¹ Paulo, sevo dy Jizu Kistu samro pê sa apostulu pataru ra Envangelhi dy Dêsu, ² Ma ê plometê antigi povia dy profeta Rê ny Eskritura sagrada, ³ dy lixipetumosu Rê ku bi né gelason Davi né kani. ⁴ Povia resurison dy motxi, Ê bi musaru ny porê mosu dy Dêsu dy supitu dy santidade, Jizu Kistu, Sun nó. ⁵ Punda Elê nó lesebê glasa dy suviso dy apostulo pa obidêsê afé katxi turu nkênu, punda nomi Rê. ⁶ Né katxi ané nason é, sê té sa samari pa sa dy Jizu Kistu. ⁷ Turu sê, amaro dy Dêsu ku sa ny Roma sô ku sa samro pa sa santo, glasa ku pazi dy kiba dy Dêsu, tata nón, sô dy Sun Jizu Kistu. ⁸ Pimelo, nga fa obigado Dêsu un poviata dy Jizu Kisto, ra turu sê, punda afé sê sa faru ny turu mundu. ⁹ Sô Dêsu, nkênu ma an nga xivi ny supitu un ny Envangelho dy Mosu Rê, sa sesemunha un dy mora sempli nga zi ku sê. ¹⁰ ny orasón un, nga pindji dy mora dy vonté dy Dêsu, an un pô vizita sê. ¹¹ Punda mêsê bê sê, pa un zunta ku sê dy lumba ku sê ny porê supitu pa sê sa buaru. ¹² Ixié é sa pa sê sa un a ku ôtô té koraje, de afé dy kada un whã, dy sê sô dy un. ¹³ Sô na mesê na mom, pa sê satia wha punda yô vê pa mba visita sê (maji aié un sa impedidu) pa un bé katxi sê kua buaru mora katxi ane ôtô zintxi. ¹⁴ A un sa dêvêrô tanto grego mora ane estragero tanto sabio mora ane keno ku na ta kua, ¹⁵ Punda kua é, ra a un, un sa prepararo pa fa ny evangelho tuzé da sê ku sa ny Roma. ¹⁶ Punda a un na tê vegonha dy Evangelhu wha, punda ê sa porê dy Desu ra salvasón dy turu nkeno ku kêlê, pimelo ra ane zurê sô pa ane grego. ¹⁷ Punda Ê sa Justisa dy Desu sa bêru dy afé ny alê, mora mê sa sisikaru: Ené justu ka vevia ny afé. ¹⁸ Punda leva Desu ê sa beru onsá kontra turu mali ku kua kontrario dy ane kua ku na ka desa veré ny katxi kua sê zustisa. ¹⁹ Sô kua sa konsêro Desu ê sa biriru ené, sa Desu ngê ené bê. ²⁰ Punda ene kua dy Desu sa konderu, masi porê Rê ku mora Mê sa musaru dgina Ê gi mundo, re ene kua sa giru punda kua, ene sa sê kupa. ²¹ punda mora ma ené konsê kua Desu, na ka glorifika Desu mora Desu wha, né ene na ka Desu glasa wha. Ra kua é ane bila malôko ne pensa ene, ne koso ené dizo bila kulo bêrê. ²² Ka mussa ma ené ta iô kua, bila malôkô. ²³ Ené mura gloria Desu ku na ka muê wha ny whã image mora home ku ka muê mora bisi situ kuwhã ná opé ku situ ka saia só. ²⁴ Sô Desu da ené, paxon kosó ené pa domi ku otô, sa dana y onguê katxi ené, ²⁵ sô mura véré dy Desu, ny siriga, adora tô sivi nguê ny nga Desu, mora Mê sa buaru atê atê, Amém. ²⁶ Punda kué é, Desu da ené vonté sê vegonha y sô mora ené mengai ené mura kofison buaro né ma kosó, ²⁷ mora tê ené homé lega vevia ku mengai mora ma Desu mêsê aié ku ené ôtô, homé ku homé, ngi kua ku na sa buaro wha, bila mali ku mali é. ²⁸ Pa ane na liga kua Desu wha, plope Desu da ane whã pensamento mali pa ene dgi kua ku na sa buaru wha. ²⁹ Sa siaro ku turu mali, kua poreru, whê sia ku mali, ka tê whê siaru ki mendo, ku na ka ndê wha ma pensamento, ³⁰ ka fa vira nkênu numigo de Desu, tapaiaru, ka zi home wê xia, ka pensa kua mali, na ka liga tata wha, ³¹ Sê juizo, kenu ma na ka pô kunfia né wha, sê tê pena. ³² Ené konsê stensa dy Desu, ri nkenu ku ka zi ene kuaé sa nkênu ku toka motxi maji ane na ka gi kua é sô wha, maji té ene ka kundji nkênu ku zi ené kué.