwa, kupinda iwe". ²⁵ Panguwa eneyo, Djeso adati: "Ine Ndikukuzani, Baba, Tchangamire wakudzaulu napantsi, thangwe maswisa zvinhu izvi kuna wadziwisisi na wanyaludziwo, ese wadazvibvunza kuna wana. ²⁶ Ande, Baba, adaita Kudakwatche. ²⁷ Zvense zvinhu zvidathembiwa kwaIne na Baba Wangu, ese hapalibe anadziwa Mwana, kunza kwa Baba, futi hapalibe anadziwa Baba, kunza kwa Mwana na weneule kuti Mwana anada kubvunza. ²⁸ Uyani kuna Ine mwense kuti mudaneta ese mudalemerha, ese Ine ndinakupasani phumhuzo. ²⁹ Tolani mutolo Wangu ese pfunzirani kuna Ine, thangwe Ndine wamuche futi wakuzvitcheswa mumoyo, ese mudzawona phumhuzo kuna mizimu iyanu, ³⁰ thangwe mutolo wangu udalula".