14 ¹ Tempo xi za, Helode, tetraka, ndê fa Jizu. ² Ê fa kiaru rê: Ié sa Zon, Batista: Ê lata motxi, ê manda má puré sa jiru né. ³ Sô Helode tê, manhé pê pézu, povia Herodia, mengai di nani-mó rê Filipe, ⁴ Sô Zon fa: Ê na sa bua pa bô tê mora mengai ô wha. ⁵ Helode ka manda maté mazi ê mendu povo, punda ané pia mé sa whã na lekadu. ⁶ Mazi olá dia ano Helode, ná Helodia foga kaxi kuviraru só ê yê Helode. ⁷ Kua mé kundji, ê plometê zula. Ma ê karé kuakuali-kua mé ka pindji. ⁸ Sô olá má mamá rê siné ê fs: Dãn ntê Zon Batista leto whã pato inguê. ⁹ Sô alê ta kumoveru fogawha ku kua ma né-é pindji, mazi punda kua mé zula ku turu nkênu ku ta kotarê, ê manda pa kazi kué. ¹⁰ Ê manda soré pa ané kota ntê Zon pê pezu. ¹¹ Sô a bi ku ntê rê lêtu wúa patu ra né-é, ê bekuê ra mama rê. ¹² Sô ané damo-rê bi, tua onguêrê ba tia. Êta sô ané ba tanga Jizu kué. ¹³ Olá Jizu ndê kua ku ra ê siê fonha letu whã vapô bá whã nga pataru. Ola ané ndê kuaé e yô nkênu lêlê ô pê, bi fô possu. ¹⁴ Sô Jizu dêsê vapô ê bê yô nkênu. Só ta ku pena ané ye kula doetxi ané. ¹⁵ Olá ê ndu ngonsi ané melu rê bilelê sô fé: Ynguê sa whã sê newhã kua né y ê sa nsuku zá. Manda ané nkênu é bené vila ba kopa mé dá ané. ¹⁶ Mazi Jizu fa ané: ané na toka benéwhã da ané kua mé. ¹⁷ Ané fé: non tê tanó mpó ku dosu kikê. ¹⁸ Jizu fé: bikuê damu. ¹⁹ Sô Jizu manda ane nkênu-é tasó patxiru. Ê tua tanon mpó ku dosu kikê bila wê da osé, dé bensa sô patxié ra ané melu rê sô ané melu-é ra ané nkênu-é. ²⁰ Turu ané mé fika ku ngôsu. Sô ané koiê ndjigui ku sobla de mé: Kuine dosú zonguê siaru. ²¹ Nkênu ku mé sa kuazi xinku mili omé menu mengai ku na pikina. ²² Ta sô Ê zi ané melu rê letxa vapô békuê ôtô kiba sô Ê dispidji ané nkênu-é. ²³ Sô ola Ê manda ané nkênu-é bené, Ê subi whã nga zangaru Elê sô ba fa lasón. Ola ê bila kulu, Ê ta nha sô. ²⁴ Mazi vapô ta londji ku taiã kaji fora kotroli punda basa, punda ventu ta ka sopua kontra ané. ²⁵ Sô ni kuana vigia nsuku, Jizu possima ané, ka nda diba mionga. ²⁶ Ola ané melu rê Bê kanda diba mionga, ané ta ku mendú. ²⁷ Mazi Jizu fa ané ola é mé: ta ku koso! Ê sa un, na mendu wha. ²⁸ Sô Peru kundji: Sumun, xi ê sa Ô, manda un bá lêlê ô diba aua. ²⁹ Jizu fé: Bi! Só Peru siê fô vapô nda diba aua atê kota Jizu. ³⁰ Mazi ola Peru bê vento, ê ta ku mendu: sô komesa ka funda ê nguita: Sum savamu! ³¹ Tá sô Jizu sendê món, tê Peru sô fé: Bô ku tê poko afé, punda kuai bô duvida! ³² Sô ola Jizu ku Peru letxia vapô, Ventu ndja de sopua. ³³ Ané melu-rê letu vapô gôgô ku Jizu sô fé: Bô sa Ná Desu de veré. ³⁴ Sô olá ané tô passa, ané vitxa tia Genesaré. ³⁵ Olá ané omé nga-é bi ta Jizu, ané manda ná lekaru ba turu nga turu kiba sô bi ku turu doetxi dé. ³⁶ Ané pindji xi ané ka pô tê xinta mánta Rê, sô turu nkênu ku ka tê ka kula.